بدخشان مرکزی فیض‌آباد شهری ده بیر قطار شاعرلر، فرهنگ‌سیورلر و ییگیت‌لر تامانیدن، پنج‌شنبه کونی، ۳۰ سنبله، تورک سیمالری نینگ پارلاق ایکی یولدوزی امیر تیمور و شاعر شاه‌مشرب نینگ ایشلرینی خاطرلش مناسبتی بیلن، شاعر و یازووچی محمد کاظم امینی یازگن «امیر تیمور توزوک‌لری» کتابی نینگ تقدیمات مراسمی بولیب اوتدی.
بدخشان ده فرهنگی اوشبو برنامه تشکیلاتچیسی مسئولی مسعود تیمور نینگ سلام‌وطندار گه ایتیشیچه، مذکور برنامه یولگه قوییلیشیدن اساسی مقصد، امیر تیمور جهانگشاه و امیر مشرب نینگ ایشلرینی خاطرلش گه علاوه، یاش‌لر گه اوزبیک شاعرلری، یازووچیلری و بویوک‌لرینی تانیتیش دیر.
بیزلرنینگ فیسبوک صحیفه‌میزگه باش اورینگ!
او نینگ کوپه‌یتیریشیچه: «برنامه یولگه قوییلیشیدن اساسی مقصد، امیر تیمور کبی تورک_اوزبیک شاعرلری، یازووچیلری و شخصیت‌لرینی، حاضرگچه بولر حقیده معلوماتی بولمه‌گن یاش‌لر گه تانیتیش دیر، البته بو کبی فرهنگی برنامه‌لریمیز دوام تاپیب و اوز یولی‌میز گه دوام بیره‌میز.»
بدخشان یشاوچیلری اینیقسه اوزبیک خلقی فرهنگ‌سیورلریدن بیرقطاری نینگ ایتیشلریچه، کیینگی نسل‌لر کیم‌لیک وتاریخ‌لرینی اونیتمس‌لیگی اوچون بو کبی برنامه‌لر اوتکزیلیشی مهم دیر.
بدخشان ده اوزبیک خلقی نینگ یازووچیلریدن بولمیش عبدالقدیر کیسکین نینگ ایتیشیچه، اوزبیک تیلی ده یازیش و اوقیش گه قیینچیلیگی بولگن‌لر اوچون بو کبی برنامه‌لر اوتکزیلیشی مهم دیر.
بیزلرنینگ «ایکس» ترماغی ده هم تعقیب قیلینگ!
اونگه کوره: «کوپ سانده ییگیت‌لر آنه تیل‌لری (اوزبیک) ده یازیب و اوقیش نی بیلمه‌یدیلر، کیینگی نسل‌لر آنه تیل‌لرینی اونیتمسلیک و بو تیل نی بیگانه حس قیلمسلیک‌لری اوچون بو کبی برنامه‌لر اوتکزیلیشی ضروری دیر، اوزلرینگیز گه معلوم اوتمیش ده بدخشان ده هیچ اوزبیک یوق دییر ایدیلر، لیکن حاضر بو کبی برنامه‌لر اوتکزیلیشی بیلن بدخشان ده اوزبیک خلقی بارلیگی همه گه معلوم بولگن.»
ایتیش کیره‌ک که بوندن آلدین بدخشان ده اوزبیک شاعری و یازووچیسی محمدنسیم نسیم نینگ «فراق‌نامه» اسملی کتابی تقدیمات مراسمی بولیب اوتگن ایدی.