ایچکی ایشلر وزیرلیگی سوزلاوچیسی عبدالنافع تکور اوز توییتری ده یازیشیچه، کابل شهری ایکینچی حوزه حدودلری گه قرهشلی «ملکاصغر» تورت یولی ده پولیس کوچلری نینگ چیک پاینتی یقینیده، بیر خودکش هجومچی مقصدی گه ایریشمسدن آلدین خوفسیزلیک کوچلر تامانیدن نشانگه آلینیب اولدیریلگن. اوشبو واقعه بوگون (دوشنبه، ۷ حمل) توش دن کیین ساعت ۱:۰۰ اطرافی ده یوز بیرگن.
حادثهلر گه ییتیشیش بوییچه دولت وزیرلیگی نینگ ایتیشیچه، اوتگن بیر آیده اوروشلر جریانیدن پارتلمهی قالگن مادهلر نینگ پارتلشی عاقبتیده افغانستان بویلب ۳۰ کیشی هلاک بولگن که، اولردن کوپینچهسی نینگ بالهلر تشکیل بیرهدی.
فاریاب ده ییلاو اوستیده جنجل باعث اوچ کیشی هلاک بولگن. فاریاب خوفسیزلیک مسئوللری نینگ ایتیشلریچه، اوشبو ولایت نینگ دولتآباد تومنیده ایکی عایله اورتهسیده جنجل طفیلی اوچ کیشی هلاک بولگن. مذکور واقعه شنبه کونی، ۵ حمل، فاریاب ولایتی دولتآباد تومنی «شور دریایی» منطقهسیده یوز بیرگن.
بغلان خوفسیزلیک مسئوللری نینگ تصدیق قیلیشلریچه، اوشبو ولایت نینگ تالهوبرفک تومنیده بیر کیشی ایناغهسی نی اولدیرگن.
جوزجان خوفسیزلیک مسئوللری، سرپل ولایتیده قوراللی کیشیلر آرقهلی بیر ییگیت نینگ اوغیرلنگنیدن کیین اولدیریلگنی نی تصدیق قیلگنلر. جوزجان امنیه قوماندانلیگی نینگ جنایی جرملر ایشلری بوییچه کشفی آمری شمسالله وثیق نینگ ایتیشیچه، مذکور واقعه اوتگن کون یوز بیرگن.
غزنی محلی مسئوللری نینگ ایتیشلریچه، اوشبو ولایت نینگ واغظ تومنیده هاوان اوقی پارتلشی عاقبتیده بیر باله هلاک بولیب و باشقه بیش باله یرهلنگن. واقعه طفیلی یرهلنگن اوچ باله نینگ احوالی آغیر دییلگن.
بدخشان ده محلی منبعلر نینگ سلاموطندار گه ایتیشلریچه، اوشبو ولایت نینگ تگاب تومنیده، بالهلر آرهسیده قول بمبی پارتلشی عاقبتیده ایکی باله هلاک بولیب و باشقه بیش باله یرهلنگن. منبعلر نینگ کوپهیتیریشیچه، مذکور واقعه چهارشنبه کونی، ۲ حمل، تگاب تومنی «شهیدکان» قیشلاغیده بالهلر نینگ آیسکریم ساتیب آلیشی پیتیده یوز بیرگن.
فاریاب مرکزی میمنه شهریدهگی منبعلر نینگ سلاموطندار گه ایتیشلریچه، اوشبو ولایتده ناتانیش قوراللی کیشیلر ایکی یاش ییگیت نی اولدیرگنلر. اولدیریلگن یاش ییگیتلردن بیری اسلام امیرلیگی نینگ عضوی ایکن.
فاریاب مرکزی میمنه شهری دهگی منبعلر نینگ سلاموطندار گه ایتیشلریچه، اوشبو ولایت ده نورمحمد بیدکی اسملی بیر مسجد نینگ خطیبی، نامعلوم قوراللی کیشیلر تامانیدن اولدیریلگن.
جوزجان امنیه قوماندانلیگی نینگ جنایی جرملر ایشلری بوییچه کشف آمری شمسالله وثیق نینگ سلاموطندار گه ایتیشیچه، جوزجان مرکزی شبرغان شهری گه قرهشلی «سالمزان افغانیه» قیشلاغی یشاوچیسی بولگن ۵۰ یاشلی «عبدالحنان» اسملی کیشی، قوراللی نامعلوم کیشیلر تامانیدن اوققه توتیلیب اولدیریلگن.
بوگون (دوشنبه، ۲۹ حوت) کابل ده مطبوعاتی ییغیلیش ده اشتراک ایتگن ایچکی ایشلر وزیرلیگی نینگ ایتیشیچه، هجری قویاش ۱۴۰۱_ییل باشلهنیشیدن حاضرگچه مملکت بویلب ۱۱ مینگ ۸۹۰ جرمی واقعه یوز بیرگن و اوشبو واقعهلر گه دایر ۱۶ مینگ ۶۸۵ کیشی قولگه آلینگن.
بادغیس ولایتی امنیتی رسمیلری نینگ ایتیشلریچه، یکشنبه کیچه، ۲۸ حوت، اوشبو ولایت ده بیرلشگن ملتلر تشکیلاتی بالهلردن حمایت قیلووچی صندیغی (یونیسف) محلی دفتری نینگ امنیتی بیر قوریقچیسی اوققه توتیلیب اولدیریلگن.
غور ده یوز بیرگن پارتلش عاقبتیده بیر عایله نینگ آلتی اعضاسی هلاک بولگن. غور امنیتی مسئوللری نینگ ایتیشلریچه، اوشبو پارتلش یکشنبه کونی، ۲۸ حوت، توش دن کیین غور مرکزی فیروزکوه شهری «غورقند» قیشلاغیده، بالهلر قول بمبی بیلن اوینش چاغیده یوز بیرگن.
جوزجان امنیه قوماندانلیگی سوزلاوچیسی عبدالستار حلیمی نینگ سلاموطندار گه ایتیشیچه، اوشبو ولایت آقچه تومنی حج و اوقاف مدیری مولوی عبادالله، قوراللی نامعلوم کیشیلر تامانیدن پیچاقلهنیب اولدیریلگن.
بادغیس امنیتی مسئوللری، اوشبو ولایت نینگ مرکزی قلعهینو شهری «باغک» منطقهسیدن ۵۰ یاشر بیر عیال نینگ جسدی تاپیلگنیدن خبر بیرهدیلر.
لوگر خوفسیزلیک مسئوللری نینگ ایتیشلریچه، جمعه کونی عصر چاغی، ۲۶ حوت، اوشبو ولایت نینگ مرکزی پلعلم شهری حدودلری گه قرهشلی «التمور» منطقهسیده هاوان اوقی پارتلشی عاقبتیده ایکی باله هلاک بولیب و باشقه ایکی باله یرهلنگن.
