هلمند محلی مسئوللری بو ولایتده ماین پارتله‌شی عاقبتیده ۵ کیشی نینگ جان بیرگنیدن خبر بیرگن. هلمند حاکمی سوزلاوچیسی عمر زواک نینگ ایتیشیچه، مذکور حادثه بوگون (جمعه ۱۳- حمل) ایرته‌لب تینچ‌اهالی مینیلگن بیر موتر یول چیککه‌سیده جایلشتیریلگن ماین گه دوچ کیلیشی بیلن مذکور ولایت مرکزی لشکرگاه شهریده یوزبیرگن.
اونگه کوره، بو پارتلش ده ۵ تینچ‌اهالی جان بیرگن.
شونده‌ی بیرحالده، هرات ده یوزبیرگن بیر پارتلش ده ۷ عیال تن جراحتی کوتارگن.
هرات حاکمی سوزلاوچیسی جیلانی فرهاد نینگ ایتیشیچه، بوگون ایرته‌لب تینچ‌اهالی مینیلگن فلانکوچ تیپلی بیر موتر مذکور ولایت نینگ کشک کهنه تومنیده یول چیککه‌سیده جایلشتیریلگن ماین گه دوچ کیلگن کیم نتیجه‌ده، ۷ عیال تن جراحتی کوتارگن.
مذکور حادثه یره‌دارلریدن ۳ ته‌سی نینگ ساغلیک وضعیتی یمان دییلگن. جناب فرهاد گه کوره، بو ماین طالبان گروهی آرقه‌لی ییرلشتیریلگن ایکن. طالبان حاضرگچه بو توغریده فکر بیلدیرمه‌گن.
مذکور پارتلش‌لر مسئولیتی نی حاضرگچه بیرار گروه یا-ده شخص بوینیگه آلمه‌گن.
