سرپرست حکومت ایکینچیلیک، سوغاریش و چاروه‌چیلیک وزیرلیگی مسئوللری، قندهار ولایتی میوند تومنیده سوغاریش بیر کانال ایشی یکونلنگنی و مذکور ولایت مرکزی حدودلریده خوددی شونده‌ی بیر لایحه ایشی باشلنگنیدن خبر بیره‌دیلر.
مسئوللر گه کوره، ایکّی مینگ ۵۰۰ متر اوزون‌لیگی بولگن بیرینچی کانال میوند تومنیده فایده‌لنیشگه تاپشیریلگن و بو لایحه ۱۰۶ مینگ دالر خره‌جت کوتارگن. شو بیلن بیرگه، قندهار مرکزی حدودلریده تورت کیلومتر اوزون‌لیگی بولگن «پنج‌آب» آتیده باشقه بیر کانال نینگ ایشی باشلنگن. بو کانال ۸۲۵ مینگ دالر خره‌جت کوتاریشی تخمین اېتیلگن.
ایکینچیلیک، سوغاریش و چاروه‌چیلیک وزیرلیگی نینگ معینی صدر اعظم عثمانی، اوشبو مقدار پول بیرلشگن ملتلر تشکیلاتی نینگ ترقیاتی برنامه‌سی (یوان‌دی‌پی) تامانیدن توللـه‌نیلیشینی معلوم قیله‌دی.
بیزلرنینگ فیسبوک صحیفه‌میزگه باش اورینگ!
اونینگ کوپه‌یتیریشیچه: «میوند تومنیده بو کانال ایکّی یریم کیلومتر اوزون‌لیگیده قوریلگن، فایده‌لنیشگه تاپشیریلیشی بیلن سوو ضایع بولیشی اونگی آلینه‌دی. بیز بوگون قندهار شهری آلتینچی حوزه حدودلریده تورت کیلومتر اوزون‌لیگی بولگن پنج‌آب آتیده باشقه بیر کانال نینگ قوریش ایشینی باشله‌دیک بو لایحه ۸۲۵ مینگ دالر خره‌جت کوتاره‌دی بو مقدار پول بیرلشگن ملتلر تشکیلاتی نینگ ترقیاتی برنامه‌سی تامانیدن توللـه‌نیله‌دی.»
ایکینچیلیک وزیرلیگی معینی نینگ کوپه‌یتیریشیچه، اوشبو قویاش ییل باشلنگنیدن حاضرگه قدر بو وزیرلیک تشقی موسسه‌لر یاردمی بیلن افغانستان مقیاسیده، ۱۲۰ میلیون دالرلیک تورلی لایحه‌لرنی قوریش ایشینی باشله‌گن.
قندهار محلی مسئوللری، «پنج‌آب» کانالی قوریلیشی بیلن ۲۵ مینگ جریب ایکینچیلیک ییر سوغاریلیب و سوو ضایع بولیش اونگی آلینیشینی اېته‌دیلر.
بیزلرنینگ «ایکس» ترماغی ده هم تعقیب قیلینگ!
قندهار اقتصاد باشلیغی عبدالسلام بریالی گه کوره: «پنج‌آب کانالیدن مستقیم و نامستقیم طرزده ۱۹ مینگ کیشی فایده‌لنه‌دی، اهالی نینگ اقتصادی اوچون جوده هم مهم دیر و سوو ضایع بولیشی اونگی آلینیب و ایکینچیلیک رواجلنیشی گه یاردم بیره‌دی.»
قندهار یشاوچیلری، اوشبو لایحه‌لر عملگه آشیریلیشیدن خورسندلیک بیلدیریب بو ولایت نینگ باشقه منطقه‌لریده هم بو گَل لایحه‌لر قوریلیشینی اېسته‌یدیلر.
قندهار میوند تومنی یشاوچیسی حاجی امیر نینگ ایتیشیچه: «بو کانال بیز اوچون جوده هم اونملی دیر ضایع بوله‌دیگن ۴۰ فایز سوو اونگی آلینیشی ممکن، میوند تومنیده بیر توغان بار، بو توغان قوریلگن حالده اهالی اوچون جوده هم فایده‌لی بولیشی ممکن.»
قندهار یشاوچیلریدن باشقه بیری محمدخان گه کوره: «اوشبو کانال بیز اوچون جوده هم اونملی دیر بوندن آلدین آلتی ساعت ایچیده سوغاریله‌دیگن ییرلر حاضر تورت ساعت ایچیده سوغاریله‌دی.»
ایکینچیلیک وزیرلیگی مسئوللری، اسلام امیرلیگی رهبری نینگ بویروغی اساسیده افغانستان نینگ بوتون تومن‌لریده سوو توغان‌لری قوریلیشیدن ایشانچ بیره‌دیلر.
