هرات صناعتی شهرچهسیده جایلشگن باتری ایشلب چیقرووچی بیر فابریکهنینگ باتریلری، بیرینچی مرته سعودی عربستان و بیرلشگن عرب امیرلیگیگه صادر قیلیندی.
۴۰ مینگ دالرلیک اوشبو یوکنینگ صادرات مراسمی، اوتگن کون (۲-جدی، سهشنبه)، هرات صناعتی شهرچهسیده محلی رسمیلر و سوداگرلردن قطارینینگ حضوری بیلن اوتکزیلگن.
افغانستان ده باتری ایشلب چیقرووچی فابریکهلر بیرلشمهسی و «گرین انرژی پلس» فابریکه مسئولی عبدالمتین قلندرینینگ ایتیشیچه، مذکور فابریکهده قریب ۲۰ میلیون دالر سرمایه یاتقیزیلیب و ۵۵۰ ایشلاوچی بیلن کونده تورلی نقلیه واسطهلر اوچون تورت مینگ باتری تولید بولهدی.
اونگه کوره، حاضر افغانستان ده باتری ایشلب چیقریش سکتوریده ۱۱ فابریکه فعال بولیب و توپلم شکلده بو بولیمده ۱۱۰ میلیوندن آرتیق دالر سرمایه یاتقیزیلگن.
