فاریاب یشاوچیلریدن قطاری نینگ ایتیشلریچه، ایش‌سیزلیک‌دن زیریکیب و کوپینچه قیین‌چیلیک بیلن روپه‌ره بولگنلر. مذکور ولایت‌ده‌گی ایشچیلر نینگ ایتیشلریچه، هر کون ایرتنگ چاغی ایش تاپیب و باله‌لری گه بیر لقمه نان آلیب باریش اوچون شهر نینگ چهارراهه‌لری گه باره‌دیلر؛ بیراق کوپینچه کون بوش قول بیلن اوی گه قیته‌دیلر.
فاریاب ولایتی مرکزی میمنه شهری یشاوچیسی و سکیز کیشی‌لیک عایله سرپرستی بولمیش ۳۷ یاشر نجیب‌الله نینگ ایتیشیچه، اقتصادی قیین‌چیلیک‌لر بیلن روپه‌ره بولگنی سبب، عایله خره‌جتی نی تامین‌لش اوچون ایشچی‌لیککه مجبور دیر. اونینگ کوپه‌یتیریشیچه: «بیر لقمه نان تاپیش اوچون هر ایش بولسه مجبور‌میز که انجام بیرسه‌ی. ایشچی نینگ کونده‌لیک مزدی ۳۰۰ افغانی دیر، کسبه‌کار ۷۰۰-۸۰۰ افغانی آله‌دی. بیر کون ایش بولسه، باشقه کون ایش یوق.»
بیزلرنینگ «ایکس» ترماغی ده هم تعقیب قیلینگ!
شونینگدیک فاریاب ولایتی‌ده‌گی ایشچی ییگیت‌لردن باشقه بیری سلطان احمد ایش یوقلیگی‌دن خواطر بیلدیریب ایتیشیچه، اوشبو ولایت‌ده ییگیت‌لردن کوپینچه‌سی، ایش‌سیزلیک سبب، تحصیل نی ترک قیلیب و قوشنی مملکت‌لر گه مهاجرت قیلگنلر. اونینگ کوپه‌یتیریشیچه: «عایله سرپرستی‌مین، آته‌م کیکسه و ایشلمه‌یدی. عایله‌ده سکیز کیشی‌میز، بیراق بیر کون ایش بار و بیر کون ایش یوق. ۲۵۰-۳۰۰ افغانی ایشچی‌لیک پولی دیر. درس و تعلیم نی ترک قیلدیم.»
فاریاب یشاوچیلری، سرپرست حکومت‌دن ایش‌خانه‌لر فعال بولیشی و آستقورمه پروژه‌لر یولگه قوییلیشی و شونینگدیک مملکت‌ده سرمایه یاتقیزیلیش اوچون ملی سوداگرلر نینگ تشویق قیلیش بیلن، اولر گه ایش زمینه‌سی یره‌تیلیشی نی ایسته‌گنلر.
شونده‌‌ی بیرحالده، فاریاب ایش و اجتماعی ایشلر ریاستی مسئوللری نینگ ایتیشلریچه، اوشبو ولایت یشاوچیلری اینیقسه ایشچیلر، ییل‌لردن بیری ایش‌سیزلیک قیین‌چیلیگی بیلن روپه‌ره بولیب و اولردن کوپینچه‌سی ایشلماق اوچون باشقه مملکت‌لر گه مهاجرت قیلگنلر.
بیزلرنینگ فیسبوک صحیفه‌میزگه باش اورینگ!
فاریاب ایش و اجتماعی ایشلر رئیسی ریحان‌الدین متوکل نینگ ایتیشیچه، اوشبو ولایت یشاوچیلری گه ایش زمینه‌سی نی یره‌تیش اوچون سعی و حرکت نینگ دوامی بار. اونینگ اورغولشیچه، ایش و اجتماعی ایشلر وزیرلیگی اقتصاد وزیرلیگی بیلن هماهنگ‌لیک‌ده، مملکت‌‌ده‌‌گی یشاوچیلر گه ایش زمینه‌سی یره‌تیلیشی اوچون ینگی ییچیم یول‌لر نی قولگه آلگنلر. اونینگ کوپه‌یتیریشیچه: «بو قیین‌چیلیک نی تیگیشلی اداره‌لر مسئوللری بیلن جریان گه قویه‌میز که اقتصادی قیین‌چیلیگی بولگن کیشی‌لر گه ایش زمینه‌سی یره‌تیلسین. ان‌شاءالله حکومت تامانیدن کان‌لر قازیب چیقریلیش ایشی باشلنیشی بیلن، اهالی نینگ اقتصادی قیین‌چیلیگی‌دن بیر قطاری نینگ حل بولیشی ممکن.»
عین حالده، افغانستان ده سیاسی اوزگریشلر و دنیا جماعه نینگ یاردم‌لری کمه‌یشیدن کیین، مملکت‌ده ایش‌سیزلیک و قشاق‌لیک کوپه‌یگن. شونینگدیک بیرلشگن ملت‌لر تشکیلاتی ینگی گزارشی‌ده، افغانستان ده قشاق‌لیک کوپه‌یگنی خصوصیده خواطر بیلدیرگن.
