قیش موسومی ییتیب کیلیشی بیلن بیرگه، کنر ولایتیده یوز بیرگن سونگی زلزلهدن جبرلنگن کیشیلردن قطارینینگ ایتیشلریچه، انسانسیورلیک یاردملر کمهیگن. شوندهی بیرحالده، کنر ولایتی چوکی (څوکی) تومنیده محلی مسئوللرنینگ ایتیشلریچه، حاضرگچه جبرلنگنلر آرهسیده میلیونلب افغانی ترقهتیلگن؛ بیراق ینه هم نیازمندلیک کوپ دیر.
چوکی تومنیده یاردملرنی هماهنگلشتیریش کمیسیونی اعضاسی مفتی کلیماللهنینگ ایتیشیچه، سونگی کونلرده یاردملر میزانی کمهیگن. اونینگ کوپهیتیریشیچه، زلزله یوز بیرگنیدن بویان ۸۳ میلیوندن آرتیق افغانی و ۹۶ مینگدن آرتیق دالر چوکی تومنینینگ دیوهگل درهسیدهگی تورلی کمپلرده، جبرلنگن کیشیلر آرهسیده ترقهتیلگن.
کلیماللهنینگ کوپهیتیریشیچه: «حاضرگچه یاردملر دوام قیلماقده؛ لیکن اوتمیشدن حاضرگچه فرقلر کیلگن. حاضر هم تشکیلاتلر و موسسهلر یاردم بیرهدیلر، البته اوتگن پیتلرگه قرهگنده کوپ فرق کیلگن. بو ییرده شخصی یاردملر بیلن جمغرمهلر و تورلیخیل تشکیلاتلر، زلزلهدن جبرلنگنلرگه یاردم بیرگنلر.»
شوندهی بیرحالده، زلزلهدن جبرلنگنلردن قطارینینگ ایتیشلریچه، یاردم قولگه کیلتیریشدن خورسندلر؛ لیکن بو یاردملرنی ییترلی بیلمهیدیلر. زلزلهدن کیین کمپده حیات کیچیرهدیگن نیکصالح، بیر جمغرمه آرقهلی آزیق-آوقت محصولاتیدن فایدهلنیشی پیتیده ایتیشیچه: «عایلهلریمیز حاضرگچه خیمهده حیات کیچیرهدی و واقعهدن ایکی آیدن کوپ وقت اوتگنی بیلن، اویلرنینگ قیته قوریلیشی باشلنمهگن. حاضرگچه قیینچیلیکلر بار و باشپنه گه نیازیمیز بار.»
شونینگدیک زلزلهدن جبرلنگنلردن باشقه بیری عبید، اویلرنینگ قیته قوریلمهگنی و هوا ساووق بولیشیدن خواطر بیلدیرگن. «بیریلگن یاردملر اوچون منتدارمیز. لیکن حاضر اویلریمیزنینگ قیته قوریلیشیگه نیازیمیز بار، چونکه ایندی هوا ساووق بولهدی و یامغیر یاغهدی و باشپنه گه نیازیمیز بار.»
باشقه بیر تاماندن، چوکی تومنی کمپیگه آزیق-آوقت ترقهتیش اوچون بارگن «النور» موسسه باشلیغی قانتالله صافینینگ ایتیشیچه، زلزله یوز بیرگنی باش کوندن حاضرگچه نیچه مرته جبرلنگنلرگه یاردم بیرگنلر. صافینینگ اورغولشیچه، موسسهسی امکان قدر باشقه نهادلر هماهنگلیگی بیلن یاردم بیریش جریانینینگ دوام بیریش اوچون سعیوحرکت قیلماقده. «کنرده زلزله بولگنیدن بیری بو ییرگه کیلگنمیز و یاردم بیریشنی باشلهگنمیز. بوگون هم ۲۰ عایلهگه آزیق-آوقت محصوللرینی یاردم بیردیک. بو کیشیلر کمیسیون تامانیدن تانیشتیریلگن که اولر آرهسیده تورلیخیل جبرلنگنلر بار. اولردن قطاری یرهلنگن و بیر قطاری ایسه زلزلهده عایلهلریدن قطارینی قولدن بیرگنلر.»
کنر ولایتیده ۹-سنبله ده یوز بیرگن اولیملی زلزله، یوزلب کیشینینگ اولیمی و مینگلب عایلهنینگ سرپرستسیز بولیشیگه سبب بولدی. حاضر، قیش موسومی ییتیب کیلیشی بیلن، بو ولایتدهگی نیازمند عایلهلر باشقه هر وقتگه قرهگنده عاجل یاردملر اینیقسه باشپناه قوریلیش توغریسیده یاردمگه نیازلری بار.
