پاکستان و ایران ده افغانستانلیک مهاجرلر گه باسیم‌لر کوپه‌یشی و مذکور ایکی مملکت‌دن مهاجرلر نینگ چیقریلیشی دوامی‌ده، اسلام امیر‌لیگی سوزلاوچیسی ذبیح‌الله مجاهد نینگ ایتیشیچه، حاضرگی قیین‌چیلیک حلی اوچون، ایکی مملکت رسمی‌لری بیلن اوچره‌شوو نی باشله‌گنلر. جناب مجاهد نینگ سلام‌وطندار گه ایتیشیچه: «اسلام امیر‌لیگی ایران و پاکستان ده‌گی مهاجرلر موضوع‌سی نینگ حلی اوچون تورلی‌خیل یوللردن قوللنه‌دی. شونینگدیک تشقی ایشلر وزیرلیگی و مهاجرلر و افغانستان ایلچی‌خانه‌لری یولی آرقه‌لی، ایکی مملکت‌ده‌گی مسئوللر بیلن مهاجرلر نینگ اذیب بولینمه‌سلیگی و مذکور مملکت‌ده‌گی حجت‌سیز مهاجرلر نینگ کلتک‌لنمه‌ی و اذیب بولمه‌ی قیتیشلری خصوصیده صحبت قیلینگن.»
سونگی هفته‌لر پاکستان ده افغانستانلیک مهاجرلر نینگ مذکور مملکت پولیسی آرقه‌لی قولگه آلینیشی کوپه‌یگن و شونینگدیک پاکستان حکومتی هم اوشبو مملکتده حجت‌سیز بولگن ۱ میلیون ۷۰۰ افغانستانلیک مهاجر نینگ اکتبر آیی یکونیگچه افغانستان گه قیته‌ریلیشی نی اعلام قیلگن. پاکستان ده افغانستانلیک مهاجرلردن قطاری، اوشبو مملکت پولیسی تامانیدن اذیت و کلتک‌لنیش خصوصیده شکایت قیلیب و ایتیشلریچه، کون اوتیشی بیلن مهاجرلر برابریده باسیم‌لر کوپه‌یب و اولر هر کون قولگه آلینیش و مملکت‌دن چیقریلیش خوفی بیلن حیات کیچیره‌دیلر.
بیزلرنینگ فیسبوک صحیفه‌میزگه باش اورینگ!
ایکی ییل آلدین پاکستان پایتختی اسلام‌آباد شهری گه مهاجر بولگن افغانستانلیک یشاوچیسی زلمی نینگ ایتیشیچه، افغانستان یشاوچیلری مذکور مملکتده قیین کون‌لر نی اوتکزه‌دیلر. اونینگ کوپه‌یتیریشیچه: «قولگه آلینیشلر کوپه‌یگن؛ قانونی حجتی بولگن کیشی‌لردن قطاری گه، اوی ایگه‌لری تامانیدن اوی‌لری نینگ بوشه‌تیشلری ایتیلگن. قولگه آلینیش خوفی بیلن حیات کیچیره‌میز. حجت‌لریمیز نی تمدید قیلمه‌یدیلر، کیچه و کوندوز نی قیین‌چیلیک بیلن اوتکزه‌میز.»
شونینگدیک ایکی ییل آلدین پاکستان گه مهاجر بولگن افغانستان یشاوچیلریدن باشقه بیری محمدامان نینگ ایتیشیچه: «هر طرف‌دن قیین‌چیلیک بار. مهاجرلردن قطاری نینگ حیات کیچیره‌دیگن منطقه‌لردن کوپینچه‌سیده، مهاجرلر اذیب بوله‌دی، بعضا کلتک‌لنه‌دی. بو قیین‌چیلیک نینگ حل بولمه‌گنی صورت‌ده، پاکستان ده حیات کیچیریش بیزلر اوچون قیین بوله‌دی.»
