کابلده اوتگن هفتهنینگ چهارشنبه کونی آچیلگن تورت کونلیک ایکینیچلیک محصولاتلری کورگزمهسی، ۱۲-میزان، شنبه کونی یکونلندی.
کورگزمه اشتراکچیلرینینگ ایریملری اونینگ اوتکزیلیشینی اۉز تجارتلرینی رواجلنتیریش اوچون فایدهلی دیب بهالشهدی.
آزیق-آوقت بولیمیده «سنبل سلیقه مادر» کمپنیه مسئولی ناجیه سلطانی شوندهی دیېدی: «جوده هم فایدهلی بولدی چونکه آدملر ایچکی محصولاتلر حقیده یېترلیچه معلومات گه ایگه اېمسلر. بو تدبیرنینگ فایدهسی شونده بولدی کی کوپلب عایلهلر بو ییرگه کیلیشدی و بیز یخشی سودا قیلدیک.»
عسل ایشلب چیقروچی کمپنیهلردن بیرینینگ مسئولی نصیر احمد، اوشبو کورگزمهده تورت سوداگر تامانیدن صادرات اوچون بویورتمه آلگنینی ایتهدی.
اونگه کوره: «بیز جلالآباد، هلمند، قندهار، بدخشان و کاپیسا ولایتلریدن عسل آلیب کیلدیک بو ییرده ساتیش اوچون. بو جای مارکیتینگ اوچون جوده فایدهلی بولدی و بیز تورت ییریک سوداگردن محصولاتلریمیزنی مملکتدن تشقریگه صادر قیلیش بوییچه بویورتمه آلدیک.»
عیاللر قول صناعتینی کورگزمهده نمایش اېتگن «حیا» کمپنیهسی مسئولی ماریا عظیمی گه کوره، ۳۰ مینگ افغانیلیک اوچ بویورتمه آلگن.
اونینگ ایتیشیچه: «بیز سرکوچی (یاستیق) و باشقه ساحهلرده عمومی قیمتی ۳۰ مینگ افغانی بولگن اوچته شرطنامه توزدیک. شونینگدیک، بو کبی کورگزمهلر تیز-تیز اوتکزیلیشینی و محصولاتلریمیزنی خارجده هم ساتیش امکانیتی یرهتیلیشینی اېستهیمیز.»
شو بیلن بیرگه، ایکینچیلیک، سوغاریش و چاروهچیلیک وزیرلیگی مسئوللری، کوزگی ایکینچیلیک محصولاتلری کورگزمهسینی افغانستاننینگ زراعت محصولاتلرینی تنیتیشده ثمرهلی دیب حسابلشهدی.
اوشبو وزیرلیک سۉزلاوچیسی شیرمحمد حاتمی شوندهی دیېدی: «ایکینچیلیک وزیرلیگی زراعت محصولاتلرینی ایشلب چیقریش و اولرنینگ اوسیشینی قۉللب-قوتلش بیلن بیر قطارده، بو محصولاتلر اوچون بازار یرهتیش مقصدیده کورگزمهلر تشکیل ایتهدی. شو مناسبت بیلن، یوزلب سوداگرلر و مینگلب تشریف بویرووچیلر اشتراکیده اوتکزگن ۳۳ کوزگی زراعت کورگزمهسی تورت کون دوام ایتدی.»
ایکینچلیک، سوغاریش و چاروهچیلیک وزیرلیگی مسئوللرینینگ ایتیشیچه، اوشبو کورگزمهده ۲۶۳ ته غرفهده ایکینچیلیک و باغدارچیلیک محصولاتلری، سوت محصولاتلری، ایکینچیلیک اوسکونهلری، دارو اوسیملیکلری، قویاش برق قوریلمهلری همده قول صناعتی بویوملری نمایش اېتیلگن.
