حاملهدارلیک دیابتی (شکر کسللیگی)، حاملهدارلیک دورهسیده قانشکرینینگ آشیشی آرقهلی انیقلنهدیگن دیابت توری دیر. نسایی ولادی شفاکارلریدن قطارینینگ ایتیشلریچه، حاملهدارلیک دیابتی، حاملهدارلیک دورهسینینگ جیم کسللیکلریدن بیری بولیب، بعضا بیللی و بعضا ایسه نابیللی علایملر بیلن آنه همده جنیننینگ ساغلیگینی خوف آستیده قویه آلهدی.
مذکور شفاکارلرگه کوره، گرچند بو تور دیابت، کوپراق چقهلاقنینگ توغیلیشیدن کیین اورتهدن کیتهدی، بیراق انیقلنمهی و وقتیده دوالنمهگنی صورتده، چقهلاقنینگ قیین دنیا گه کیلیشی، چقهلاق وزنینینگ طبیعی بولمسلیگی یا-ده کیلهجکده آنهنینگ ۲-تور دیابتگه چلینیشیگه سبب بوله آلهدی.
بیزلرنینگ «ایکس» ترماغی ده هم تعقیب قیلینگ!
نسایی ولادی شفاکارلریدن زرغوانه محبتنینگ ایتیشیچه، مراجعت قیلهدیگن حاملهدار عیاللردن ۲۵-۳۰ فایزی، حاملهدارلیک دیابتیگه چلینگن. او، توغیش جریانی یا-ده توغیشدن آلدین چقهلاقنینگ قولدن بیریش، سیمیزلیک و یوقاری فشارنینگ حاملهدارلیک دیابتی عاقبتلریدن عنوان قیلیب و کوپهیتیریشیچه: «حاملهدارلیک دیابتینی انیقلش اوچون آچ قارینگه اوتکزیلهدیگن قان تستی (FBC) توصیه بولهدی. شونینگدیک HBVC تستی اوتگن اوچ آیدهگی قان شکری سطحینی کورستهدی و باشقه بیر تست ایسه گلوکوز چلنج دیر که حاملهدار آنهنینگ کسللیگی انیقلنیشی اوچون فایدهلنیلهدی. حاملهدارلیک شکری کوپراق ۲۴-۲۸ هفتهلرده انیقلنهدی و انیقلنیشدن کیین دوالنیشی ممکن.»
باشقه بیرتاماندن، نسایی ولادی شفاکارلریدن باشقه بیری ساره یعقوبی، حاملهدارلیک دیابتینی ارثی بیر کسللیک دیب و ایتیشیچه، بو کسللیککه حاملهدار عیاللرنینگ چلینیش عامللری آنه یاشینینگ ۲۵ دن یوقاری بولگنی، عایله اعضاسیده شکر کسللیگی بولگنی، آنهنینگ آلدینگی حاملهدارلیگیده حاملهدارلیک دیابتی بولگنی، پلی کیستیک بچهدان سندرومی (PCOS) و فشارنینگ یوقارلیگی دیر.
یعقوبی، حاملهدارلیک دیابتی آلدی آلینیشی و کنترول بولیشی اوچون مناسب آوقتلنیش توغریسیده ایتیشیچه: «شفاکارلر توصیهسی اساسیده، تورلی کاربوهایدریتلر، ییترلی پروتین، میوه و سبزهواتدن فایدهلنیش، ناساغلام یاغلیقلر و شیرینلیکلرنینگ کمهیتیریش و فزیکی فعالیت قیلیش، بو کسللیک خوفینینگ کمهیتیریشده فایدهلی دیر.»
شوندهی بیرحالده، ایکینچی حاملهدارلیگیده حاملهدارلیک دیابتیگه چلینگن اوچ باله آنهسی بولمیش قندوز ولایتی یشاوچیسی۳۰ یاشر سبزینهگه کوره: «اوچینچی آیده شکریم بارلیگینی بیلدیم. حاملهدارلیکدن آلدین بو کسللیگیم یوق ایدی، لیکن حاملهدارلیک دورهسیده فشار یوقاریلیگی و نفس قیسیشگه چلیندیم. میوه و نان ایهسیم کیلمس ایدی و فشارم یوقاریلیگی اوچون بالهم دنیا گه کیلمسدن ۱۵ کون آلدین بستر بولدیم. شونینگدیک بالهم دنیا گه کیلگنیدن کیین هم قریب ۱۰ آی دوالندیم.»
بو کسللیککه چلینیشنی تجربه قیلگن عیاللردن باشقه بیری قندوزلیک ۴۰ یاشر ماهجبیننینگ ایتیشیچه، تورت فرزند آنهسی دیر و بو کسللیک نهفقط جسمی ساغلیگیگه تاثیر قیلگن، بلکیم کوندهلیک حیاتینی هم تاثیر آستیده قرار بیرگن. «حاملهدارلیکنینگ بیرینچی آییده شکریم بارلیگینی بیلدیم. کوپ سووس قالهر ایدیم، باغزیم قوریدی، بیحال ایدیم و فشارم یوقاری ایدی. نفسم قیسیدی. اییهسیم کیلهدیگن نرسهلردن ایمه دیگن ایدیلر و آوقتلنیشده قتیق پرهیزیم بار ایدی. بو کسللیک اوی ایشلریگه هم تاثیر قویگن ایدی و دایم یاردم گه نیازیم بولیدی.»
بیزلرنینگ فیسبوک صحیفهمیزگه باش اورینگ!
شونینگدیک قندوز یشاوچیسی همده بو کسللیککه چلینیب و دوالنگن ۲۸ یاشر آمنهگه کوره: «ایکی بالهم بار. سووس قالیش، چرچهش، یورهک بوزیلمه، تیریمده لکهلر و تیز-تیز سییش علایملریدن ایدی. ایستگنیم نرسهنی اییه آلمس ایدیم، چونکه ضرری بار ایدی. انسان وضعیتی یخشی بولمهگنیده، ایش و حیاتیگه هم تاثیر قیلهدی. دوالنگنیمدن راضیمین و حاضر ساغهیگنمین، بیراق ینه هم کیینگی حاملهدارلیکده قیته شکر کسللیگیگه چلینیشیمدن خواطریم بار.»
ایتیش کیرهک که، حاملهدارلیک دیابتی عیاللر آرهسیده بیراز رواجلنگن بیر کسللیک بولیب، آنه و چقهلاقنینگ ساغلیگینی تاثیر آستیده قویه آلهدی. ساغلام آوقتلنیش، منظم فزیکی فعالیت، حبوبات، سبزهوات و میوهلردن فایدهلنیش و شفاکارلر توصیهلرینی رعایت قیلیش، حاملهدارلیک ریابتینینگ آلدینی آلیش و کنترول قیلیش اوچون اینگ اونملی اقداملردن حسابلنهدی.
