بغلان ولایتی نینگ دهنه‌غوری تومنی یشاوچی‌لری نینگ ایتیش‌لریچه، اوشبو تومنده امنیتی کوچلرنینگ بیر هاموی تانگی‌نی ایکی کرولا موتر بیلن توقنشگنی سبب، عیال‌لر و باله‌لر شامل ۴ تینچ اهالی هلاک و باشقه ۶ تینچ اهالی یره‌لنگن.
بو حادثه ده قربان بولگنلر اقارب‌لریدن بیری جان‌محمد جهید نینگ سلام‌وطندارگه ایتیشیچه، اوشبو ترافیکی واقعه اوتگن “یکشنبه” کونی پلخمری- دهنه‌غوری قتناو یولیده یوز بیرگن و قربان بولگنلر نیچه عایله نینگ اعضاسی دیر.
قربان بولگنلر اقارب‌لریدن باشقه بیری بصیر، بغلان ولایتی بوییچه ترافیک مسوول‌لری و امنیتی کوچلردن بو واقعه‌نی جدی شکلده تیکشیریب و حربی موترلرنینگ تیز سرعت بیلن هیده‌ش‌لریگه توسیق بولیش‌لرینی سوره‌گن.
بغلان ولایتی کسلخانه‌سی داکترلریدن بولمیش شایان روحانی نینگ ایتیشیچه، اوشبو واقعه دن ۲ جسد و ۴ یره‌دار کیشی اوشبو کسلخانه‌گه انتقال بیریلگن. اونینگ ایتیشیچه، یره‌لنگنلرنینگ ساغلیک وضعیتی یخشی دیر.
دهنه‌غوری تومنی ولسوالی محمدصابر قلیچ نینگ بو خبرنی تصدیق‌لب ایتیشیچه، اوشبو واقعه‌ده ۹ تینچ اهالی هلاک و یره‌لنگن، لیکن نیچه کیشی هلاک و نیچه کیشی یره‌لنگنی خصوصیده معلومات بیرمه‌گن.
اونینگ ایتیشیچه، اوشبو ترافیکی حادثه‌ده امنیتی کوچلردن ۳ ته‌سی یره‌لنگن.
بغلان ولایتیده جایلشگن ملی اردو کوچلری نینگ لوا قومندانی بو واقعه تیکشیریلیشی اوستیگه تاکید قیلگن.
دهنه غوری ولسوالی، جاده‌لرنینگ خراب‌لیگینی اوشبو ترافیکی حادثه یوز بیریشی‌گه اصلی عامل عنوان قیلگن.