قویاش ۱۴۰۴-ییل، ۱۲-عقربده یوز بیرگن زلزلهدن سۉنگ، کوپینچه عایلهلر باشپنهسیز قالگن و اېندی خیمهلر آستیده حیات کیچیرماقده. سمنگان ولایتی فیروزنخچیر تومنیده زلزلهدن جبرلنگن عایلهلر، دستلبکی طبی خذمتلردن فایدهلنه آلمهی و قیش فصلی یېتیب کیلیشی بیلن اولر ساغلیق احواللریدن خواطر بیلدیرماقده.
اولر گه کوره، هوا ساووق بولیشی بیلن، زلزلهدن جبرلنگن عایلهلر اورتهسیده تورلی کسللیکلر کېنگهیگن. فیروزنخچیر تومنی یشاوچیلری، یاردم بیروچی نهادلر و مسئوللر اولرنینگ ساغلیگی اوچون کوپراق دقت قیلیشنی سورهیدیلر.
سمنگان ولایتی فیروزنخچیر تومنی «رحمتآباد» حدودیده زلزلهدن جبرلنگن محمدمنیر شوندهی دیېدی: «فیروزنخچیرده بیر کلینیک بار، او هم اوزاق، کوپ قیینچیلیک بیلن کسللرنی او ییرگه آلیب بارهمیز، کسللر گه یېترلیچه دقت قیلینمهیدی؛ چونکه مراجعت قیلهدیگنلر کوپ و بیر شفاکار برچه قیینچیلیکلر گه یېته آلمهیدی.»
فیروزنخچیر تومنی «رحمتآباد» قیشلاغیده زلزلهدن جبرلنگنلردن باشقه بیری محبالله هم شوندهی دیېدی: «یشاوچیلر اوچون کلینیک کېرهک و اونی یانیده ساغلیق مرکز قوریلسین، کوپینچه یاشلر حیات احتیاجلرینی تأمینلش اوچون چیت ایل اولکهلر گه مهاجر بولهدی، عیاللر و بالهلرنینگ ساغلیگی اوچون یقینده کلینیک قوریلیشی کېرهک.»
شو بیلن بیرگه، «رحمتآباد» قیشلاغیده زلزلهدن جبرلنگنلردن محمدالله و سید رسولنینگ ایتیشلریچه، دولت و خلقارا نهادلر منطقه یشاوچیلرینینگ ساغلیگی اوچون دقت قیلیشی کېرهک؛ چونکه قیش فصلی یېتیب کیلیشی بیلن کسللیک خوفلری اولرنی تهدید قیلیشی ممکن.
محمدالله گه کوره: «نیچه کون آلدین کیلگندیلر، ۱۰-۱۵ کون ایشلهدیلر، بیر-ایکی شفاکار اېدی و طبی خذمت کورسهتیشدی. قیتیب کیتدیلر، باشقه هېچ کیم کیلگنی یوق. فقط شو کلینیک و خصوصی شفاکار بار، کسللرنی اوشه ییرده آلیب بارهمیز.»
سید رسول هم شوندهی دیېدی: «بیر-ایکی تور دارو آلیب کیلیشهدی – یېترلی اېمس. دولتدن کسللرنی دوالش اوچون بیر شفاکار یوباریشنی اېستهیمیز و یشاوچیلر قیینچیلیگینی حل قیلسین؛ چونکه یشاوچیلر کوپینچه قیینچیلیک بیلن دوچ دیر.»
«قوشمحله» فیروزنخچیر تومنیگه قرهشلی حدود – او ییرده ۵۰۰ دن آرتیق عایله یشهیدی و زلزله طفیلی کوپینچه ضرر کوریشگن. اوشبو حدود یشاوچیلریدن بولمیش عبدالاحمد، دستلبکی طبی خذمت کورسهتیلمسلیگیدن نالیدی. اونگه کوره، کوپینچه عایلهلرنینگ بالهلری کسللیکه چلینگن. او شوندهی دیېدی: «زلزله، قیینچیلیگیمیزنی ۱۲۰ فایز کوپهیتیرگن؛ هر ساحهده قیینچیلیگیمیز بار، سوو تقچیلیگی بار و یشش اویلریمیز بوزیلگن. یشاوچیلر اقتصادی قیینچیلیک طفیلی موتردن قوللنه آلمهیدی. عایلهلرنینگ بالهلری تورلی کسللیکه چلینگن، اولرنی دوالش اوچون تومندهگی کلینیک که آلیب باریشهدی.»
شو بیلن بیرگه، فیروزنخچیر تومنی ساغلیق مسئوللری، کسللر گه امکانیتلریگه قرهب خذمت کورسهتماقدهلیکلرینی معلوم قیلهدیلر. فیروزنخچیر تومنی کلینیکیده سوپروایزر عبدالرووف گه کوره، هر کونی ۱۳۰ نفر کسل اوشبو کلینیک که مراجعت قیلیب و دوالنهدی. اونینگ ایتیشیچه: «اورته شکلده هر کونی ۱۲۰-۱۳۰ نفر کسل بو کلینیک که مراجعت قیلیب و دوالنهدی. امکان قدر اولر گه خذمت کورسهتیش اوچون سعی-حرکت قیلهیپمیز، اولرنینگ بو ییرده دوالنیشی ممکن بولسه دوالنهدی؛ عکسحالده اولرنی ولایتی کسلخانه گه یوبارهمیز.»
فیروزنخچیر تومنی محلی مسئوللری، طبی مرکزلر آز و اهالی بو بولیمده تورلی قیینچیلیک بیلن روپهرهلیگینی قبول قیلهدیلر. بیراق اولر، قیشلاق اهالیسی گه طبی خذمت کورسهتیش اوچون کوپینچه سعی-حرکت قیلگن و بو قیینیچیلیکنی یوقاری مرتبهلی رسمیلر بیلن شریک قیلگنلریدن ایشانچ بیلدیرهدیلر.
فیروزنخجیر اولسوالی اورین باسری عبدالمنان اسلمی سلاموطندار گه شوندهی دیېدی: «تومنیمیزده قریب ۴۰ فایز یشاوچیلر قیینچیلیگی طبی بولیمده حل قیلینهدی. بیز بو مسئلهنی ولایت عملدارلری بیلن شریک قیلدیک، اولر مشکلنی ساغلیقنی سقلش وزیرلیگی عملدارلری بیلن شریک قیلگن و قالگن ایشلر اولرگه تیگیشلی دیر.»
فیروزنخچیر تومنی کوپینچه اهالیسی، دستلبکی امکانیتلردن اونچهلیک فایدهلنه آلمهیدی و اولر دولت و خلقارا نهادلردن کوپراق دقت قیلیشلرینی خواهلشهدی.
