ایرتنگلر، غزنی شهرینینگ کوچهلری خصوصی مکتبلرده اوقهدیگن اوقووچیلرنینگ سیس و شاوقینی بیلن باشقه بیر سیمانی اوزیگه آلهدی. حاضرگچه تعلیم آلیشدن محروم بولمهگن اوقووچیلر، مکتبلرینینگ بیللی یونیفرمینی کییب، تبسملی سیمالری و اوتو بولگن کییملری بیلن، خوش-خوشحال مکتب تامان حرکت قیلماقدهلر.
خصوصی مکتبلردن کوپ قطاریدهگی اوقووچیلر هر کونی، آچیق بیر فضاده شعر اوقیش، یازگنلری مقالهلرنی اوقیش و بیر قطار برنامهلرنی اوتکزیش بیلن درسلریگه باشلهیدیلر. اوچ ییلدن بیری غزنی مرکزینینگ ایکی بولیمیده ایکی مکتبنی قورگن ابوالفضل رسولینینگ ایتیشیچه، غزنی معارفیده اوقیش تیزیمینی کوچلنتیریش و ینگی معیارلرنی جایلشتیریش اوچون بو یولنی تنلهگن.
اونینگ کوپهیتیریشیچه: «خصوصی مکتب نینگ قورگنیمدن مقصد، اوقووچیلرنینگ درسی قیینچیلیکلرینی حل قیلیش ایدی. اهالی قیینچیلیگینی حل بولیشی و غزنی تعلیم و تربیه ساحهسیده بیراز فعال حصه قوشیش اوچون یخشیراق بیر مکتب قوریلیشی کیرهک ایدی که انه شوو سبب، مکتب قورهمیز. الحمدالله اهالینینگ بیزلر و مکتبلریمیز گه نسبت ایشانچلری اوتگن ییللرگه قرهگنده کوپهیگن.»
بیزلرنینگ فیسبوک صحیفهمیزگه باش اورینگ!
غزنی ده خصوصی مکتبلردن بیریدهگی اوقووچیلردن عادله جمالنینگ ایتیشیچه، خصوصی مکتبلر فعالیتی، غزنی ده تعلیم کیفیتی یخشیلنیشیگه علاوه، تحصیل قیلگن یوزلب یاشگه ایش زمینهسینی هم یرهتگن. «بو ییل اوشبو مکتبده ایشگه آلیندیم. جودهیم یخشی دیر. کوپ خورسندمین که بیزلرگه ایش زمینهسی یرهتیلدی. بو جمعیتده کته بولدیم، تحصیل قیلدیم و حاضر ایسه خصوصی مکتبلردن بیریده بیر استاد صفتیده ایش بیلن شغللندیم و مذکور مملکت فرزندلریگه خذمت قیلیش اوچون جودهیم خوشمین.»
غزنینینگ خصوصی مکتبلریده درس بیریش صفتی و عایلهلرنینگ تعلیم ساحهسیدهگی اساسی احتیاجلریگه اعتبار قرهتیلیشی، کوپینچه اوقووچی عایلهلرینینگ منتدارلیگیگه سبب بولگن.
خصوصی مکتبلردن بیریده ایکی اوغیل و بیر قیزی اوقووچی بولگن غزنی یشاوچیسی نجیبالرحماننینگ سلاموطندار گه ایتیشیچه: «اوقووچیلر اوچون کوپ تلاش قیلهدیلر. کورهمیز که بالهلریمیز درس اوقیش گه مصروف بولیب قالگن. مکتبلری اولرنینگ وضعیتلریدن هم سورهیدیلر. باشقه مکتبلرگه قرهگنده توجه و درس بیریش بو ییرده جودهیم یخشی دیر.»
تعلیم و تربیه بوییچه ایش بیلرمان و بیلیم یورت استادی حسنرضا شایانفرنینگ ایتیشیچه، اسلام امیرلیگی خصوصی تعلیمی نهادنی قوللب-قوتلش مقصد، مذکور نهادلر برابریده مالیهلرنی کمهیتیرگن. «تعلیم و تربیه ستندرد حالتینی قولدن بیریب و اورته گه بیر بوشلیک کیلگنی بیرحالده، بو بوشلیکنی تولدیره آلیش و صفتلی تعلیمنی کورسهتیش مقصد خصوصی تعلیمی نهادلر اورته گه کیلدی. دولت تعلیم و تربیه ساحهسیده فعالیت قیلهدیگن نهادلردن مالیهنی آزراق آلهدی.»
ایتیلیشچه، حاضر ایسه غزنی ولایتیده ۱۰۶ ته خصوصی مکتبنینگ فعالیتی بار.
بیزلرنینگ «ایکس» ترماغی ده هم تعقیب قیلینگ!
شوندهی بیرحالده، غزنی معارف ریاستی نشرات مدیری میاگل صدیق، مذکور ولایتده خصوصی مکتبلر فعالیتینی اونملی و تعلیمی توزومینی قوللب-قوتلاوچی دیب و سلاموطندار گه ایتیشیچه، حاضر ایسه یوزمینگدن آرتیق اوقووچی اوشبو ولایتدهگی خصوصی مکتبلرده تعلیم آلیش بیلن شغللنگن.
بو توغریده غزنی معارف ریاستی نشرات مدیرینینگ ایتیشیچه: «غزنی معارف ریاستی، دولتی مکتبلر یانیده، ۱۰۶ ته خصوصی مکتبگه هم ایگه دیر که بو مکتبلر بیر قطار تومنلرده فعالیت قیلماقده و مینگلب اوقووچی درس بیلن شغللنگن. معارف بولیمیده خصوصی مکتبلر بارلیگی معارف ریاستی اوچون بویوک بیر حمایت حسابلنهدی؛ چونکه بو مکتبلرده یوزمینگدن آرتیق اوقووچی درس اوقیش بیلن شغللنگن.»
دولتی مکتبلرده ییترلی امکانتلر یوقلیگی و تعلیم توغریسیده چیکلاولر موجودلیگی سبب، عایلهلردن قطاری کوندهلیک صرف-خرهجتلرینی کمهیتیریب و بالهلرینینگ خصوصی مکتبلرگه یوباریش پولینی تامینلهیدیلر.
