نایجریا رسمیلری، قوراللی کیشیلر بو مملکتنینگ شمالغربی حدودلری «کبی» ایالتیده جایلشگن بیر مکتب گه هجوم قیلیب، ۲۵ قیز اوقووچینی اوغیرلب کیتگنلرینی معلوم قیلگنلر.
خلقارا یېتکرمهلر، بوگون (۲۷-عقرب/۱۸-نومبر، سهشنبه) نایجریا امنیتی رسمیلریگه اساسلنیب ایتیشلریچه، هجومچیلر دوشنبه کونی بامداد چاغی «زمانهوی قوراللر» بیلن مکتب ایچیگه کیریب و قوریقچیلر بیلن قوراللی توقنشوودن کېین، قیزلرنی یاتاقخانهدن چیقریب آلیب کیتیشگن.
قوراللی هجومچیلر و مکتب قوریقچیلری اورتهسیده توقنشوو دوامیده، بیر کیشی یرهلنیب و بیر کیشی هلاک بولگن.
امنیتی رسمیلر گه کوره، کېنگ قمراولی قیدیرو-قوتقرو عملیاتی باشلنگن و خوفسیزلیک کوچلری احتمالی قاچیش یوللری همده حدود اطرافیدهگی اورمانلرده اوغیرلاوچیلر و اوقووچیلرنی قیدیرماقده.
بو حادثه دانکو-واسگو منطقهسی و ماگا شهریده یوز بیرگن؛ سۉنگی ییللرده بو حدود ده قوراللی قراقچیلر تورلی نرسهلردن باج آلیش اوچون آدم اوغیرللیکه یوز کیلتیرگن. حاضرگچه هېچ بیر گروه بو مکتب گه قیلینگن هجوم اوچون مسئولیتنی اوز زمهسیگه آلمهگن و هجومچیلرنینگ مقصدی هم نامعلوم.
نایجریا، سۉنگی بیر دههده مملکت شمالی حدودلریده کېنگ کولملی آدم اوغیرلش بیلن روپهره بولگن. میلادی ۲۰۱۴-ییلدن حاضرگچه کمیده بیرمینگ ۵۰۰ نفر اوقووچی اوغیرلنگن. قوراللی گروهلر، آدم اوغیرلشنی درآمد منبعی و نظارتی سُست بولگن قیشلاقلرنی باشقریش یولی صفتیده کوریشماقده.
