روسیه دولت رهبری ولادیمیر پوتین، شمالی کوریا رهبری کیم جونگ اون گه ۲۴ باش «آت» ساوغه قیلگن. تایمز گزیتهسی گه کوره، شمالی کوریا رهبری کوپراق آت نی یاقتیرهدی و بو آتلر ۲۵ آگست، روسیه نینگ ولادیمیر ولایتیدن شمالی کوریا گه آلیب کېلینگن. بو آتلر نینگ ۱۹ تهسی ایغیر و بیشتهسی بیتل بولگنلیگی اېتیلگن. بو؛ شمالی کوریا یېتکچیسی و ولادیمیر پوتین اۉرتهسیدهگی یقینلیک کوچهیب بارهیاتگنیدن دلالت بیریشی اېتیلگن، خبرده.
کانلر و پترولیم وزیرلیگی سرپرستی هدایتالله بدری تورکمنستان گه قیلگن سفری دایرهسیده، بو مملکت رسمیلری بیلن ایکّی و نیچه تامانلمه مهم اقتصادی لایحهلر جمله دن تاپی، تورکمنستان-افغانستان-پاکستان ۵۰۰ کیلوولت برق لینی (تاپ)، تورغندی-هرات تیمیر یولی نینگ بیرینچی فازینی قوریش و تورغندی بندرینی کېنگهیتیریش شرطنامهلرینی امضالهگن.
اسلام امیرلیگی تشقی ایشلر وزیرلیگی سرپرستی امیرخان متقی، ۹-سنبله، جمعه کونی کامرون ده اسلامی همکارلیک تشکیلاتی تشقی ایشلر وزیرلری نینگ ۵۰-ییغیلیشیده، بوتون مملکتلر اینیقسه بو تشکیلات گه اعضا مملکتلردن، قۉشمه منفعت اساسیده افغانستان بیلن اقتصاد و سودا مناسبتلرینی کېنگهیتیریشلرینی اېستهگن.
سرپرست حکومت ملی مدافعه وزیرلیگی سۉزلاوچیسی، اسلام امیرلیگی نینگ روسیه دن هوا قورال-اوسکونهلرینی ساتیب آلیش حقیده ترقهلگن خبرنی رد اېتگن. ملی مدافعه وزیرلیگی سۉزلاوچیسی عنایتالله خوارزمی ۹-سنبله جمعه کونی ایکس صحیفهسیده، اسلام امیرلیگی نینگ روسیه دن هوا قورال-اوسکونهلرینی ساتیب آلیش خبری یالغان و بوتوغریده روسیه دولتی رسمیلری بیلن حاضرگچه گپیریلمهگنینی اېتگن.
عبدالبصیر صابری، ۸-سنبله، پنجشنبه کونی، روسیه تاس آژانسی بیلن اۉتکزگن صحبتیده، اسلام امیرلیگی هوا کوچلرینی قۉللب-قوتلش و کوچلنتیریش مقصدیده، روسیه دن هوا اوسکونهلرینی ساتیب آلیش اوچون سعی-حرکت قیلماقدهلیگینی بیلدیرگن.
تخار ولایتی محلی رسمیلری، اوشبو ولایت نینگ مرکزی تالقان شهریده ۳۲ میلیون افغانیلیک ایکّی کیلومتر سرک نینگ اسفالت قیلیش ایشی باشلنگنیدن خبر بیرهدیلر.
کانلر و پترولیم وزیرلیگی سرپرستی هدایتالله بدری، ۷-سنبله، چهارشنبه کونی تشقی ایشلر، مالیه، فواید عامه وزیرلیکلری همده برشنا شرکتی وکیللریدن عبارت بیر هیئت یېتکچیلیگیده، تورکمنستان نینگ رسمی تکلیفی اساسیده بو مملکت پایتختی عشقآباد گه یېتیب بارگن.
ایکینچیلیک، سوغاریش و چاروهچیلیک وزیرلیگی سرپرستی عطاءاله عمری، ۸-سنبله، پنجشنبه کونی اوشبو اداره نینگ بیر ییللیک یوتوقلرینی یېتکرمهلر بیلن شریک قیلیش برنامه ده، بو وزیرلیک سۉنگی بیر ییلده همکار ادارهلر نینگ اویغونلیگی بیلن ایکینچیلیک، سوغاریش و چاروهچیلیک بولیمیده ۳۰۰ میلیون دالرلیک ۲۷۱ لایحه ایشی عملگه آشیریلگنینی معلوم قیلگن.
