هرات شهری‌نینگ گوجوم سرک‌لریدن بیر چیککه‌سیده جایلشگن بیر ایشخانهده، عیاللر و قیزلردن قطاری بیر ییرگه ییغیلیب، قیزیقیش و امید بیلن دارو توزه‌تیش‌گه شغللنگنلر.
مذکور ایشخانهده کمیده ۵۵۵ خاتین-قیز مستقیم و نامستقیم شکلده ایش بیلن شغللنیب و تورلیخیل کسل‌لیک‌لر اوچون اوسیملیکلردن فایده‌لنیش بیلن دارو توزته‌دیلر.
بیزلرنینگ فیسبوک صحیفه‌میزگه باش اورینگ!
اوشبو ییرده ایشلش زمینه‌سی یره‌تیلگن عیاللر‌نینگ ایتیشلریچه، بو یول آرقه‌لی قولگه کیلتیره‌دیگنلری درآمد بیلن، اوزلری و عایله‌لری‌نینگ خره‌جتی‌نی تامین قیله آله‌دیلر.
بو ایشخانهده اوچ ییل‌دن بیری ایشله‌یدیگن سهیلا حیدری‌نینگ ایتیشیچه: «قریب اوچ ییل‌دن بیری بو ایشخانهده ایشله‌یمن. بوندن آلدین اوقیتووچی ایدیم. اوی‌گه ایش‌سیز بولیب اولتیریش‌دن کوره، بو ییرگه کیلیب ایشلش اقتصادی قیین‌چیلیک‌لریمیز‌نینگ حلی اوچون یاردم بیره‌دی چونکه بو ییرده ایشله‌گنیمیز‌گه قدر معاش آله‌‌میز.»
بو ییرده طلبه‌لر، اوقیتووچیلر و عیاللر بیرگه‌لیکده طبیعت‌دن ییغیلیگن بیر قطار اوسیملیکلردن فایده‌لنیش بیلن دارو توزه‌تیش‌گه شغللنگنلر.
هرات یشاوچیسی و تحصیل‌دن محروم قالگن سمیه نوری‌نینگ ایتیشیچه، بو ایش‌خانه اونینگ اوچون مکتب اورنی‌گه ایگه دیر. «بو ییرده بیزلر اوچون بیر مکتب کبی دیر و بو ییرده کوپ نرسه‌نی اورگندیک. کورمه‌گنیمیز اوسیملیکلرنی اوشبو ایشخانهده کوردیک و بولر توغریسیده هیچ نرسه بیلمه‌گنیمیز اوسیملیکلرنی تانیدیک. مکتب کبی بیزلرگه کوپ نرسه‌نی اورگتگن.»
مذکور دارو توزه‌تیله‌دیگن ایشخانهده، تورلیخیل کسل‌لیکلر‌نینگ دوالش اوچون ۹۰ تور اوسیم‌لیک دارو توزه‌تیله‌دی. اوشبو ایشخانهده ایشله‌یدیگن ایشلاوچیلردن بیری عزیز‌گل رحیمی‌نینگ ایتشیچه: «بو ییرده معده، باش آغریق، ساووق اورمه و باشقه بیر قطار کسل‌لیک‌لر اوچون دارو توزه‌تیله‌دی. اوسیملیکلرنی تاغلر بغری و طبیعت‌دن ییغهمیز. بیر قطار اوسیملیکلر ایسه قیشلاغیمیز یقینی‌ده تاپیله‌دی. اولرنی ییغهمیز، یووه‌میز و قوریته‌میز کیین ایسه پروسس و توپله‌یمیز.»
بیزلرنینگ «ایکس» ترماغی ده هم تعقیب قیلینگ!
مذکور ایش‌خانه مسئولی شکریه احمدی، بو ییر‌نینگ آچیلگنی‌دن مقصد عیاللر و قیزلر‌نینگ کوچلنیشی عنوان قیلیب و کوپه‌یتیریشیچه: «بو ایش‌‌گه باشله‌گنیمیز‌دن بیش ییل بوله‌دی. اوشبو ایشخانهده ایشله‌یدیگن عیاللردن قطاری، روحی قیین‌چیلیکلر بیلن روپه‌ره ایدیلر که بو ییرگه کیلیب اوسیملیکلردن دارو توزه‌تیش آرقه‌لی وضعیت‌لری یخشی‌لنگن.»
بو ایش‌خانه گه توپلنیش، عیاللر اوچون یالغیز بیر ایش ایمس؛ بلکیم امید، توخته‌ش و جمعیت‌ده اوز اورین‌لرینی سقلش اوچون بیر باش‌پناه دیر.
