کابل ده ملالی کسلخانهسیدهگی نسایی-ولادی شفاکارلریدن قطارینینگ ایتیشلریچه، ایر-خاتینلر آرقهلی تورموش قوریشدن آلدینگی طبی معاینهلر اوتکزیلمسلیگی و ساغلیقنی سقلش توصیهلرگه اعتبارسیزلیک، خوفلی عاقبتلر جملهدن بیپشتلیککه سبب بولیشی ممکن.
اولرنینگ کوپهیتیریشلریچه، قان گروپینی تیکشیریش، هورمونی معاینهلر، اسپرموگرام و بچهدان ساغلیگی تیکشیریلیشی، تومورش قوریشدن آلدین قیز و ییگیت اوچون ضرور بولیب و ایر-خاتین همده جنین سلامتلیگینی تضمین قیلهدی.
نسایی-ولادی شفاکارلریدن عادله اچکزینینگ ایتیشیچه، ایر-خاتینلر ساغلام جنین و حیاتگه ایگه بولیش اوچون تورموش قوریشدن آلدینگی معاینهلردن قطارینی عملگه آشیریشلری کیرهک. اچکرینینگ کوپهیتیریشیچه: «ییگیتلرنینگ ضعیف بولمهگنی اوچون اسپرموگرام اوتکزیلیشی کیرهک؛ عیاللرده هورمونی معاینهلر عملگه آشیریلیشی کیرهک. قان گروپی جودهیم مهم دیر. آراچ فکتور فرقلی بولگنیده، آلدیندن ییگیتلرگه مصلحت بیریلیشی کیرهک.»
نسایی-ولادی شفاکارلردن باشقه بیری سونیتا بهرامنینگ ایتیشیچه، عیاللرده بیپشتلیک و جنین توشیشی سببلری ایسه ییگیتلر آرقهلی تورموش قوریشدن آلدینگی معاینهلرگه اعتبار قرهتمسلیک دیر. «توی قیلیشدن آلدین بچهدان ساغلیگی و هورمونلر معاینه بولیشی جودهیم مهم دیر؛ چونکه هورمونلر بلانسی نرمال بولمهگنیده، بیپشتلیک و کیتمه-کیت جنین توشیشیگه سبب بولهدی. بو موضوع بچهدان کیستی و اضافه ساچلر چیقیشی و شونینگدیک بخار گه سبب بولهدی.»
مذکور شفاکارلرنینگ کوپهیتیریشلریچه، تورموش گه چیقریلیشدن آلدینگی کوریکلر، جنسی یول بیلن یوقهدیگن کسللیکلرنینگ تیزلیککه تانیلیشی، ایر-خاتیننینگ فیزیکی و روحی ساغلیگی تضمین بولیشی همده کیلهسی نسللر اوچون ژنتیکی کسللیکلر آلدینی آلیشگه یاردم بیرهدی.
بو بیلن بیرگه، سلاموطندار بیلن صحبت قیلگن عیاللردن قطارینینگ ایتیشلریچه، تورموش قوریشدن آلدینگی معاینهلرنی قیلمسلیک و اونگه اعتبارسیزلیک طفیلی، حاضر اوزلری یا-ده فرزندلری ساغلیق قیینچیلیکلر بیلن روپهره بولگن.
کابل یشاوچیسی بولمیش ۲۴ یاشر نفیسهنینگ ایتیشیچه، توی قیلیشدن آلدینگی معاینهلر گه توجهسیزلیک سبب، ۱۰ ییل قوشمه حیاتدن کیین حاملهدار بولگن. «حاضر حاملهدار بولگنیم بیلن هم بستریمین؛ ۳۴-هفتهسی دیر؛ چقهلاغیم خام دیر و جنیننینگ اورتهدن کیتیشی احتمالی کوپ دیهدیلر.»
کابل یشاوچیلریدن ۳۶ یاشر مژگاننینگ ایتیشیچه، توی قیلیشدن آلدینگی ساغلیق توصیهلرنی رعایت قیلمسلیک، بیپشتلیک و قوشمه حیاتینینگ قولدن بیریشیگه سبب بولگن. «حاملهدار بولمس ایدیم؛ پاکستان باردیم و دوالنیش آستیده ایدیم؛ لیکن نتیجه بیرمهدی. توی قیلگنیمیزدن ییتی ییل اوتگچ، تورموش اورتاغیمگه خاتین آلدیلر؛ ایکی ییلدم کیین تورموش اورتاغیم مینگه طلاق بیردی.»
شونینگدیک کابل یشاوچیلریدن باشقه بیری و طبی معاینهلرنی قیلمسلیک طفیلی قیینچیلیکلر بیلن روپهره بولیش تجربهسیگه ایگه ۲۹ یاشر بصیرهنینگ ایتیشیچه: «توی قیلیشدن آلدین ساغلیقنی سقلش مرکزلریگه بارمهدیم؛ توی قیلگنیمیزدن ایکی ییل اوتگچ حاملهدار بولمهدیم؛ روحی قیینچیلیککه روپهره بولدیم؛ قیینچیلیک ایریمده ایدی، چونکه ضعیف ایدی.»
بو بیلن بیرگه، دین عالملریدن قطبالدین مجتهدنینگ ایتیشیچه، توی قیلیشدن آلدینگی معاینهلرنی اوتکزی اوچون دین ده هیچ قندهی بیر توسیق یوق. اونینگ کوپهیتیریشیچه: «فقه حنفی نقطهی نظریدن، توی قیلیشدن آلدین ساغلیق معاینهلر و مصلحتلر آلینیشی، نهفقط جائز دیر، بلکیم بیر قطار موردده، مستحب و لازم هم دیر؛ طبی معاینهلر ساغلیقنی اسرهش حسابلهنیب و اونگه رخصت بیریلهدی.»
تورموش قوریشدن آلدینگی مصلحتلر بولیمیده اسلام امیرلیگی ساغلیقنی سقلش وزیرلیگی آرقهلی کورسهتیلگن خذمتلر حقیده، اوشبو وزیرلیک فکرینی آلیش ایستهدیک؛ بیراق موفق بولمهدیک.
توی قیلیشدن آلدینگی معاینهلر اوتکزیلیشی کوپینچه اهمیتگه ایگه بولگنی بیرحالده، اونگه توجهسیزلیک ییگیتلرنینگ قوشمه حیاتینی خوف بیلن روپهره قیله آلهدی؛ بیراق افغانستان ده آگاهیسیزلیک، کمبغللیک و دوالنیش جایلردن فایدهلنه آلمسلیک طفیلی، بو موضوع گه اهمیت بیریلمهیدی.
