غور ده ییگیتلردن قطاری اوشبو ولایت مرغاب و چهارسده تومنلریده سوو تاشقینلردن زیان کورگنلر گه یاردم توپلش مقصد، نیچه کونلیک بیر کمپاین نی یولگه قوییگنلر. مذکور ییگیتلر اوشبو ولایت نینگ مرکزی تورتیولیگه چادر قوریب، اهالی، سوداگرلر و یاردم بیرووچی نهادلردن غور ولایتیده یوز بیرگن سونگی سوو تاشقینلردن زیان کورگنلر گه یاردم بیریلیشی نی ایستهگنلر.
مذکور ییگیتلردن بیری حمیدالله ژواک نینگ ایتیشیچه: «اوشبو چادر نینگ قورگنیمیزدن مقصد، مرغاب و باشقه تومنلردهگی سوو تاشقینلردن جدی شکلده زیان کورگنلر گه یاردم توپلش دیر.»
بو ییگیتلردن باشقه بیری شمسالحق موحد نینگ ایتیشیچه: «فیروزکوه اهالیسی، باشقه تومنلر اهالیسی و بو ییرده فعالیت قیلهدیگن موسسهلر اولر گه یاردم بیرسینلر. هر قندهی یاردم جملهدن نقدی پول، فرش، ایدیش و اهالی نینگ توانی بولگن گه قدر هر نرسه بولسه توپلهیمیز و انشاءالله تیزلیککه مرغاب تومنیدهگی زیان کورگن یشاوچیلر گه ییتیشتیرهمیز.»
شونینگدیک ییگیتلردن باشقه بیر قطاری نینگ ایتیشلریچه، اوشبو ولایت نینگ مرغاب و چهارسده تومنلریده یوز بیرگن سوو تاشقینلر یوزلب عایله نی اویسیز قیلگن و مذکور عایلهلر حاضر ایسه باشپنهسیز و امکانیتسیز شکلده، آچیق هواده حیات کیچیرماقدهلر.
بیزلرنینگ فیسبوک صحیفهمیزگه باش اورینگ!
اوشبو ییگیتلردن بیری عبدالبصیر یزدان نینگ ایتیشیچه: «هر قیشلاقده ۱۰ ته، ۵۰ ته و ۷۰ ته یشش اوی ویران بولگن و اهالی نینگ برچه وسیلهلری بیلن امکانیتلری اویلرده قالیب و سوو تاشقینلر آستیده قالگن.»
شونینگدیک مذکور ییگیتلردن باشقه بیری محمدصادق رصاص نینگ ایتیشیچه: «عایلهلردن بیر قطاری نینگ اویلری مکمل شکلده ویران بولگن، عایلهلر نرسهلری نی قولدن بیرگنلر و برچه نرسهلری سوو تاشقینی آستیده قالگن. انه شوو اساس اولر یاردم گه نیازلری بار و معلوماتیم گه قدر اولر سوو، آزیق-آوقت، کییم و دارو قیینچیلیگی بیلن روپهرهلر و ساغلیقنی سقلش ریاستی نینگ قیلگن سعیوحرکتی ییترلی ایمس.»
غور ده یوز بیرگن سونگی سوو تاشقینلر تلفاتی و زیانلری خصوصیده اوشبو ولایت محلی مسئوللری نینگ فکری نی آلیش ایستهدیک؛ لیکن اولر سوو تاشقینلردهگی زیانلر و تلفات آماری نینگ انیق بولمهگنی سبب، صحبت قیلمهگنلر.
لیکن غور یشاوچیلری نینگ ایتیشلریچه، اوشبو ولایت مرغاب و چهارسده تومنلریده یوز بیرگن سونگی سوو تاشقینلر عاقبتیده، ۳ کیشی هلاک بولگن. شونینگدیک اونلب باش چاره تلف بولیب، ۵۰۰دن آرتیق یشش اوی و اهالی نینگ باغلری بیلن مینگلرچه جریب ایکینچیلیک ییر ویران بولگن.
بیزلرنینگ «ایکس» ترماغی ده هم تعقیب قیلینگ!
باشقه بیر تاماندن، هرات و بادغیس ولایتلریده محلی مسئوللر نینگ ایتیشلریچه، مذکور ولایتلرده یوز بیرگن سونگی سوو تاشقینلرده ۹ کیشی اولیب و ۳۰۰دن آرتیق یشش اوی ویران و ۵۰۰دن آرتیق چاروه تلف بولگن.