گرچی شفاکارلر نظریده توغروق آغریغی اینگ کوچلی جسمانی آغریقلردن بیری بولیب، کوپینچه سویک سینیشی، اوچینچی درجهلی کوییش یا کی عصبی آغریقلری بیلن سالیشتیریلهدی، سلاموطندارنینگ رابعه بلخی و ۱۰۲ بسترلیک لیسه مریم کسلخانهلریده توغروقنی تجربه قیلگن ۱۰ عیال بیلن صحبتی شونی کورستهدی کی، بو عیاللر توغروق طفیلی جسمانی آغریقلر یانیده، اوشبو کسلخانهلر خادملرینینگ یامان یاندهشووی و اعبتارسیزلیگی بیلن روپرهره بولگنلر.
پروان یشاوچیسی ۳۸ یاشلی سمیرا، ینگیلیکده رابعه بلخی کسلخانهسیده توقیزینچی بالهسینی دنیا گه کیلتیرگن، اوشبو مرکزدهگی یامان معامله و اعتبارسیزلیک حقیده ایتیشیچه، کیچه کسلخانه گه مراجعت قیلینسه کسلخانه مسئوللری قبول قیلیشمهیدی و کیچ قبول قیلینگنی سببلی قان کیتیش (خونریزلیک) تاپگن.
او شوندهی دییدی: «انه شو قان کیتیش سببلی بالهم جوده ضعیف بولگن؛ اوغلیم کسل بولیشیگه قرهمی، مینی اونینگ خانهسیدن هیدهب چیقریشدی؛ یامان گپلر ایتیشردی انسان نیمه دییشگه حیران قالهدی؛ بیر خیل حالده بیز بیلن جنجل قیلیشردی – حیران قالهسن.»
کابل یشاوچیسی ۳۵ یاشلی فوزیه، رابعه بلخی کسلخانهسیده تورت مراتبه توغروقنی تجربه قیلگن، اوشبو کسلخانه خادملری حاملهدار عیاللر بیلن ناتوغری یاندهشوو گه قوشیمچه، اولر بیلن فیزیکی یاندهشوو هم بولگنینی بیلدیرهدی. او شوندهی دییدی: «جنجل قیلهدیگن عیاللر بیلن فیزیکی یاندهشهدیلر؛ دقت قیلینمهیدی؛ حتا کسل دردی پیشیشیگه رخصت بیریشمهیدی؛ بو ییر قندهی کسلخانه ایکنلیگینی اویلردیم.»
اوشبو گزارشده صحبت قیلگن عیاللرنینگ ایتیشیچه، اقتصادی قیینچیلیک سببلی دولت کسلخانهلریگه مراجعت قیلگنلر؛ بیراق توغیش پیتیده خادملر تامانیدن یامان یاندهشوو بیلن روپهره بولیشگن؛ بوندهی یاندهشوو اولرنینگ روحی سلامتلیگیگه سلبی تأثیر قویگن.
کابللیک ۳۶ یاشلی مریم، تورت مراتبه لیسه مریم ۱۰۲ بسترلیک کسلخانهسیده توغیشنی تجربه قیلگن، ایری بیکار و اقتصادی احواللری یخشی ایمس، هر چقهلاق دنیا گه کیلتیریش اوچون اوشبو کسلخانه گه مراجعت قیلهدی، بیراق هر مرته کسلخانه خادملرینینگ یامان معاملهسی بیلن روپهره بولگنینی بیلدیرهدی. او شوندهی دییدی: «اوغلیم توغیلیش پیتیده لیسه مریم کسلخانهسیگه مراجعت قیلدیم، جودهیم عذاب چیکدیم؛ ولادت بیرهدیگن شفاکارلر یامان یاندهشهدی؛ اولرنینگ یاندهشووی روحی سلامتلیگیمگه سلبی تأثیر قویگن.»
اوشبو عیاللرگه کوره، خصوصی کسلخانهلرده توغیش خرهجتینی تولهی آلمسلیک سببلی، حقارت بولیش و یامان یاندهشیش گه قرهمی، دولت کسلخانهلریگه مراجعت قیلیش گه مجبور بولهدیلر.
کاپیسالیک ۲۸ یاشلی خدیجه، لیسه مریم ۱۰۲ بسترلیک کسلخانهسیده تورت مراتبه توغروقنی تجربه قیلگن، کسلخانهده دارو بیریلمسلیگی یانیده شفاکارلرنینگ یامان یاندهشووی بیلن دوچ بولگنینی ایتهدی.
اونگه کوره: «یامان یاندهشوولر گه دوچ بولدیم، احوالیم یخشی ایمس ایدی، اولر جوده جیرکنج معامله قیلیشدی. سینگلیم ایتدی، بو کسل عاجل، اولر جوده یامان سوزلرنی ایشلهتیشدی؛ هم مینگه هم سینگلیم گه جوده یامان گپلرنی ایتدیلر، عموماً مینگه اعتبار بیرمهدیلر.»
کسللر یانیده، اوشبو گزارشده ۹ کسل پایوازی بیلن صحبت قیلینگن، اولر کسللری گه ییترلیچه دقت قیلینمهگنی، کسلخانه گه کیریب-چیقیش اوچون اوشبو کسلخانهلرنینگ بعضی خادملری تامانیدن پول آلینگنی و یامان معامله قیلینیشدن شکایت قیلگنلر.
