کابل شهری حاجی یعقوب تورت یولیده، موترلر سیسی بیلن پیاده یوللردهگی اهالینینگ اوتیب قیتیشی آرهسیده، بیر قطار ایشچی دیوار یانیگه ییغیلیب بیر بیرلری بیلن حیات قیینچیلیکلری توغریسیده گپلشماقده. اولردن بیری پیاده یولنینگ بیر چیکهسیده، دیوارگه تکیه بیریب و اوتیب-قیتهدیگن کیشیلرگه دقت بیلن قرهب اولتیرگن.
چهارقلعهی وزیرآباد یشاوچیسی بولمیش ۲۸ یاشر غلامنبی، هر کونی ایرتهلب بو ییرگه کیلیب و بیری آرقهلی ایشگه آلینیشینی کوتیب تورهدی. ساعت ایرتهلب ۹:۳۰ بولگنی بیرحالده، بیراق حاضرگچه ایشدن هیچ بیر خبر یوق. اونینگ ایتیشیچه، ایکی ییل آلدین و ایراندن قیتگنیدن کیین، رنگماللیککه یوز کیلتیرگن. «ایران ده آلتی ییل آشپزلیک و اطفائیه بولیملریده ایشلهدیم. ایران دن قیتگنیمدن کیین ایش تاپه آلمهدیم و انه شوو سبب، رنگماللیککه باشلهدیم.»
بیزلرنینگ فیسبوک صحیفهمیزگه باش اورینگ!
کوپینچه کون ایش تاپه آلمهی، کیچهلر آچ و بوش قول بیلن اویگه قیتهدیگن غلامنبینینگ ایتیشیچه، آیده فقط تورت-بیش کون ایشلهیدی که بو وضعیت عایله نیازلرینینگ تامین قیله آلمسلیگیگه سبب بولگن. «اوتگن هفته بیر کون ایشگه کیتدیم و هفته تازه باشلندی و حاضرگچه ایش تاپیب تاپه آلمسلیگیم بیللی ایمس. ایش یوق و کوپ قیین ایش تاپیلهدی. باشقه بیران ایش هم یوق که باریب ایشلهسم.»
غلامنبینینگ کوپهیتیریشیچه، سونگی آیلرده ایشچیلر سانی کوپهیگنی و قوریلیش ایشلری کمهیگنی سبب، ایشچیلیک خرهجتی هم کمهیب و بو وضعیت ایشچیلر شرایطینی قیینلشتیرگن. «اهالی حاضرگی شرایطده ایشچیلیک وضعیتدن ناتوغری فایدهلنهدی؛ ایشچیلیک خرهجتی ۴۰۰ افغانی دیر؛ لیکن ایشچی سانی کوپ بولگنی اوچون اهالی ایشچیلرنی ۲۰۰ افغانی گه آلیب کیتهدی.»
مذکور ایشچیگه کوره، بیر ییل آلدین آتهسی کسللیککه چلینگنی سبب ایشلشدن قالگن و حاضر ایسه یالغیز او، توقیز کیشیلیک عایله خرهجتی تامینلش گه مجبور دیر. «آتهمنینگ کسللیککه چلینمسدن آلدین حیاتیمیز وضعیتی یخشی ایدی؛ حاضر اقتصادی وضعیتیمیز یخشی ایمس. آزیق-آوقت ییشیمیزنی کمهیتیرهمیز. بو ییرده آلهدیگنیمیز قوروق نان پولینی هم تاپه آلمهیمیز. حیات شو رقم اوتیب بارماقده.»
اونینگ ایتیشیچه، بعضا عایله نیازلرینی تامینلش و اوییگه بیر لقمه نان آلیب باریش اوچون، ایش محیطیده حقوقی رعایت بولمسلیگی و عدالتسیزلیکنی چیدهش گه مجبور بولگن. «بعضا ایش ایگهسی بیر کیشیلیک بولمهگن ایشنی بیر کیشی آرقهلی عملگه آشیرهدی؛ بعضا ایشچیلرنینگ آخشم تورتگچه ایشلشی کیرهک بولگنی بیرحالده، شامگچه ایشلهیدی، افغانستان ده ایشچینینگ حقوقی و امنیتی صفر دیر و کوپ آز کیشی بو موضوعگه توجه قیلهدی.»
بیزلرنینگ «ایکس» ترماغی ده هم تعقیب قیلینگ!
اوشبو ایشچینینگ کوپهیتیریشیچه، ییتی آیلیک بالهسیگه سوت پولینی تامین قیله آلمهی و بوش قول بیلن اوییگه بارگن آخشملر، نیچه برابر چرچهب و حیات توغریسیده امیدی اورتهدن کیتهدی. «حیات جوده قیین دیر؛ لیکن ایشله آلمهی و اویگه بارگنیم کونلر، کسل آنهم و سوتینی تیارله آلمهگنیم بالهم نی کورگنیمده، بو قییچیلیک نیچه برابر بولهدی و حیاتنینگ اینگ قیین لحظهسی دیر.»
غلامنبینینگ حکایهسی، هر کونی ایش و عایله نیازلرینی تامینلش یولینی تاپیش مقصد، شهر تورت یوللریگه پناه کیلتیرهدیگن، اوتیب قیتهدیگن کیشیلر آرقهلی ایش بیریلیشینی کوتیب تورگن باشقه یوزلب ایشچینینگ یشش حکایهسی دیر.
