هوا ایسیشی بیلن، بلخ ولایتی مرکزی مزارشریف شهری ده «ابوعلی سینای بلخی» کسلخانه‌سی گه هر کونی، موسومی کسل‌لیک اینیقسه اسهال کسل‌لیگیگه چلینگن یوزلب باله مراجعت قیله‌دی.
بلخ ده ساغلیق‌نی سقلش مسئوللری نینگ ایتیشلریچه، سونگی کون‌لرده اسهال کسل‌لیگیگه چلینگن‌لر سانی کوپه‌یگن و اوشبو کسل‌لیک طفیلی اوتگن بیر یریم آی ده قریب آلتی باله وفات ایتگن.
ابوعلی سینای بلخی کسلخانه‌سی نینگ باله‌لر بولیمی مسئولی عبدالرووف فروغ گه کوره، اوشبو ییل ثور آیی ده اسهال کسل‌لیگیگه چلینگن تورت باله و جوزا اول‌لریده ایکی باله وفات ایتگنلر.
بیزلرنینگ فیسبوک صحیفه‌میزگه باش اورینگ!
جناب فروغ، هوا ایسیشی، طبی قاعده‌لر رعایت ایتیلمسلیگی و صحی ایچیملیک سوو استعمال قیلینمسلیگینی موسومی کسل‌لیکلر کوپه‌یش عامللریدن عنوان قیلیب ایتیشیچه، هر کونی اوشبو کسلخانه نینگ باله‌لر بولیمی گه اسهال کسل‌لیگیگه چلینگن ۱۵۰ و ۲۵۰ باله مراجعت قیله‌دی.
ابوعلی سینای بلخی کسلخانه‌سی نینگ باله‌لر بولیمی مسئولی عبدالرووف فروغ نینگ ایتیشیچه: «ثور آی ده اسهال کسل‌لیگیگه چلینگن قریب بیر مینگ باله بستری بولگن ایدی، اوشبو کسل‌لیککه چلینگن تورت باله وفات ایتدی و شونینگدیک، جوزا اول‌لریده ایکی باله هلاک بولدی.»
عین‌حالده، باله‌لرینی دوالش اوچون مذکور کسلخانه گه مراجعت قیلگن عایله‌لردن بیرقطاری، باله‌لر آره‌سیده اسهال کبی کسل‌لیکلر کوپه‌یشیدن خواطر بیلدیریب و شفاکارلردن، باله‌لرینی دوالش اوچون دقت قیلیش‌لرینی طلب قیله‌دیلر.
ابوعلی سینای بلخی کسلخانه‌سی نینگ باله‌لر بولیمیده بستری بولگن کسل پایوازلریدن عزت‌الله و حکیم‌الله، داروو ییتیشمسلیک و شفاکارلر نینگ بی فرق‌لیگیدن شکایت قیله‌دیلر.
کسل پایوازلریدن عزت‌الله نینگ ایتیشیچه: «کسلخانه نینگ داروخانه‌سیده دارو یوق. بای کیشی‌لر تشقری دن ساتیب آله‌دی، کمبغل کیشی‌لر قنده‌ی قیلسین؟ تیلنچیلیک قیلیش گه مجبور. هر بیر بستر ده ایکی باله یاتقیزیلگن.»
بیزلرنینگ توییترده هم تعقیب قیلینگ!
کسل پایوازلریدن باشقه بیری حکیم‌الله گه کوره: «کسلیم تورت کوندن بویان بستری دیر. دارونی تشقری دن ساتیب آله‌من. کسلخانه نینگ داروخانه‌سیده دارو یوق. پولیم یوق احوال یخشی ایمس.»
برچه‌سی بیلن، باله‌لر بولیمی شفاکارلری نینگ ایتیشلریچه، دنیا بویلب اسهال کسل‌لیگی طفیلی کوپ سانده باله‌لر قربان بوله‌دی.
اولر عایله‌لردن، باله‌لری نینگ ساغلام‌لیگی اوچون طبی قاعده‌لرنی رعایت ایتیش‌لرینی طلب قیله‌دی.