باشقه بیر تامان‌دن، اسلام‌آباد ده افغانستان ایلچی‌خانه سرپرستی سرداراحمد شکیب، افغانستانلیک مهاجرلر نینگ قولگه آلینیشی و چیقریلیشی اساسیده پاکستان نینگ سونگی قراری نی قیغولی دیب و ایتیشیچه، اوتگن نیچه کون جریانیده، اوشبو مملکت پولیسی تامانیدن ۲۵۰۰ افغانستانلیک مهاجر قولگه آلینگن. اونینگ کوپه‌یتیریشیچه: «بو قیین‌چیلیک نینگ حاضرگچه دوامی بار. بو بیردن آلینگن قرار دیر؛ بیراق بو قرار‌دن کیین هیچ کیم دیپورت بولمه‌گن؛ چونکه اَیری بیر پروسه‌سی بار و دیپورت مرحله‌لری نینگ اوزتکزیلگنی‌دن کیین بوله‌دی. تورخم‌ده بولگن کیشی‌لردن کوپینچه‌سی، اوزلری اولکه گه قیته‌دیلر.»
میزبان مملکت پولیسی تامانیدن باسیم‌لر کوپه‌یگنی و یامان یانده‌شوولردن شکایت قیله‌دیگن، یالغیز پاکستان ده‌گی افغانستانلیک مهاجرلر ایمس؛ بلکیم ایران ده‌گی افغانستانلیک مهاجرلر هم عین وضعیت بیلن روپه‌ره‌لر. ایران ده افغانستانلیک مهاجرلردن قطاری نینگ ایتیشلریچه، سونگی بیر هفته‌ده، مذکور مملکت پولیسی تامانیدن افغانستانلیک مهاجرلر اذیب بولیب و بعضی مورد‌لرده ایسه قولگه آلینه‌دیلر.
ایران نینگ قزون شهری‌ده‌گی افغانستانلیک مهاجرلردن بیری حمیدالله نینگ سلام‌وطندار گه ایتیشیچه، کون اوتیشی بیلن افغانستانلیک مهاجرلر برابریده باسیم‌لر کوپه‌یه‌دی. اونینگ کوپه‌یتیریشیچه: «یامان بیر وضعیت‌ده‌میز، ایران اهالیسی مهاجرلر نینگ اوی‌لری نی آله‌دیلر و برچه افغانستانلیک مهاجر سرک‌لرده قالگن. ایران اهالیسی نینگ ناراضلیک نمایشی حیات نی بیزلر گه قیین قیلگن. حتا تاش و یاغاچ بیلن اوی‌دن چیقره‌دیلر.»
ایران پایتختی تهران گه عایله‌سی بیلن مهاجر بولگن افغانستان یشاوچیسی امرالدین نینگ ایتیشیچه: «ایران ده افغانستانلیک مهاجرلر اوچون وضعیت جوده‌یم بوزیلگن. ایران اهالیسی مهاجرلردن اوزلری گه نان و ایش تاپیش اوچون مملکت‌لریدن چیقیشلری نی ایسته‌یدیلر. اوتگن نیچه کون جریانیده، وضعیت جوده‌یم بوزیلگن، مهاجرلر نینگ اوی‌لریدن چیقره‌دیلر.»
بیزلرنینگ «ایکس» ترماغی ده هم تعقیب قیلینگ!
عین حالده، خلق‌ارا مهاجرت تشکیلاتی و ایزلاوچیلیک ایشلری بوییچه بیرلشگن ملت‌لر تشکیلاتی نینگ عالی کمیساری‌سی، شنبه کونی ۱۵-میزان، قوشمه بیر بیانیه بیلن مملکت‌لردن افغانستانلیک مهاجرلر نینگ زوردن چیقریلیشی توخته‌تیلیشی نی ایسته‌گن. ایکی نهاد نینگ بیانیه‌سیده کیلیشیچه، افغانستان‌لیکلر نینگ زوردن قیته‌ریلیشی، انسانی حقوقی نینگ جدی نفض گه سبب بولیشی ممکن.
مهاجرلر وزیرلیگی نینگ آماری اساسیده، اوتگن آلتی آی‌ده ایران و پاکستان دن، ۵۰۰ مینگ‌دن آرتیق افغانستانلیک مهاجرلر نینگ چیقریلگنی بیرحالده، اوشبو ایکی مملکتده افغانستانلیک مهاجرلر خصوصیده باسیم‌لر کوپه‌یگن. بو آره‌ده، ایران دن جبری شکلده ۲۰۰ مینگ کیشی چیقریلگن و ایکی مملکت‌دن ایسه ۳۰۰ مینگ کیشی اوزلری قیتگنلر.
