بدخشان ولایتی دروازنینگ بیشتله تومنلر یشاوچیلریدن قطاریگه کوره، مخابراتی ترماقلر یوقلیگی، اولرنی یقینداشلری بیلن علاقه قوریشده قیینچیلیک بیلن روپهره قیلگن.
بدخشان ولایتی نسی تومنی یشاوچیلریدن علیآغانینگ ایتیشیچه، اوشبو تومنده مخابراتی ترماقلر یوقلیگی سبب، تاجیکستان مملکتی سیمکارتلریدن فایدهلنیشگه مجبور دیر. «بیر امتیان ترماغی بار که او هم بعضا فعال و بعضا ایسه کیسیلهدی. انه شوو سبب، تاجیکستان سیمکارتلریدن فایدهلنهمیز.»
شکی تومن یشاوچیلریدن رحیماللهنینگ ایتیشیچه: «ساتیب آلهدیگنیمیز تاجیکستان سیمکارتلری قیمت ۱۲ مینگ و ۱۳ مینگ دیر و اونچه اعتباری هم یوق؛ بو وضعیت بیزلرنی قیینچیلیکلر بیلن روپهره قیلگن.»
شونینگدیک بدخشان ولایتی مایمی تومنی یشاوچیلریدن عبدالباسط، اسلام امیرلیگیدن درواز بیشتله تومنلریده مخابراتی ترماقلر یوقلیگی قیینچیلیگینینگ حل بولیشینی ایستهگن. اونینگ کوپهیتیریشیچه: «اسلام امیرلیگی آرقهلی مخابراتی قیینچیلیگیمیزنینگ حل بولیشینی سورهیمیز که اهالی سرگردانلیکدن قوتقریلسین.»
باشقه بیرتاماندن، بدخشان مخابرات و معلوماتی تکنولوژی باشلیغی محمدناصر محمدینینگ ایتیشیچه، درواز تومنلریده مخابراتی سکیز سایت توغریسیده ایشنینگ دوامی بار و مذکور سایتلر ایشی یکونلنیشی بیلن بو تومنلر یشاوچیلرینینگ قیینچیلیکلری حل بولهدی. «سایتلر لینکینی برچه تومنلرگه ییتیشتیره آلسهک، اهالینینگ مخابراتی خذمتلر قیینچیلیگی حل بولهدی. لینک دروازها تومنلریده ساحهلرگه ییتیشمهگنی صورتده، یالغیز علاقه قوریش و صحبت قیلیش خذمتلری حل بولهدی، اینترنت قیینچیلیگی ایمس.»
بدخشان مخابرات و معلوماتی تکنولوژی ریاستینینگ معلوماتی اساسیده، حاضر اوشبو ولایت درواز بیشتله تومنیلریده ۱۲ مخابراتی سایت فعال دیر.
