داعش گروهی، اوتگن کونی تشقی ایشلر وزیرلیگی یقینیده اویوشتیریلگن خودکش هجوم مسئولیتینی تن آلگن. داعش گروهی گه منسوب اعماق آژانسی، کابل شهری تشقی ایشلر وزیرلیگی یقینیده اویوشتیریلگن خودکش هجوم، اوشبو گروه نینگ ایشی دیه یازگن. مذکور گروه دوشنبه کیچه، ۷ حمل، اوشبو هجوم عاقبتیده تشقی ایشلر وزیرلیگی نینگ دیپلومات‌لری شامل ۲۰ کیشی اولیب و یره‌لنگنینی ادعا قیلگن.
عین‌حالده، اوتگن کون توش دن کیین ساعت ۱:۰۰ اطرافی ده، تشقی ایشلر وزیرلیگی یقینیده پارتلش یوز بیردی. واقعه دن نیچه ساعت اوتگچ، ایچکی ایشلر وزیرلیگی سوزلاوچیسی، کابل شهری ایکینچی حوزه حدودلری گه قره‌شلی «ملک‌اصغر» تورت یولی ده پولیس کوچلری نینگ چیک پاینتی یقینیده اویوشتیریلگن خودکش هجوم ده، آلتی تینج اهالی هلاک بولیب و اسلام امیرلیگی نینگ اوچ عسکری شامل بیر قطار کیشی‌لر یره‌لنگنینی ایتگن ایدی.
بیزلرنینگ فیسبوک صحیفه‌میزگه باش اورینگ!
شو بیلن بیرگه، اسلام امیرلیگی سوزلاوچیسی نینگ اورین باسرلریدن بلال کریمی نینگ سلام‌وطندار گه ایتیشیچه، اسلام امیرلیگی کوچلری افغانستان ده داعش جنگری‌لرینی مغلوب ایتگن. او نینگ کوپه‌یتیریشیچه: «اسلام امیرلیگی کوچلری مملکت بویلب داعش جنگری‌لرینی یوق ایتگن و بو اولر نینگ اینگ ضعیف ایشلری دیر که بجرماقده‌لر؛ بیراق مملکت و یشاوچیلر اوچون جدی تهدید ایمسلیگی گه ایشانه‌میز.»
باشقه تاماندن، ملی خوفسیزلیک تدقیقاتچیسی شمشاد عزیز کاظمی گه کوره، افغانستان ده بومی داعش یوق و بو مملکت ده‌گی داعش غربی اولکه‌لر نینگ پروژه‌سی دیر. او نینگ ایتیشیچه: «عراق و سوریه کبی افغانستان ده داعش نینگ حضوری یوق. افغانستان ده داعش استخباراتی بیر پروژه دیر که غربی مملکت‌لر و متحدلری گه باغلیق دولت‌لر و استخباراتی تشکیلات‌لر منفعتی اوچون فعالیت قیلماقده. افغانستان ده داعش ایران، روسیه، چین و هندوستان کبی مملکت‌لرنی تهدید قیله‌دی؛ چونکه بو اولکه‌لر غرب نینگ رقیب‌لری یا ده اولر نینگ دشمن‌لری دیر.»
بیزلرنینگ توییترده هم تعقیب قیلینگ!
حربی ایش بیلرمان یوسف امین زازی نینگ ایتیشیچه، افغانستان ده‌گی ناتینچلیک، جهانی و منطقه‌وی عامل گه ایگه، اونی یوق ایتیش اوچون منطقه اولکه‌لری بیر_بیراوی بیلن تعامل قیلیش‌لری کیره‌ک. او نینگ کوپه‌یتیریشیچه: «منطقه و دنیا بویلب اوروش گه چیک قوییش و تروریزم گه قرشی کوره‌ش خصوصیده حاضرگچه مذاکره بولمه‌گن. مذاکره بولمه‌گن حالده افغانستان ده ناتینچلیک و ثبات‌سیزلیک کوچه‌یشیگه گواه بوله‌میز.»
اسلام امیرلیگی، افغانستان ده داعش گروهی سرکوب ایتیلیشیدن عین‌حالده سوز یوریتماقده، نیچه کون آلدین امریکا قوشمه ایالت‌لری مرکزی قوماندان‌لیگی (سنتکام) نینگ ستاد باشلیغی جنرال مایکل کوریلا، افغانستان ده داعش آلتی آی ایچیده امریکا و باشقه غربی اولکه‌لر نینگ منفعیتینی تهدید قیلیشیدن آگاه‌لنتیرگن ایدی.