رابعه بلخی کسلخانهسیده ایناغهسینینگ تورموش اورتاغی پایوازی بولگن ۴۱ یاشلی شکیبا گه کوره، پغماندن بو کسلخانه گه مراجعت قیلگن و کسلخانه خادملری اوشبو کسلخانهده بیر کون قالگنی اوچون اوندن ۱۰۰لرچه افغانی پول آلگنینی ایتهدی. او شوندهی دییدی: «۴۰۰ افغانیم بار ایدی ایکی کون ایچیده برچهسینی کسلخانه خادملری گه بیردیم. کسل توغروقخانهسیدن چیققچ، اولر بیزدن شیرینلیک سورهشدی.»
طبیات نظامینینگ سکیزینچی مادهسی اساسیده، شفاکارلر و ساغلیق خادملری طبیات اصولی، معیارلری و اخلاقی گه تینگ خذمت کورسهتیب و مسلککه ضد هر قندهی یاندهشوودن واز کیچیشلری کیرهک.
شو آرهده، بعضی شفاکارلر و طبیات کینگشی مسئوللری، دوالش جریانیده انسانی و اخلاقی معیارلر نظرگه آلینیشیگه تأکیدلشهدی.
نسایی-ولادی متخصص شفاکاری لیزا شمعریز گه کوره، طبیاتده اخلاق فقط مسلک قاعدهسینی رعایت قیلیش بیلن یکونلنمهیدی، بلکی هر بیر کسلنی دوالش موفقیت حسابلنهدی. اونینگ فکریچه، «حرمت، مهربانلیک و کسلگه اعتبار بیریش، اولرنی ایشانچینی قازانیب، تنه و روحی سلامتلیکنی کفالتلهیدی.»
شمعریزنینگ کوپهیتیریشیچه، اخلاقسیز هیچ بیر دارو یا کی دوالش تولیق ثمره بیره آلمهیدی و شفاکارلر هم طبیات کینگشی نظامیگه موافق کسللر بیلن توغری و انسانیت اساسیده معامله قیلیشلری کیرهک.
افغانستان طبیات کینگشی اعضاسی شکیل یوسفزی شوندهی دییدی: «افسوس کی، افغانستانده دولت شفاخانهلریده ایش باسیمی و خادملر ییتیشمسلیگی سببلی طبیات اخلاقی کمراق سقلنهدی؛ حکومت کسللری کوپ بولگن شفاخانهلرده ساغلیق خادملرینی کوپهیتیریشی، شفاکارلرنینگ ایش ساعتلرینی کمهیتیریشی کیرهک.»
رابعه بلخی کسلخانهسی مسئولی، اوشبو کسلخانهدهگی قیینچیلیکلرنی تصدیقلسه-ده، اولر کسللرنینگ شکایتلرینی دایمی شکلده ثبت و مستندقیلیشدن کیین، عملی شکلده تیکشیریلیشی اوچون سعی-حرکت قیلماقدهلیکلرینی ایتیشهدی.
اوشبو کسلخانه مسئولی سمینمشکین گه کوره: «کسللر و پایوازلرنینگ شکایتلریدن خبریمیز بار؛ شکایت قیلسهلر شکایتلرنی تینگلش کمیسیونی اولرنی ثبت ایتهدی و کیین ایسه مستند قیلینهدی؛ کسلخانهنینگ نظارت قیلیش تیمی بار، قیینچیلیکنی حل قیلیش اوچون اقدام قیلهدی.»
بوتوغریده، لیسه مریم ۱۰۲ بسترلیک کسلخانه مسئوللرینینگ فکر-ملاحظهسینی اورگهنیشگه حرکت قیلدیک؛ بیراق کیتمه-کیت قونغیراقلر بیلن موفق بولمهدیک.
برچهسی بیلن، اسلام امیرلیگی ساغلیقنی سقلش وزیرلیگی سوزلاوچیسی شرافتزمان امرخیل، کسللرنی دوالش پیتیده طبیات اخلاقی رعایت ایتیلیشی و کسللرنینگ شکایتلری تینگلشی گه تأکید ایتهدی. او شوندهی دییدی: «کسللرنینگ قیینچیلیگی گه دقت قیلینمسه یا کی طبیات اخلاقی رعایت قیلینمسه، کسللر طبیات کینگشی ریاستیگه مراجعت قیلیش قیینچیلیکلرینی شریک ایته آلیشهدی.»
طبیات ساحهسیده بیلرمانلرنینگ معلوماتیگه کوره، اهالی سانی کوپهلیشی و اقتصادی قیینچیلیکلر گه قرهمسدن توغروق اوچون دولت کسلخانهلریگه عیاللرنینگ مراجعتی آشیشی، نسایی-ولادی کسلخانهلر گه باسیملرنی آشیرگن. اولرنینگ تأکیدلشیچه، هیچ کیمنینگ بو معمالر سببلی طبیات اخلاقی و قاعدهلرینی بوزیب و کسل بیلن یامان معامله قیلیشگه حقی یوق. اوشبو گزارشده صحبت قیلگنلرنینگ طلبی انابت گه آلینیب مستعار آتلردن قوللـهنیلگن.
