نیازمندلیک کوپهیگنیده شکایتلر هم کوپهیهدی. بو آرهده بلخ ده بیر ییگیت ایشسیزلیک و اقتصادی ناقولی وضعیت کبی قیینچیلیکلر بولگنی بیلن بیر چیکهده جیم توریب اولتیرمهی، فرقلی بیر یولنی تنلهگن. او، جمعیتنینگ نیازلرینی نظرگه آلیب و اوزینینگ اقتصادی وضعیتی یخشیلنیشی اوچون گوزهللیک و تیری بولیمیده ایشگه باشلهب، سعیوحرکت قیلماقده.
بلخ ولایتی یشاوچیسی بولمیش ۳۱ یاشر عبدالرحمان شیرزاد، کابل ده ۱۵۰ مینگ دالر سرمایه بیلن «بلاویتا» اسمی آستیده بیر دکاننی آچگن. اونینگ ایتیشیچه، بو دکاننینگ آچگنیدن مقصد عیاللرگه ایش زمینهسی یرهتیلیشی و مملکت اقتصادی رواجلنیشی دیر. «عیاللر اوچون بیللی بیر آدرسنی یرهتماقچین بولدیم که اولر یخشی قیمت بیلن تیریلریدن مراقبت قیلهدیگن محصوللرنی ساتیب آلسهلر. دکان اهالی اینیقسه عیاللرگه خذمت قیلیش اوچون آچیلگن.»
بلاویتا دکانینینگ گوزهللیک و تیری بولیمی مصلحتچیسی بولمیش کاینات، ینگیلیکده بو دکانده ایشگه باشلهگن عیاللردن دیر. اونینگ سلاموطندار گه ایتیشیچه، بو دکاننینگ محصوللری آنلاین شکلده خارجدن مملکت گه کیلهدی. «محصوللریمیزنی فرانسه و کوریا کبی باشقه مملکتلردن وارد قیلهمیز و اونی افغانستان بویلب آنلاین شکلده یوبارهمیز. بو ایش مملکت اقتصادی رواجلنیشی و ایچکی سرمایه یاتقیزیلیش مقصد ییگیتلرده بیر امیدنی یرهتهدی.»
بلاویتا دکانینینگ دیجیتالی بازارتاپیش بوییچه مسئولی میشیل پوپلزینینگ ایتیشیچه، دکانلریده عیاللر حضوری سبب، عیال مشترلری راحت بیر شکلده سودا آلهدیلر. «عیاللر دکان گه کیلگنلریده، عیال ایشلاوچیلر بیلن روپهره بولگنلریده اوزلرینی راحت حس قیلهدیلر و مشکللرینی ایتهدیلر و راحت بیر شکلده نیازلری بولگن محصولنی ساتیب آلهدیلر.»
باشقه بیر تاماندن، مذکور دکان ایشلاوچیلریدن عبدالمنان رفیقینینگ ایتیشیچه، بو کبی ایشلرنی یولگه قوییش، ییگیتلرگه ایش زمینهسی یرهتیلیشی و اقتصاد رواجلنیشی اوچون تاثیرلی دیر. اونگه کوره: «بلاویتا کبی دکانلر آچیلیشی ییگیتلرنینگ مهاجرت قیلمسلیگی، ایش فرصتلری یرهتیلیشی و اقتصادی رواجلنیش توغریسیده تاثیرلی بولهدی. بو دکان محصوللری فرانسه و کوریا دهگی کمپنیهلر شامل ۱۲ ته خلقارا کمپنیهدن تیارلنهدی. مراجعه قیلهدیگن مشتریلریمیز گه رایگان شکلده مصلحت بیرهمیز و مناسب محصوللرنی اولرگه ایتهمیز.»
شوندهی بیرحالده، اقتصادی ایش بیلرمان قطبالدین یعقوبی، سرمایه یاتقیزیلیشلرنی افغانستان اوچون مهم دیب و ایتیشیچه، حاضرگی شرایطده بو کبی اقداملر تشقی کمپنیهلردن وارد بولینیشگه تیگیشلی بولیشنی کمهیتیرهدی. «بلاویتا کبی دکانلر، هم اهالی نیازلرینی حل قیلهدی و همده ایش زمینهسینی یرهتهدی. دولت بو سکتوردن حمایت قیلیشی کیرهک. مثلا صناعتی ییرلر بیریلیشی، فایده آلینمسدن قرضه بیریلیشی و مملکتدهگی یاشلر آرقهلی سرمایه یاتقیزیلیش اوچون سالیق آزاد قیلینیشی کیرهک.»
ایتیش کیرهک که، اروپا بیرلشمهسی جاری میلادی ییل ۲۶-جولای، خلقارا کیچیک کسب-کارلر کونی بیلن بیرگه بیر بیانیه آرقهلی، کیچیک کسب-کارلر نهفقط اقتصاد رواجلنیشی؛ بلکیم افغانستان ده اهالینینگ یشش وضعیتی یخشیلنیشی توغریسیده بیر ستون حسابلنهدیگن دیگن. شونینگدیک بو بیانیهده، کیچیک تجارتلرنینگ قوللب-قوتلنیشیگه تاکیدلب و اوز شریکلری همکارلیگی بیلن کیچیک و اورته کسب-کارلر فعاللری اوچون تخصصی تعلیملر، دستلبکی سرمایه، ایش اوسکونهلری و بازارگه قول تاپیش زمینهسینینگ یرهتیشینی ایتگن.
