قیش موسومی ییتیب کیلیشی و یاقیلغی مادهلرگه اهالی احتیاجی کوپهیشی بیلن، بادغیس ولایتیده اورمانلرنینگ کیسیلیش جریانی یشاوچیلر و محلی مسئوللر آرهسیده کینگ کولملی خواطرلرگه سبب بولگن. بو خواطرلرنینگ عاقبتی، یشش محیط، محلی اقتصاد و اهالینینگ کوندهلیک حیاتینی جدی خوف بیلن روپهره قیلیشی ممکن.
بادغیس ایکینچیلیک، سووغاریش و چاروهچیلیک ریاستی مسئوللری، بو موضوعنی تصدیقلب و ایتیشلریچه، هوا ساووقلیگی، قشاقلیک، ایشسیزلیک و بدیل یاقیلغی مادهلرنینگ یوقلیگی، اهالیدن قطارینینگ اورمان کیسیشگه یوز کیلتیریشی عامللریدن بیری دیر.
بادغیس ایکینچیلیک ریاستینینگ اورمان و اوتلاقلر بوییچه مدیری صفیالله محمدیگه کوره: «هوا ساووق بولیشی بیلن اهالینینگ اورمان کیسیشگه قیزیقیشی کوپهیهدی. قشاقلیک، ایشسیزلیک و یاقیلغی ماده یوقلیگی سبب، یشاوچیلردن قطاری بو ایشگه یوز کیلتیرهدی.»
اونینگ اورغولشیچه، اورمانلرنی کیسیش، انسان ساغلیگی و باشقه بیرقطار تیریک موجودلر حیاتی اوچون مستقیم بیر تهدید حسابلهنیب و اونینگ سلبی عاقبتلری، جمعیتدهگی برچه نرسهنینگ تاثیرلنتیریشی ممکن. «اورمانلر کیسیلگنیده، ساغلام تنفس آلیش قیینلنهدی و چاروهلر همده اوسیملیکلر حیاتیگه هم زیان ییتیشهدی. حیات دوامی اوچون برچه کیشی اورمان کیسیشیدن قول تارتیشی کیرهک.»
مسئوللرنینگ خواطرلری یانیده، بادغیس یشاوچیلریدن قطاری هم اورمانلر کیسیلیشی دوامی اینیقسه پستهنینگ طبیعی اورمانلری کیسیلیشی جریانیدن خواطر بیلدیریب و بو ایشنینگ آلدی آلینیشینی سورهگنلر.
بادغیس ولایتی یشاوچیلریدن عبدالخالقنینگ ایتیشیچه: «پسته باغلریده کورهمیز که درختلر کیسیلهدی. هر بیر یشاوچی اوزینی مسئول بیلیشی کیرهک. بیر درختنینگ بیر برگی حتا جمعیتنینگ سرمایهسی دیر. دولت باشده عمومی آگاهیلیک بیریشی کیرهک و بو ایش دوام قیلگنیده، متخلفلر بیلن قانونی یاندهشیشی کیرهک.»
بو ولایت یشاوچیلریدن باشقه بیری عبدالسلام گه کوره: «یاقیلغی ماده بهانهسی بیلن اورمانلر کیسیلیشی، اهالی اوچون آغیر ضرر دیر. بو ایشنی قیلهدیگن کیشیلرنینگ دولت گه تانیشتیریلیشی کیرهک که جزالنتیریلسه و باشقهلرگه عبرت بولسه.»
شوندهی بیرحالده، یشش محیط بیلرمانلریدن قطارینینگ آگاهلنتیریشیچه، اورمانلر کیسیلیشی اورنینی تولدیریب بولمهیدیگن عاقبتلرگه سبب بولیشی ممکن. اولرنینگ ایشانچیگه کوره، اورمانلر اکولوژیکی برابرلیکنی سقلش، طبیعی آفتلر آلدینی آلیش و انسان حیاتی دوامی اوچون اساسی اورینگه ایگه دیر.
بو توغریده یشش محیط بوییچه ایش بیلرمان میرویس پوهملنینگ ایتیشیچه: «اورمانلر کیسیلیشی سوو تاشقینلر کوپهیشی، هوا افلاسلیگی، توپراق بوزیلیشی و ییرنینگ ایسیشیگه سبب بولهدی. قانوننینگ برابر عملگه آشیریلمسلیگی و متخلفلر بیلن جدی یاندهشیلمسلیگی، مذکور قیینچیلیک دوامی اصلی عامللریدن دیر و بو توغریده جدی اقدام و هماهنگلیک بولیشی کیرهک.»
شوندهی بیرحالده، بادغیس خوفسیزلیک مسئوللری اورمانلرنینگ ناقانونی کیسیلیشی آلدی آلینیشی اوچون عملی اقداملر قولگه آلینیشیدن خبر بیریب و تاکید قیلیشلریچه، خوفسیزلیک کوچلری متخلفلر بیلن قانونی یاندهشیشلری ممکن.
بادغیس امنیه قوماندانلیگی سوزلاوچیسی صدیقالله صدیقینینگ ایتیشیچه: «طبیعی اورمانلرنینگ سقلش اوچون، یشیل قطعه آتیده بیر قطعه توزهلگن که او، اورمانلرنینگ ناقانونی کیسیلیشی آلدینی آلهدی. اوشبو قطعه، ایکینچیلیک ریاستی هماهنگی بیلن فعالیت قیلهدی و متخلف کیشیلر برابریده جدی اقداملرنی قولگه آلهدی. یالغیز اوتگن بیر آیده، ۲۰ کیشی اورمان کیسیش عیبی بیلن قولگه آلینیب، عدلی و قضایی نهادلرگه تانیشتیریلگن.»
ایتیش کیرهک که، بادغیس ولایتی آبکمری و مقر تومنلریده پستهنینگ طبیعی اورمانلری، مملکتنینگ اینگ بویوک پسته باغلری صفتیده ملی سرمایه حسابلنهدی و اونینگ برقرار سقلهنیشی، دولتنینگ فایدهلی شکلده سیاستقویشی، تیگیشلی نهادلرنینگ علمی و فنی کوزهتیشی و یشاوچیلردن برچهسینینگ فعال و مسئول شکلده حصه قوشیشیگه نیازی بار.
