یشاوچیلریدن کوپ قطاری زراعت و طبیعی منبعلر آرقهلی حیات خرهجتلرینی تامین قیلهدیگن لغمان ولایتی، طبیعی اورمانلر، تاغلر و دریالر گه ایگه بولیش بیلن، افغانستاننینگ زراعتی و طبیعی مهم منطقهلردن حسابلنهدی.
علیشنگ و علینگار، اوشبو ولایتنینگ مهم ایکی دریاسی، ایکینچیلیک ییرلرنی سووغاریب و مینگلب عایلهگه ایکینچیلیک، چاروهچیلیک و ایچیملیک بوییچه نیاز بولگن سوونی تامینلهیدی.
علیشنگ دریاسی اطرافیدهگی منطقهلرده حیات کیچیرهدیگن دهقانلرنینگ ایتیشلریچه، اوشبو دریا سووی بیلن ایکینچیلیک ییرلرینینگ سووغاریش بیرحالده، بیراق قیش موسومیده اونینگ سووی آز یا-ده قوریشی، حاصللریگه سلبی تاثیر قویهدی.
مذکور ولایتدهگی دهقانلردن بیری انصاراللهنینگ ایتیشیچه، علیشنگ و علینگار دریالری سووی بولمهگنیده، حاصللرینینگ کوپینچهسی اورتهدن کیتهدی. «یاز موسومیده اوشبو دریا سووی کوپ دیر، بیراق قیشده کمهیهدی یا-ده قوریدی. اونینگ سببی، اورمانلر کیسیلیشی دیر. قیشده یاغهدیگن قارلر تیزلیککه سوو بولهدی که نتیجهده زراعتی ییرلر حاصل بیرمهیدی.»
شونینگدیک علینگار دریاسیدن فایدهلنهدیگن دهقانلرنینگ ایتیشلریچه، کوپینچه سوو بارلیگی سبب، ییلده ییرلریدن اوچ-تورت مرته حاصل قولگه کیلتیره آلهدیلر. مذکور دهقانلر، حکومتدن سوو کاناللری و تاغانلری قوریلیشینی سورهیدیلر.
مذکور ولایت میرحسن منطقه یشاوچیسی بولمیش محمدالدیننینگ ایتیشیچه: «علینگار دریاسی سوویدن فایدهلنهمیز، لیکن سوو تاشقینی یوز بیرگنیده، کاناللر و توغانلر بوزیلهدی، چونکه اولر دستلبکی ستندرد شکلده قوریلگن. حکومت و موسسهلردن مستحکم و ستندرد کاناللر قوریلیشینی سورهیمیز که ییلده نیچه مرته حاصل قویگه کیلتیره آلهیلیک.»
یشش محیط ایش بیلرمانلرینینگ ایتیشلریچه، سونگی ییللرده اقلیم اوزگریشلری، یاغینگرچیلیک کمهیشی، اورمانلر کیسیلیشی و سوودن ناتوغری فایدهلنیش، مذکور دریالر کیلهجگینی خوف بیلن روپهره قیلهدی. لغمان بیلیم یورتی زراعت فاکولتهسی استادی توریالی پیغامنینگ ایتیشیچه: «سوو ییتکزیش کاناللری بوزیلگن و سوونینگ کوپ قسمی زراعتی ییرلرگه ییتیشمسدن آلدین ضایع بولهدی. شونینگدیک سوو تاشقینلر زراعتی ییرلرنی بوزهدی. اورمانلر اورتهدن کیتسه، یامغیر سووی توپراقنی هم اوزی بیلن آلیب کیتهدی و کیین اوندن یخشی شکلده فایدهلنیش امکانیتی قالمهیدی.»
لغمان ایکینچیلیک ریاستی مسئوللرینینگ ایتیشلریچه، سوونی یخشی مدیریت قیلیش، سووغاریش سیستملرینی قیته قوریش و اورمانلرنی قیته تیکلش، بو قیینچیلیکلر اورته گه کیلیشی آلدینینی آلالهدی.
اوشبو ریاستنینگ طبیعی منبعلر مدیری محمدشاکرنینگ ایتیشیچه: «طبیعی منبعلرنی سقلش اوچون اهالی و حکومتنینگ قوشمه همکارلیگی کوپ مهم دیر. علیشنگ و علینگار دریالری، لغمان ولایتیده مخصوص اهمیتگه ایگه بولیب و چیرایلیگیگه سبب بولگن. بو دریالر قریب ۲۵ مینگ هکتار ییرنی سووغارهدی. منطقهلردن قطاریده بیر ییلده ایکینچیلیک ییرلردن حتا تورت مرته هم حاصل قولگه کیلهدی.»
علیشنگ و علینگار دریالری، لغمان ولایتینینگ یشش محیطی و اقتصادی ثباتیده اساسی اورینگه ایگه دیر. مذکور سوو منبعلری درست مدیریت بولمهگنی صورتده، کیلهجکده زراعت، یشش محیط و اهالی حیاتی، جدی قیینچیلیکلر بیلن روپهره بولیشی ممکن.
