ایران عملدارلری، واشنگتننی آگاهلنتیریب اگر امریکا هرمز بوغوزیدهگی دینگیز محاصرهسیگه دوام ایتتیرسه، هرمز امریکالیک حربیلر و کیمهلر «قبرستانی» گه ایلنتیریلهدی.
ایران عالی رهبرینینگ حربی مصلحتچیسی محسن رضایی ایکس صحیفهسیده بیر بیانیه ترقهتیب، امریکانی دنیادهگی یگانه قراقچی دولت دیب اتهگن.
اونینگ تأکیدلشیچه، ایران قراقچی گه قرشی توریش امکانیتیگه ایگه و ضرورت بولسه، حربی کیمهلرنی یوق قیلیشگه قادر. شونینگدیک او، امریکا هرمز بوغوزیدهگی دینگیز محاصرهسیگه دوام ایتتیرسه، بو غوز امریکالیک حربیلر و کیمهلر قبرستانی گه ایلنتیریلیشی حقیده آگاهلنتیرگن.
او شوندهی دیب یازگن: «امریکا دنیادهگی یگانه قراقچی دولت سنلهدی. بیزنینگ قراقچیلر گه قرشی کورهشیش قابلیتیمیز حربی کیمهلرنی چوکتیریش امکانیتلریمیز بار. اوچاقلرینگیز قالدیقلری اصفهانده قالگنیدیک، کیمهلرینگیز و قوشینلرینگیز هم قبرستان گه توشیشگه تیار تورینگ.»
حاضرده هرمز بوغوزیدهگی ضدیت کیسکینلیگیچه قالماقده.
شو بیلن بیرگه، ایران خاتمالانبیا مرکزی قراگاه قوماندانی علی عبداللی هم، امریکا جمهور باشلیغی دونالد ترامپنینگ یقینده بیلدیرگن بیاناتیگه مناسبت بیلدیریب، هر قندهی خارجی قوراللی کوچ اینیقسه امریکا باسقینچی اردوسی اگر هرمز بوغوزیگه یقینلشیش یا کی کیریش نیتیده بولسه، نشانگه آلینیشینی ایتگن.
عبداللهی، برچه سودا کیمهلری و نفت تانکرلرینی آگاهلنتیریب، اولر هرمز بوغوزیده حرکت قیلگن حالده ایران قوراللی کوچلری بیلن موافقلشمسدن هر قندهی یوریشدن سقلنیشلری کیرهک، عکسحالده اولرنینگ خوفسیزلیگی کفالتلنمهیدی.
اونینگ تأکیدلشیچه، هرمز بوغوزی خوفسیزلیگی ایران قوراللی کوچلری نظارتیده بولیب هر قندهی اوتیش فقط اوشبو کوچلر بیلن کیلیشیلگن حالده عملگه آشیریلهدی.
امریکا جمهور باشلیغی دونالد ترامپ، اوتگن کیچه امریکا بوگوندن باشلب هرمز بوغوزیده قالیب کیتگن کیمهلرنینگ اوتیشی اوچون چارهلر کوریشینی معلوم قیلگن ایدی.
شو بیلن بیرگه، دنیا نفت و گازینینگ تخمیناً ۲۰ فایزی اوتهدیگن هرمز بوغوزی یاپیلیشی، نفت نرخلرینینگ کیسکین آشیشیگه آلیب کیلگن و کوپلب دولتلرده انرژی بحرانینی کوچهیتیرگن.
