کابل ده بیر عیال سمارق ییتیشتیریش فارمینی آچیش بیلن اونلب عیالگه ایش زمینهسینی یرهتگن. ایکی ییل آلدین کابل ده سمارق ییتیشتیریش فارمینی آچگن فاضله سروشنینگ ایتیشیچه، آز سرمایه بیلن باشلهگنی اوشبو ایش، حاضر اوزی و باشقه بیر قطار عیال اوچون درآمد منبعسیگه اَیلنگن.
سروش، سمارق ییتیشتیریش ایشلریگه قیزیققنی سبب بو ایشگه باشلهگنینی بیان قیلیب و کوپهیتیریشیچه: «بو ایشگه باشلهگنیمدن ایکی ییل بولماقده. سمارق ییتیشتیریش ایشلریگه قیزیقر ایدیم، لیکن قندهی باشلشنی بیلمهیدیم. ایکی آی تدقیق قیلدیم و کیین ایکی مینگ افغانی بیلن فارم آچدیم.»
اونگه کوره، ایشگه باشلهگنیدن کیین بیرینچی تجربهسینینگ یخشی نتیجه بیرگنی، کتهراق فارم آچیش و سمارق اوروغینینگ ساتیب آلیشیگه سبب بولگن. «یخشی حاصل قولگه کیلتیرگنیمده، بو ایشگه قیزیققنیم اوچون باشقه بیر عیال بیلن بیرگه اونینگ اوییده ایکینچی فارمنی کتهراق توزتدیک. شکر یخشی نتیجه هم بیردی.»
اونینگ ایتیشیچه، بو فارمنی آچیش نهفقط اونینگ خودکفالیگی، بلکیم باشقه بیر قطار عیالگه بیش ولایتده ایش و اورگهنیش زمینهسینی یرهتگن. «ایکینچی فارمنی آچگنیمده، قریب ۵۰۰ عیال گه ایش اورگتدیم و سمارق اوروغینی صادر قیلیشگه باشلهدیم. شونینگدیک عیاللرگه اوز اویلریده سمارق فارمینینگ توزهتیشلرینی توصیه قیلدیم. حاضر شکر هرات، غور، لغمان، پکتیا، بلخ و لوگر کبی ولایتلرده فارم آچیب و سمارق اوروغینی آلیب کیتهدیلر.»
گرچند بو ایش فاضله سروش اوچون امید و موفقیت بیلن بیرگه بولسهده، بیراق مناسب ییر کملیگی، منظم ساتیش بازار، پاکتلنیش امکانیتی و دولتی نهادلرنینگ قوللب-قوتلشی یوقلیگی، تدبیرکار عیاللر برابریدهگی قیینچیلیکلردن حسابلنهدی. مذکور عیالنینگ ایتیشیچه: «ییر کملیگی بیلن روپهره بولگن ایدیم. بو توغریده ایکینچیلیک وزیرلیک آرقهلی همکارلیک بولیشینی کوتیب تورگن ایدیم.»
بو بولیمده فعالیت قیلیب و کابل ده سمارق فارمینی آچگن منیژه صافی، روپهره بولگن قیینچیلیکلری توغریسیده ایتیشیچه: «ساتیش بازار و پاکتلنیش بولیمی یوق. حاضرگچه هیچ بیر دولتی یا-ده نادولتی نهاد آرقهلی حمایت و همکارلیک بولمهگن.»
شوندهی بیرحالده، جوزجان ده سمارق ییتیشتیریش بولیمیده فعالیت قیلهدیگن حوریه احمدی، فاضله سروش همکارلیگی بیلن بو ایشده یخشی نتیجه آلگنینی بیان قیلیب و ایتیشیچه: «قیش موسومیده سمارق فارمینی آچیدیم و یخشی نتیجه بیردی. موفق بولگنیم اوچون جودهیم خورسندمین. باشده امتحانی شکلده باشلهدیم و بانو سروشنینگ آنلاین شکلده رهنمالیک قیلگنی بیلن یخشی نتیجه آلدیم.»
شونینگدیک بغلان یشاوچیسی و سمارق فارمی بولگن حمیده صدیقینینگ ایتیشیچه: «قریب ۲۰۰۰ افغانی بیلن بو ایشگه باشلهدیم و حاضر ۷ فارمیم بار. بو ایش نهفقط اوزیم بلکیم باشقه نیچه عیال گه فایدهلی بولدی که اولر هم سمارقدن فایدهلنهدیلر همده ساتهدیلر.»
بو توغریده عیال حقوقی فعاللریدن هویدا حدیثنینگ ایتیشیچه، بو کبی ایشلر رواجلنیشی عیاللر ایشسیزلیگی کمهیشیده مهم اورینگه ایگه بوله آلهدی. او حکومتدن بو توغریده عیاللرنینگ قوللب-قوتلنیشینی ایستهب و کوپهیتیریشیچه: «سمارف ایکیلیشیده عیاللر فعالیتی عیاللر اقتصادی رواجلنیشیگه یاردم بیرهدی و زراعت بولیمیده اولر اورنینی کوچهیتیرهدی. فارملرده عیاللر حضوری کوچهیشی اوچون زراعت وزیرلیگی نهادلری اولرگه یاردم بیریب و اولرگه زراعت اوچون مناسب جای تاپیشی کیرهک.»
شوندهی بیرحالده، اقتصادی ایش بیلرمان شاکر یعقوبی، زراعت سکتوریده عیاللر اورنینی اساسی دیب و ایتیشیچه، زراعت سکتوریده عیاللر ایشینی قوللب-قوتلش، قشاقلیک کمهیشی و عایلهلر اقتصادی وضعیتی یخشیلنیشیگه سبب بوله آلهدی. «افغانستان زراعتیده عیاللر بیراز اساسی اورینگه ایگه دیر. محصول ایکیش و ییغیم-تیریمدن دستلبکی پروسس و آزیق-آوقتنی سقلشگه قدر، عیاللر اورنینی انکار قیلیب بولمهیدی. قیشلاقلردن قطاریده اسلی ستون زراعتی تولیدلر دیر و عیاللرنینگ فعال حضوری عایلهلر درآمدی آشیشی و قشاقلیک کمهیشیگه سبب بولهدی. لیکن عیاللر ییر، سرمایه، ساتیش بازار، فنی تعلیملر و زمانهوی تکنالوژی یوقلیگی قیینچیلیکلری بیلن روپهرهلر. دهقان عیاللرگه کیچیک قرضه و منظم بازار زمینهسی یرهتیلگنیده، اولر مملکت اقتصادی رواجلنیشیده فایدهلی حصه قوشه آلهدیلر.»
عیاللرنینگ سمارق فارمی آچیشی و بو بولیمده ایشلشی، اولرنینگ آز سرمایه و شخصی سعیوحرکت بیلن باشقه عیاللرگه ایش زمینهسینینگ یرهته آلیشینی کورستهدی؛ لیکن حمایت و ساتیش بازار یوقلیگی قیینچیلیکلری، اوشبو عیاللر برابریدهگی جدی معمالردن حسابلنهدی.
