توییب آوقتلنمسلیک طفیلی ینگیلیکده دنیا گه کیلتیرگن تورتینچی بالهسی بستری بولگن نوریه، عایلهسینینگ یامان اقتصادی وضعیتینی بیان قیلهدی. اونینگ سلاموطندار گه ایتیشیچه، اقتصادی قیینچیلیکلر و حاملهدارلیک چاغیده درست آوقتلنه آلمسلیگی سبب، چقهلاغی توییب آوقتلنمهی و اوزینینگ ساغلیق وضعیتی هم اونچهلیک یخشی ایمس.
اونینگ کوپهیتیریشیچه: «اقتصادی وضعیتیمیز اونچهلیک یخشی ایمس؛ چقهلاغیم ینگیلیکده دنیا گه کیلگن، توییب آوقتلنمهگن و نیچه کوندن بیری بستری دیر؛ شفاکارلر گه کوره، نیچه کون بستری بولیشی کیرهک. اوزیم هم دایم کسلمین. شفاکارلر کوپ ضعیف بولگنسین و یخشیراق آوقتلنیشینگ کیرهک دیهدیلر. باشقه هم اوچ بالهم بار. اقتصادی وضعیتیمیز کوپ ضعیف دیر.»
بیزلرنینگ «ایکس» ترماغی ده هم تعقیب قیلینگ!
کسلدارلردن نرگسنینگ ایتیشیچه، حاملهدار آنهلرنینگ درست آوقتلنیشی توغریسیده عایلهلر اقتصادی اونچهلیک یخشی ایمس و کمبغللیک سبب حاملهدار آنهلر بیلن چقهلاقلری تورلیخیل کسللیکلرگه چلینهدیلر.
اونینگ کوپهیتیریشیچه: «اوزی حاضرگچه جسمی نقطهی نظریدن کوپ ضعیف دیر، شفاکارلرنینگ توصیه قیلهدیگن مادهلر و آوقتلر اینیقسه اوشبو قیین اقتصادی وضعیتده محروم منطقهلرده تامین قیلیش کوپ قیین دیر. عایلهلردن کوپ قطاری حاملهدار عیاللرگه گوشت، سوت محصولاتی و میوهنی تیارلش گه کوچی ییتیشمهیدی. حاملهدارلر عیاللردن کوپ قطاری توییب آوقتلنمسلیکدن اذیت چیکهدی. کسلخانهلر و ساغلیق مرکزلرگه بارگنیمیزده توییب آوقتلنمسلیک سبب بستری بولگن کوپینچه بالهنی کورهمیز؛ حتا آنهلری هم قان کملیگی، ضعیفلیک و ویتامینلر کملیگی بیلن روپهرهلر.»
باشقه بیر تامادن، غزنی ده شفاکارلردن محمداشرف صاحبزاده، حاملهدار عیاللرنینگ آوقتلنیشی فایدهسیگه تاکید قیلیب و ایتیشیچه: «اساسی آوقتلر اونملی دیر؛ انرژی بیرهدیگن مادهلر بیلن توله آوقتلر، یعنی کاربوهایدیریتلر، پروتینلر، شحملر و یانیده منراللر و ویتامینلر کبی یاردم بیرووچی فکتورلر که، اولرنینگ آلینیشی کیرهک. بولر حامله بیر عیال اوچون کیرهکلی دیر. بیزلر بیر کونده اوچ مرته ایرتنگ، پیشین و آخشم آوقت ییهمیز؛ لیکن حامله بیر عیال اوندن کوپراق آوقت ییشی کیرهک، حد اقل بیر کونده بیر-ایکی مراتبه کوپراق آوقت ییشی کیرهک.»
غزنی ده روانشناسلردن خیالمحمد افغاننینگ ایتیشیچه، کمبغللیک حامله بیر عیالده استرس، تشویش و خواطرلر گه سبب بولهدی و بو روحی تشویشلر آنه و جنیننینگ جسمی ساغلیگیگه سلبی تاثیر قویهدی.
اونینگ کوپهیتیریشیچه: «قشاقلیکنینگ حاملهدار بیر آنه و چقهلاغیگه جدی تاثیری بار. توغیلیش چاغیده وزنی کم بولهدی و فیزیکی رشدی هم قیینچیلیککه روپهره بولهدی. جسمی نقطهی نظریدن هم ضعیف بولهدی. باشقه بیر تاماندن، کمبغللیک آنهنینگ استرس و روحی باسیملر بیلن روپهره بولیشیگه سبب بولهدی که بو ازی آنهنینگ تنیده هورمونی اوزگریشلری و جنیننینگ روحی و عصبی رشدیگه سلبی تاثیر قویهدی. شونینگدیک چقهلاقنینگ وقتدن آلدین توغیلیشیگه سبب بولهدی.»
شوندهی بیرحالده، بالهلر و چقهلاقلر بولیمی متخصصی نقیبالله کاموی، حاملهدار عیاللرنینگ ساغلام آوقتلنیشی اهمیتیگه تاکیدلب و آگاهلنتیریشیچه، حامله عیال اوچون ییترلی و درست آوقتلنمسلیک، آنه و جنین گه خطرلی و یامان عاقبتلرگه ایگه بولیشی ممکن.
بیزلرنینگ فیسبوک صحیفهمیزگه باش اورینگ!
اونینگ ایتیشیچه: «حامله عیال گه ییترلی آوقت ییتیشمهگنی صورتده، یامان عاقبتلرگه سبب بولهدی، اینیقسه قشاقلیک و قویی اقتصاد بیلن روپهره بولگن جمعیتیمیزده. حاملهدار عیاللر یانیده درست آوقتلنمسلیک، چقهلاغینینگ ضایع بولیشی، سقط بولیشی، پریماچور یعنی خام دنیا گه کیلیشی و خام دنیا گه کیلگنیده کوپینچه کسللیکلردن تاثیرلنهدی و شونینگدیک اوز-اوزیگه سقط بولیشلرگه باعث بولهدی. آنهسی حاملهدارلیک چاغیده ساغلام آوقتلنگن چقهلاق بو کسللیکلر آلدینی آله آلادی.»
ایتیش کیرهک که، افغانستان ده ایش زمینهلری یوقلیگی و حکومتلرنینگ برنامهسیزلیگی سبب، مملکتدهگی عایلهلردن قطاری اقتصادی قیینچیلیکلر بیلن روپهره بولگنلر. بو قیینچیلیکلر حیاتنینگ باشقه بولیملری یانیده، عایلهلرنینگ ساغلیگی توغریسیده هم یامان تاثیرلرنی قویگن.
