تورکی دولتلر تشکیلاتی تشقی ایشلر وزیرلری ییغیلیش اوتکزیب، بو تشکیلات گه اعضا مملکتلردن بیریگه هجوم، برچه اوچون تهدید حسابلنیشینی ایتگنلر.
تورکیه تشقی ایشلر وزیری هاکان فیدان، بوگون (۱۷ حوت/۸ مارچ، یکشنبه) ایرتهلب ایکس صحیفهسیده بیر بیانیه ترقهتیب، بو تشکیلات گه اعضا مملکتلرنینگ تشقی ایشلر وزیرلری همده وکیللری استانبول شهریده نارسمی ییغیلیش اوتکزگنلرینی بیلدیردی.
بیانیه گه کوره، اوشبو ییغیلیشده منطقه و دنیا مقیاسیده دوام ایتهیاتگن مسئلهلر اوستیده توختهلگن. و آذربایجان گه اویوشتیریلگن هجوم گه مناسبت بیلدیریلیب و قوشمه بیانیه صادر قیلینگن.
بیانیه اساسیده، تورکی دولتلر تشکیلاتی گه اعضا مملکتلردن بیریگه هجوم، برچه اوچون تشویش و تهدید حسابلنهدی شونینگدیک، تورک عالمی بو اوزگریشلر گه بیر آواز و بیرلیک بیلن حرکت قیلیشی تأکیدلنگن.
تورکی دولتلر تشکیلاتیگه اعضا مملکتلرنینگ تشقی ایشلر وزیرلری بیانیهسیده، بو تشکیلات منطقهده دایمی تینچلیک و برقرارلیک مستحکملنیشی اوچون سعی-حرکتی گه دوام بیریشی قید ایتیلگن.
ایران بیلن امریکا و اسرائیل اورتهسیده بیر هفتهدن کوپراقدن بیری اوروش دوام ایتماقده و منطقهده اوروش کینگهیش احتمالی حقیده تشویشلر آرتگن بیرحالده، تورکی دولتلر تشکیلاتیگه اعضا مملکتلرنینگ تشقی ایشلر وزیرلری ییغیلیش اوتکزگن.