افغانستان نینگ پاکستان پایتختی اسلامآباد دهگی ایلچیخانهسی گه کوره، بیر هفته دن بېری بیرقطار کیشیلر افغانستان نینگ سوداگرلیک توارلرینی پاکستان نینگ خیبر منطقهسیده توختهتگنلر.
اسلام امیرلیگی باش وزیری نینگ اقتصادی اورین باسری عبدالغنی برادر، «ترمذ خلقارا سودا مرکزی» آچیلیش مراسمی گه اشتراک اېتیش اوچون اۉزبېکستان نینگ ترمذ شهری گه سفر قیلگن.
ایران جمهور باشلیغی مسعود پزشکیان، خارجی بیرینچی سفریده عراق گه سفر قیلیشی کوتیلهدی. ایران نینگ عراق دهگی ایلچیسی محمدکاظم آل صادق بوگون (۷-سنبله، چهارشنبه) اوشبو مملکت دولت لیدری مسعود پزشکیان، عراق باش وزیری محمد شیاع السودانی نینگ رسمی تکلیفی اساسیده، یقینده بو مملکت گه سفر قیلیشینی اېتگن. معلوماتلر اساسیده، پزشکیان اوشبو آی نینگ اخیرلریگه قدر عراق گه سفر قیلهدی.
سرپرست حکومت ملی مدافعه وزیرلیگی رسمیلری بوگون ( ۷-سنبله، چهارشنبه) اوشبو اداره نینگ بیر ییللیک یوتوقلرینی پایلهشیش برنامه ده، مملکت مقیاسیده امنیت بوتونلی تأمینلنیب، محاربوی فعالیتلر کمهیشی بیلن، تینچ اهالی نینگ تلفاتی صفر گه یقینلهگنینی اېتهدیلر.
تخار ولایتی ساغلیقنی سقلش ریاستی نینگ ساغلیق قاعدهلرنی تېکشیریش مسئولی سلطان محمود احمدی نینگ سلاموطندار گه ایتیشیچه، سۉنگی ۱۰ کون ایچیده اوشبو ولایت نینگ رستاق و خواجهغار تومنلریده ۱۰۰ معاینهخانه، ۷۵ داروخانه همده مذکور ولایت مرکزی تالقان شهریده زغیر ایشلب چیقریش و سوونی تصفیه قیلووچی فابریکهلرنی یقیندن باریب کوزهتگنلر.
خلقارا یېتکرمهلر نینگ معلوماتی اساسیده، جرمنی دولتی افغانستان و سوریهلیک قاچقینلرنی اوشبو مملکت دن چیقریش گه قرار قیلگن. اوشبو مملکت باش وزیری اولاف شولتس ۶-سنبله، سهشنبه کونی جرمنی دهگی بیر یېتکرمه بیلن اۉتکزگن صحبتیده، گناهکارلر بو مملکت ده قالیب و حیات کیچیریش حقی یوقلیگینی اېتگن.
اسلام امیرلیگی تشقی ایشلر وزیرلیگی سرپرستی امیرخان متقی، کامرون جمهوریتی گه سفر قیلگن. اسلام امیرلیگی تشقی ایشلر وزیرلیگی سۉزلاوچیسی نینگ اورین باسری ضیااحمد تکل، ۶-سنبله، سهشنبه کونی ایکس صحیفهسیده بیر بیانیه ترقهتیب اوشبو وزیرلیک سرپرستی امیرخان متقی، اسلامی همکارلیک تشکیلاتی تشقی ایشلر وزیرلری نینگ ۵۰-ییغیلیشیده اشتراک اېتیش مقصدیده کامرون گه رسمی سفر قیلگنینی معلوم قیلگن.
افغانستان سرپرست حکومت ملی مدافعه وزیرلیگی بوگون (۶-سنبله، سهشنبه) اۉزبېکستان پایتختی تاشکینت شهریده امریکا ایلچیسی نینگ افغانستان سابق حربی کوچلری نینگ حربی اوچاقلری اۉزبېکستانده قالیش بیاناتی گه مناسبت بیلدیریب، اۉزبېکستانده افغانستان حربی اوچاقلری و تیکاوچرلری ساوغه قیلینیشی قبول قیلینمسلیگی حقیده آگاهلنتیرگن.
