قندوز ولایتی تورلی تومنلریدهگی یشاوچیلر و دهقانلردن قطارینینگ ایتیشیچه، اوتگن ییللرگه قرهگنده قودوقلر سووی سطحی سیزیلرلی درجهده پس توشگن.
مذکور دهقانلردن بیری نجیبالله، منطقهلریدهگی قودوقلر سووی بوتونلی قوریب یا-ده اونینگ سووی ییرلر سووغاریلیشی اوچون ییترلی بولمهگنینی بیان قیلیب و ایتیشیچه، بو وضعیت سبب ایکینچیلیک ییریدن بیر قسمیگه هیچ نرسه ایکمهگن. «اوتگن ییل یامغیر و سوو بولمهگنی اوچون برنج حاصل بیرمهدی. قندوز ولایتیده یخشی حاصل قولگه کیلمهدی. حاصل بولمهگنیده قیمتلر یوقاری کیتهدی. سوو و یاغینگرچیلیک بولمسه، دهقانلر قیینچیلیککه قالهدی.»
شونینگدیک قندوز دهگی دهقانلردن رفیعاللهنینگ ایتیشیچه، سوو تنقیصلیگی توغری درآمدلریگه تاثیر قوییب و اوتگن ییللرگه نسبت حاصللری جدی شکلده کمهیگن. اونینگ کوپهیتیریشیچه، ییردن سوو چیقیشی اوچون دهقانلردن بیر قطاری کوچلی پمپلردن فایدهلنیشگه مجبور بولگن. «کوپینچه سوو گه نیاز بولیشی اوچون چقور قودوق قازهمیز. سوو گه نیازی بولگن بوغدای و سبزهوات کبی نرسهلر اوچون برمه اوریشگه مجبور بولهمیز.»
شونینگدیک بو ولایتدهگی دهقانلردن باشقه بیر عظیمگل، کون اوتیشی بیلن سوو سطحی پس توشیشینی بیان قیلیب و ایتیشیچه: «اوتمیشده تورت یا-ده بیش مترده سوو چیقر ایدی، لیکن حاضر کون اوتیشی بیلن سوو سطحی قویی کیتماقده. اهالینینگ سوودن فایدهلنیشی کوپهیگن. قودوق قازیلیشی توغریسیده هم هیچ بیر موسسه یاردم بیرمهگن.»
باشقه بیرتاماندن قندوز سوو حوزهسی بیلرمانلریدن پایندهمحمد نعیمی، بو ولایتده ییر آستی سوولر سطحی کمهیگنی اصلی سببینی، سونگی ییللرده یاغینگرچیلیک کمهیگنی، اقلیم اوزگریشلری، چقور قودوقلردن حددن تشقری فایدهلنیش و سوو منبعلرینینگ فایدهلی شکلده مدیریت بولمسلیگی عنوان قیلگن. «اهالیدن قار و یامغیرلرنینگ ذخیره قیلیشلرینی ایستهیمیز. قارلرنینگ ییرگه جذب بولیشی ییر آستی سوولر اوچون یخشی دیر. شونینگدیک کیچیک توغانلرنی نظرگه آلسینلر که هر بیر سوو کیتهدیگن یوللرگه سیل کیلسه، اهالی نیچه درخت و تاش بیلن کیچیک ذخیرهچه توزتسینلر.»
شوندهی بیرحالده، قندوز ایکینچیلیک ریاستی زراعتی ایشلری بوییچه آمری صلاحالدین واحدینینگ سلاموطندار گه ایتیشیچه، دهقانلرنی قوللب-قوتلش، آزمصرفلی سووغاریلیش اسلوبلرینی رواجلنتیریش و سوو کملیگی بیلن ماسلشیش بوییچه بیر قطار برنامهلر قولگه آلینگن، بیراق مالی و تخنیکی قیینچیلیکلر اوشبو برنامهلر عملگه آشیریلیشینی قیینچیلیک بیلن روپهره قیلگن. «دهقانلرگه دایم توصیه قیلگنمیز که حددن تشقری سوودن فایدهلنمهسینلر. اوسیملیکلرنی زراعت ریاستی نظری آستی یا-ده توصیهسی بیلن انتخاب قیلسینلر که ییترلی سوو اخیتاریمیزگه بولسین و قندوز ولایتی بویلب ایکینچیلیک ییرلردن برچهسی بو سوودن فایدهلنسهلر.»
شونینگدیک قندوز ولایتی پنج آمو دریایی حوزه ریاستی عمومی باشلیغی عبدالحکیم حاجی حکمتنینگ ایتیشیچه، سونگی ییلرده ییر آستی سوولر سطحی کوپ کمهیب و چقور قودوقلردن فایدهلنیش توغریسیده جدی نظارت بولمهگنی صورتده، بو بحران کوپینچه قیینچیلیککه سبب بولیشی ممکن. «بیر قطار برنامهلریمیز بار. بو برنامهلردن بیرتهسی افغانستان ده توغانلر توزهتیلیشی باشلنگن. سوونی ذخیر قیلیش اوچون کیچیک بندلرنی قازگنمیز. قندوز، تخار و بغلان اوچون ایکیته کته توغاننینگ مطالعاتی برنامهسینی باشلهگنمیز که بیرتهسی کیلگی توغانی و باشقهسی ایسه کوکچه سفلی توغانی دیر.»
ایتیش کیرهک که، عاجل، فایدهلی و سوو منبعلری مدیریت بولیشی اوچون هماهنگلیک بولمهگنی صورتده، قندوز ولایتیده مینگلب عایله حیاتی و ایکینچیلیک کیلهجگی جدی خوف بیلن روپهره بولیشی ممکن.
