بنگلادیش دین‌عالم‌لری، شیخ‌لری و مفتی‌لری ” افغانستان نینگ تینچ‌لیک تامان چقیریش” آتی‌ده بیر ییغین اوتکزیب، افغانستانده‌گی جاری اوروش نی حرام و شریعتی گه قرشی دیگنلر.
بنگلادیش دین‌عالم‌لری اوتگن کون (یک‌شنبه ۴ – عقرب) مذکور مملکت پایتختی داکه‌ده اوتکزگن ییغین‌ده بیر اعلامیه‌ترقه‌تیب، افغانستانده‌گی اوروش حرام بولگنی و گناه‌سیز مسلمان‌لر اولدیریلیشی توخته‌تیلیشی اوستیگه اورغولب و شونینگدیک قطرده‌گی تینچ‌لیک مذاکره‌سی‌دن جدی شکلده حمایت بیلدیریشگن.
عین‌حالده، بنگلادیش دین‌عالم‌لری، افغانستانده‌گی اوروش تامان‌لریدن کوپینچه خلق نینگ سیسی گه لبیک دیب و تیزلیککه دایمی آتیش کیسین قیلیش‌لرینی سوره‌گن.
اوشبو دین‌عالم‌لری نینگ ایتیش‌لریچه، افغانستانده‌گی اوروش تامان‌لری زوروانلیک‌لرنی آزه‌یتیریش و ایکی تامان آره‌سیده ایشانچ کوچ‌لنیشی اوچون صادقانه تلاش قیلیش‌لری کیره‌ک.
انه‌شوحالده، افغانستان تشقی‌ایشلر وزیرلیگی، بنگلادیش دین‌عالم‌لری تامانیدن ترقه‌تیلگن فتوا و اعلامیه نی خوش قرشی‌لب و دین‌عالم‌لری نینگ اوشبو اقدامی نی افغانستان دولتی و خلقی اوچون جوده اونملی دیگنلر.
مملکت تشقی‌ایشلر وزیرلیگی بیر اعلامیه‌ترقه‌تیب، تینچ‌لیک مذاکره‌سی یوتوققه ایریشیشی و افغانستانده تینچ‌لیک تامین ایتیلیشی اوچون، زوروانلیکلر میزانی آزه‌یشی و تیزلیککه آتیش کیسین تأمین ایتیلیشی مهم شرط‌‌‌‌لردن دیگن.
افغانستانده زوروانلیکلر میزانی یوقاری کیتگنی باعث، اوتگن کونی افغانستان قطار دین عالم‌لری هم کابل‌ده بیر ییغین اوتکزیب، افغانستانده‌گی اوروش نی ناروا دیب ایتگن ایدیلر. اوشبو دین عالم‌لری اوروش تامان‌لریدن بوندن آرتیق خلق‌نی اولدیرمسلیک‌لری‌نی سوره‌شگن.
دین عالم‌لری نینگ ایتیش‌لریچه، اسلام دینی‌گه کوره، کوچ‌گه ایریشیش اوچون انسان‌لرنی اولدیریش ناتوغری‌دیر و اولکه‌ده تینچ‌لیک تامین بولیش اوچون جنجل‌لر حل بولیشی لازم.