جمعیتده عیاللردن کوپ قطارینینگ فعالیتی کوپراق قول صناعتی و تیکووچیلیککه چیکلنگنی بیرحالده، قیشلاقلیک یاش قیز عیاللرنینگ تکنالوژی ساحهسیده هم موفقیتگه ایریشه آلیشینی نمایش گه قویگن. بلخ یشاوچیسی و کمپیوترساینس بولیمیده تحصیل قیلگن ۲۵ یاشر آمنه امیری، ایشلاوچیلیک ایمس، بلکیم تدبیرکارلیک آرزوسی بیلن فرقلی بیر یولنی تنلهگن. آمنهنینگ ایتیشیچه، مکتب و بیلیم یورتگه باریش پیتدن، دولتی ایش یا-ده میز آرقهسیده اولتیریب ایشلشگه قیزیقمس ایکن.
اونینگ اوچون تحصیل امکانیتلردن بیری ایکن، نه برچه نرسه. لیکن بو یولنینگ اصلی حکایهسی تکنالوژی ساحهسیده فعالیت قیلهدیگن هراتلیک نیچه عیالنینگ ویدیوسینی کورگنی پیت باشلهگن. «اولرنی کوردیم که موبایل و کمپیوتر بولیمیده مهارت بیلن ایش قیلهر ایدیلر. اوشه پیت مین هم بو ایشنی قیله آلهمن دیب قیزیقدیم. مین دایم قیزلر آرهسیده فرقلی بیر ایشنی قیلماقچین ایدیم.»
بیزلرنینگ فیسبوک صحیفهمیزگه باش اورینگ!
بیراق بو یولگه باریش اونچهلیک قولی ایمس ایدی. او، بیر قیز صفتیده کوپینچه اجتماعی، فرهنگی و فنی قیینچیلیکلر بیلن روپهره بولگن. اونینگ اینگ بویوک خواطری، عیاللرگه عاید بازارگه قول تاپیشنینگ چیکلنیشی دیر. اونینگ ایتیشیچه: «بو بازار یاپیلگنی صورتده، باشقه ایش قیله آلمهیمن. یالغیز امیدیم اوشبو کیچیک جای دیر.»
مذکور عیال، کوپ آز امکانیت – نیازی بولگن نرسهدن یالغیز بیش فایزی – بیلن ایشینی کیچیک بیر غرفهدن باشلهگن. بوگون ایسه امکانیتلری ۲۰ فایزگه ییتیشیب، موبایل و کمپیوتر ترمیملش گه شغلنگن باشقه نیچه قیزنینگ همکارلیگی بیلن نسبتاً جهازلنگن بیر دکان ایگهسی بولگن.
شوندهی بیرحالده، آمنه حاضرگچه جهازلر کملیگی بیلن روپهره دیر. موبایل اوچون تورلیخیل بکسلر کبی تخصصی اوسکونهلر یوقلیگی، درآمدی کوپهیشی و ایشینینگ صفتی آشیشی برابریده توسیق بولگن؛ بیراق اونگه کوره: «ستندرد جهازلر تامینلنگنی صورتده، آیده ۵۰ مینگ افغانی درآمد قولگه کیلتیره آلهمن.»
آمنه، نه فقط اوزی، بلکیم باشقه قیزلرگه هم موفقیتلیکنی آرزو قیلهدی. «هم اوزیم و همده باشقه قیزلر اوچون ظرفیتسازلیکنی ایستهیمن. تعلیم کورگنیمیز صورتده، ایشیمیز یخشی بولهدی؛ بیراق قیغو بیلن بو بولیمگه موسسهلر اونچهلیک توجه قیلمهیدیلر و اولر کوپراق تیکووچیلیککه اعتبار قرهتهدیلر.»
بیزلرنینگ «ایکس» ترماغی ده هم تعقیب قیلینگ!
او حاضر ایسه، عیاللرنینگ تکنالوژی ساحهلریده هم فعالیت قیله آلیشلریگه ایشانهدیگن قیزلر اوچون بیر الگو دیر. آمنه بوگون گه قرهگنده کیلهجگینی کوپ آیدین کورهدی. «کیلهسی ۱۰ ییلگچه بیر برند گه ایگه بولیشنی ایستهیمن؛ افغانستان بویلب فعالیت قیلهدیگن بیر مرکز بولسه که قیزلر تکنالوژینینگ تورلی بولیملریده ایشلسهلر و اوز ایاغلریده توختسهلر.»
آمنه امیری، افغانستانلیک قیزلرنینگ ینگی نسلی نمادی دیر که، سنتی تیزیمنینگ بیر قسمی بولیب قالیش ایمس، بلکیم اونی اوزگرتیریش ایستهیدیلر. اونینگ سعیوحرکتی قوللب-قوتلنیش، جهازلر و ایشانچ گه نیازی بار. اونگه کوره، کیلهجک اوزی قورهدیگن اورین دیر، اونگه آلدیندن تعیینلنگن نرسه ایمس.
