گلبدین حکمتیار رهبرلیگیده اسلامی حزب طرفدارلریدن قطاری بوگون (جمعه ۱۳- حمل) ینه بیر مرته کابل ده ناراضلیک نمایش یولگه قوییشگن. اولرنینگ ایتیشلریچه، حکومت اسلامی حزب بیلن امضالنگن تینچلیک کیلیشوونامهسینی عملی قیلمهی و مذکور حزب محبوسلرینی دولت قماقخانهلریدن قوییب یوبارمهگن.
اوتگن کون اسلامی حزب رهبری گلبدین حکمتیار خبری بیر ییغین آرقهلی مذکور ناراضلیک نمایش یولگه قوییلیشی دن خبر بیریب ایتیشیچه، بو حزب طرفدارلری جمعه کونی کابل جادهلریده ناراضلیک نمایش یولگه قویهدی و حکومت نینگ استعفا بیریشی اولرنینگ اساسی ایستهکلریدن دیر.
حکمتیار گه کوره، اوتگن ناراضلیک نمایش ده اسلامی حزب طرفدارلری حاضرگی حکومت استعفا بیریشی و وقتینچهلیک حکومت تشکیل ایتیلیشی نی سورهگن ایدی، بیراق حکومت اولرنینگ بو ایستهگی گه تن بیرمهگن.
او، اسلامی حزب طرفدارلری حکومت نی باسیم آستیده قرار بیریش اوچون جمعه کون ۱۳- حمل دن کیین کابل و باشقه قطار ولایتلرده کینگ ناراضلیک نمایش یولگه قوییشلرینی ایتگن ایدی. شونینگدیک جناب حکمتیار گه کوره، بوگونگی ناراضلیک نمایش ده قورال هم کوتاریشلری ممکن.
شوندهی بیرحالده، اسلامی حزب طرفدارلری اوتگن ییل ۱۵- حوت ده کابل ده ناراضلیک نمایش یولگه قویگن ایدی. حکمتیار مذکور اعتراض ده بو حزب محبوسلری قوییب یوباریلیشی و مهاجرلر قیتیب و اولرگه یشش زمینهسی یرهتیلیشی اوچون ارگ گه ۱۰ کون فرصت بیرگن ایدی.
او، حکومت اسلامی حزب ایستهکلریگه برابریده توجه قیلمهگن صورتده کابل و باشقه ولایتلرده کینگ ناراضلیک نمایش یولگه قوییلیشی اوستیگه اورغولهگن ایدی. گلبدین حکمتیار نینگ ادعاسی گه کوره، بو حزب نینگ کمیده ۳ مینگ محبوسی حاضرگچه قوییب یوباریلمهگن.