ایریم عیاللر، بیپُشتلیک سببلی تورموش اورتاغینینگ عایلهسی و جمعیت تامانیدن کوچلی روحی باسیمگه دوچ کیلهیاتگنلرینی ایتهدی؛ بو حالت استه-سیکین اولرده امیدسیزلیک، اوزیگه بولگن ایشانچنینگ پسهیشی و اوزینی کمسیتیلگن حس قیلیشگه سبب بولگن.
کابل شهریدن بولگن ۲۹ یاشلی فخریه گه کوره، بیر نیچه ییللیک مشترک تیریکچیلیکدن سونگ حاملهدار بولمهگنی سببلی ایرینینگ عایلهسی تامانیدن باسیم و طعنه-دشناملر گه دوچ کیلگن. اونینگ سوزلریگه کوره، بو حالت قیغو، تیز-تیز ییغلش، حیات گه بولگن امید و قیزیقیشنینگ کمهیشیگه سبب بولگن. او شوندهی دییدی: «قیناته-قینانهم فرزندیم یوقلیگی سببلی مینی دایما عیبلشهدی. هر سفر اویده باله حقیده گپ کیتگنده یا که مینی باشقه عیاللر بیلن تقاسلشگنده، ایچ-ایچیمدن سینهمن، چونکی باشقهلر مین حقیمده گپیرهدی. بو وضعیت روحی حالتیم و کیفیتیمگه چوقور تأثیر کورستهدی.»
جوزجانلیک ۳۵ یاشلی سمیه ایسه، ییتی ییللیک قوشمه حیاتیدن سونگ ایرینینگ بیپُشتلیگی سببلی او بیلن اجرهشگنینی ایتهدی. اونینگ ایتیشیچه، ایریلیقدن کیین قتیق قیغو، خواطر و یالغیزلیکنی باشدن کیچیرگن. بو تجربه اونینگ روحی سلامتلیگی و اوزیگه بولگن ایشانچیگه سلبی تأثیر کورستگن. او شوندهی دییدی: «اجرهشگنیمدن کیین روحی احوالیم انچه یامانلشدی. اوزاق وقت دوامیده قیغو، خواطر و یالغیزلیک حسی بیلن یشهدیم، حتا حاضر هم اوشه کونلرنی ایسلهسم، قلبیمده آغریق و اضطراب تاپیلهدی. بو واقعهلر روحی سلامتلیگیم، اوزیمگه بولگن ایشانچیم و خوفسیزلیک حسیمگه چوقور تأثیر کورستهدی. حلی هم بو حالتدن خلاص بوله آلگنیم یوق.»
شو بیلن بیرگه، نسایی-ولادی شفاکاری ملالی بریمخیل صبوری، عیاللرده بیپُشتلیک تورلی سببلر گه جملهدن عفونتلر، تخمدانلر فعالیتینینگ بوزیلیشی و هورمونی معمالر گه باغلیق بولیشی ممکنلیگینی بیلدیرهدی.
اونینگ ایتیشیچه، بیپُشتلیک حالتلرینینگ اکثریتینی دوالش ممکن، بیراق ایریم حاللرده مثلاً، بچهدان یوقلیگی یا که تخمدانلرنینگ رواجلنمهگنلیگی سببلی دوالش امکانیتی بولمهیدی. او شوندهی دییدی: «عیاللرده بیپُشتلیک نینگ تورلی سببلری بار، جملهدن جنسی یوللردهگی عفونت و میکروبلر، تخم حجرهلرینینگ صفتسیزلیگی، شونینگدیک بعضاً هورمونی یوزه گه کیلهدیگن اوزگریشلر شولر جملهسیدن دیر.»
باشقه تاماندن، روانشناسلرنینگ ایتیشیچه، بیپُشتلیک عیاللرده روحی باسیم، موفقیتسیزلیک حسی، خواطر، توشکونلیک و اوزیگه بولگن ایشانچنینگ پسهیشیگه آلیب کیلیشی ممکن. بو حالت بعضاً یورهک اوریشینینگ تیزلشیشی، اویقوسیزلیک و غمگینلیک کبی علامتلر بیلن هم نمایان بولهدی.
روانشناس عبدالجلیل امرخیل شوندهی دییدی: «بو عیاللر جمعیت، تورموش اورتاغی و قیناتهسی بیلن یوزمه-یوز کیلگنلریده، اولرنینگ گپ-سوزلری و باسیمی طبیعی روشده عیاللرده امیدسیزلیک حسینی یوزه گه کیلتیرهدی. مثلاً اولر ایری باشقه عیالگه اویلنیشیدن یا که باشقهلرنینگ طعنه-دشناملریگه دوچ کیلیشدن قورقیشلری ممکن.»
شو بیلن بیرگه، دین عالمی عبدالغفار غفارزادهنینگ ایتیشیچه، نکاحدن کوزلنگن مقصد فقط فرزندلی بولیش ایمس، بلکی ایر-خاتین اورتهسیده خاطرجمعلیک، اوزارا توشونیش و همجهتلیکنی قرار تاپتیریش هم عایلهوی حیاتنینگ مهم مقصدلریدن بیری دیر. اونگه کوره: «نکاحدن مقصد فقط فرزندلی بولیش ایمس، بلکی قلب خاطرجمعلیگینی یرهتیش هم دیر. بوندهی وضعیتلرده اگر ایرکک اوز خاتینیگه باسیم اوتکزهیاتگن بولسه، صبر-طاقتلی بولیشیمیز کیرهک.»
جهان ساغلیقنی سقلش تشکیلاتینینگ میلادی ۲۰۲۳-ییلده اعلان قیلنگن گزاریشیگه کوره، دنیادهگی هر آلتی کیشیدن بیری حیاتی دوامیده بیپُشتلیک معماسینی باشدن کیچیرهدی. گزارشده قید ایتیلیشیچه، یوقاری درآمدلی مملکتلرده کتته یاشلی اهالی آرهسیده حیات دوامیده بیپُشتلیککه دوچ کیلیش کورستکیچی ۱۷.۸ فایزنی، اورته و پست درآمدلی مملکتلرده ایسه ۱۶.۵ فایزنی تشکیل ایتهدی.



