سرک‌لرده حیوان‌لرنی سوییش تقیق‌لنیشی و حیوان‌لرنی دولت قصاب‌خانه‌لری گه آلیب باریب سوییش جبری بولیشیدن کیین، قصاب‌لردن بیرقطاری بلخ ولایتی دولت قصاب‌خانه‌سی خذمت‌لر نرخی یوقاری‌لیگیدن نالیدیلر.
قصاب‌لر نینگ ایتیشلریچه، دولت قصاب‌خانه‌سیده بیر باش بوزاق (گوساله) نی سوییش گه بیر مینگ ۴۵۰ افغانی و بیر باش قوینی سوییش گه ۳۵۰ افغانی پول توللش گه مجبورلر.
بیزلرنینگ فیسبوک صحیفه‌میزگه باش اورینگ!
قصاب‌لر، دولت قصاب‌خانه‌سیده حیوان‌لرنی سوییش اوچون کوپ پول آلینیشیدن نالیب ایتیشلریچه، بو مقدار پول نی توللش گه توان‌لری یوق و نیچه مرته نُقص قیلگنلر.
بلخ ده‌گی قصاب‌لردن عبدالغنی و محمدامین، قصاب‌خانه خذمت‌لری نرخی یوقاری‌لیگیدن شکایت قیله‌دیلر.
بلخ ده‌گی قصاب‌لردن عبدالغنی نینگ سلام‌وطندار گه ایتیشیچه: «کتته بیر حیوان نی سوییش اوچون بیر مینگ ۴۵۰ افغانی توللـه‌یمیز، قصاب‌خانه شهر دن کوپ اوزاق دیر، او ییر گه بارگونچه ۵۰۰ افغانی کرایه بیره‌میز برچه‌سی ۲۰۰۰ افغانی بوله‌دی، بو مقدار پول نی توللش توانیمیز یوق، بیر بوزاق دن بونچه درآمد قیله آلمه‌یمیز.»
شونینگدیک، بلخ ده‌گی قصاب‌لردن باشقه بیری محمدامین گه کوره: «بیر بوزاق نی سوییش اوچون بیر مینگ ۴۵۰ افغانی توللـه‌یمیز، عین‌حالده بیر بوزاق دن بونچه سود قیلمه‌یمیز. بیر بوزاق نی سوییش نرخی ۵۰۰ افغانی و بیر باش قوینی سوییش نرخی ۱۵۰ افغانی بولیشنی ایسته‌یمیز.»
بیزلرنینگ «ایکس» ترماغی ده هم تعقیب قیلینگ!
عین‌حالده، بلخ ولایتی دولت قصاب‌خانه‌سی مسئولی گه کوره، قصاب‌خانه خذمت‌لری نرخی حکومت رهبریتی تامانیدن تعیینلنگن و اولر نینگ کمه‌یتیریش یا که کوپه‌یتیریش گه حق‌لری یوق دیر.
بلخ ده دولت قصاب‌خانه‌سی مسئولی عطاءالله اسماعیل‌خیل نینگ سلام‌وطندار گه ایتیشیچه: «بو نرخ رسمی مکتوب اساسیده ایکینچیلیک وزیرلیگی تامانیدن تعیینلنگن. بو نرخ بیلن هم مصرف نی تامین قیله آلمه‌یمیز چونکه ایشلاوچی، شفاکار و خوفسیزلیک کوچلر استخدام بولگن و اولر نینگ معاش‌لرینی توللش گه مجبور میز.»
بلخ دولت قصاب‌خانه‌سی، قوش اوشبو ییل ده آچیلیب و فعالیت گه باشله‌گن و محلی حکومت مذکور قصاب‌خانه نی خصوصی بیر شرکت گه تاپشیرگن.
