ایچکی ایش‌لر وزیرلیگی خوست ولایتیده بم جایلشتیریلگن بیر موتر خاص پولیس قطعه‌سی نینگ یقیین‌لیگیده پارتله‌تیلگنیدن خبر بیرگن. مذکور واقعه‌ده حاضرگچه ۲ کیشی هلاک و ۹ تینچ اهالی شامل باشقه ۲۳ کیشی یره‌لنگن.
ایچکی ایش‌لر وزیرلیگی سوزلاوچیسی طارق آرین‌نینگ ایتیشیچه، بوگون (سه‌شنبه ۶- عقرب) ساعت ۵:۳۰ اطرافیده ترورچیلر اوشبو ولایت‌نینگ خاص پولیس قطعه‌سی نینگ یقیین‌لیگیده بم جایلشتیریلگن بیر موتر نی پارتلتگن.
اونگه کوره، قطار هجومچی‌لر امنیتی کوچلر بیلن آتیشمه باشله‌گن بیراق هجومچی‌لر نینگ خاص پولیس قطعه‌سیگه کیریش گه رخصت بیریلمه‌گن.
اونینگ کوپه‌یتیریشیچه، بو واقعه‌ده ۲ کیشی هلاک و ۹ تینچ اهالی شامل ۲۳ کیشی یره‌لنگن.
خوست ولایت حاکمی سوزلاوچیسی طالب منگل‌نینگ ایتیشیچه، خاص پولیس مرکزی بم جایلشتیریلگن موتر نینگ هدفی آستیده آلینگن.
اونگه کوره، بو واقعه بوگون ایرته‌لب خاص پولیس مرکزی‌نینگ دیواری‌نی آلدیگه یوز بیرگن.
خوست ولایت پولیس قومندانی داوود تره‌خیل‌نینگ ایتیشیچه، بیر قطار هجومچی‌لر پارتلش‌دن کیین آتیشمه‌گه باشله‌گن.
جناب تره‌خیل‌گه کوره، امنیتی کوچلر حادثه محلی نینگ یقیین‌لیگیده بم جایلشتریلگن باشقه بیر موتر نی کشف و نابود قیلگن.
او بو حادثه‌ده امنیتی کوچلردن بیر نیچه ته‌سی نینگ تن جراحتی کوتارگنی نی تصدیقله‌یدی، بیراق بو حقده بیللی بیر رقم بیرمهیدی.
عین حالده، پولیس قومندانلیگی سوزلاوچیسی عادل حیدر‌نینگ ایتیشیچه، بو واقعه ده حاضرگچه ۴ کیشی هلاک و باشقه ۳۰ کیشی یره‌لنگن کیم قربانیلر آره‌سیده عیاللر و باله‌لر هم شامل دیر.
جناب حیدر نینگ کوپه‌یتیریشیچه، حاضرگچه هجومچی‌لردن ۷ ته‌سی اولدیریلگن و باشقه بیری نی اولدیریش اوچون امنیتی کوچلر سعی و حرکت قیلماقده.
حادثه مسئولیتی نی طالبان شامل حاضرگچه هیچ بیر گروه بویینیگه آلمه‌گن.
