۱۲-عقربده یوز بیرگن زلزله نتیجهسیده اویلرینی قولدن بیرگن بلخ ولایتی مارمل تومنیدهگی عایلهلرنینگ ایتیشلریچه، حاضرگچه زلزله قورقووینی اونوتمهگنلری بیرحالده، ییتیب کیلهدیگن قیش موسومی هم اولرنینگ خواطرلنتیرگن.
بلخ ولایتی مارمل تومنیده زلزلهدن جبرلنگنلرنینگ ایتیشلریچه، هیچ بیر نرسهلری بولمهی و باشپنهسیز بولگنلری بیرحالده، قیش موسومی ییتیب کیلماقده. دایمی باشپنه قوریلیشی، آزیق-آوقت و یاقیلغی مادهلر یرهتیلیشی، یخشی دوالنیش خذمتلر کورسهتیلیشی و سوو کملیگی قیینچیلیگی حل بولینیشی، بو یشاوچیلرنینگ اینگ مهم ایستهکلریدن دیر.
بلخ ولایتی مارمل تومنی یشاوچیلریدن بیری ذکریانینگ ایتیشیچه، زلزلهده سوو منبعلری خراب بولیب و حاضر اینگ یقینلریدهگی سوو منبعلریگه باریش اوچون ایکی ساعتگچه یول یوریشلری کیرهک. «بوندن آلدین یوقاریده ذخیره گه باغلنگن پایپلردن سوو آلهر ایدیک، زلزلهده پایپلر یاریلگن و حاضر کونده سوو آلیب کیلیش بیر-ایکی ساعت وقت آلهدی. دولت بیزلرگه یاردم بیرسین؛ سوو ییتیشتیریب بیرسین، اوی قورسین و قیش اوچون یاقیلغی ماده بیرسین. برچه نرسهمیز توپراق آستیده قالگن و بیزلرگه یاردم بیریلیشی کیرهک.»
مارمل تومنی یشاوچیلریدن باشقه بیری رضوان، قیش ییتیب کیلیشی بیلن باشپنهسیزلیکدن خواطر بیلدیریب و ایتیشیچه، اویلری قوریلیشی و قیته قوریلیشی اوچون یاردم بیریلمهگن. «بوندن آلدین هم مارمل تومنی اهالیسی کمبغل ایدی؛ زلزله هم اهالیگه کوپینچه زیان ییتیشتیرگن. اویلردن کوپ قطاری زیان کورگن و حاضرگچه درست یاردم هم بیریلمهگن. قیش هم ییتیب کیلماقده.»
شونینگدیک بو تومن یشاوچیلریدن ینه بیری موالدیننینگ ایتیشیچه، زلزلهدن جبرلنگنلر قیین بیر وضعیتده قالیب و تیزلیککه یاردم بیریلیشگه نیازلری بار. «سونگی زلزلهدن جبرلنگن اهالینینگ اینگ اساسی نیازی باشپنه و شونینگدیک حیات کیچیریشلری اوچون آزیق-آوقت، ایسیق کییم، دارو و باشقه نرسهلرگه نیاز بار که اولرگه ترقهتیلیشی کیرهک.»
رسمی معلوماتلر اساسیده، مملکت شمالیده یوز بیرگن زلزلهده مارمل تومنیده ۱۴۶ یشش اوی بوزیلگن. شونینگدیک مذکور تومندهگی محلی مسئوللر، زلزلهدن جبرلنگنلر و نیازمندلرگه بیر قطار نهادلر آرقهلی نقد پول، آزیق-آوقت و بیر قطار نرسه ترقهتیلگنینی تصدیقلب، بیراق ایتیشلریچه، اوشبو یاردملر ییترلی بولمهی و جبرلنگلرنینگ قوللب-قوتلش بوییچه برنامهلرنینگ کوپهیشیگه نیاز بار.
بلخ ولایتی مارمل تومنینینگ قیشلاقلر بوییچه مدیری حبیبالرحمان حبیبنینگ ایتیشیچه: «بو ییرده نیچه اداره یاردم بیرگن، بیراق ییترلی بولمهگن. خلقارا آزیق-آوقت دستوری و اچاچ ۲۵ عایله گه ۱۱ مینگ ۱۸۰ افغانی ترقهتگن، باشقه بیر قطار ادارهلر هم آزیق-آوقت، خیمه، کمپل و ساغلیق کیتلرنی ترقهتدی و باشقه نرسه ترقهتیلمهگن.»
افغانستان شمالیده ۱۲-عقرب یوز بیرگن زلزله نتیجهسیده، سمنگان، بلخ، سرپل و قندوز ده مینگلرچه یشش اوی بوزیلگن و شونینگدیک ۲۷ کیشی اولیب و بیر مینگدن آرتیق کیشی یرهلنگن. یشش اویلرنینگ بوزیلگنی مینگلب کیشینینگ جبرلنیش وضعیتده قوییب و قیش موسومی ییتیب کیلیشی، اونینگ کوپهیشیگه سبب بولهدی.
