کونده ایران دن یوزلب افغانستان‌لیک یشاوچی نینگ چیقریلیشی بیرحالده، قاچقینلر وزیرلیگی سرپرستی خلیل‌رحمان حقانی مذکور مملکت‌دن افغانستان‌لیک قاچقینلر نینگ جبری شکلده چیقریلیشی توخته‌تیلیشینی ایسته‌گن.
جناب حقانی نینگ کوپه‌یتیریشیچه، ایران ده افغانستان‌لیک قاچقینلر قیین‌‌چیلیگی حلی اوچون اسلام امیرلیگی ایران حکومتی بیلن، قوشمه بیر کمیته ایجاد قیلیش خصوصیده کیلیشگنلر.
بیزلرنینگ فیسبوک صحیفه‌میزگه باش اورینگ!
قاچقینلر وزیرلیگی سرپرستی گه کوره: «ایران ده قاچقینلر موضوع‌سی خصوصیده، سعی‌وحرکت قیله‌میز. بیله‌سیزلر که ایلچی‌میز کاظمی صاحب و باشقه رسمی‌لر بیلن ییغیلیش اوتکزه‌دی. قوشمه بیر کمیسیون قوریش گه کیلیشدیک و بیر مکانیزم ایجاد قیله‌یلیک که قاچقینلر جبری شکلده چیقریلمه‌سین. او ییرده‌گی قیین‌چیلیک بیلن روپه‌ره بولگن قاچقینلر گه قوشمه بیر مکانیزم قوریلگن که اسلام امیرلیگی و ایران موضوع‌لرنی او ییرده صحبت قیله‌دیلر.»
عین حالده، قانونی و ناقانونی شکلده ایران گه مهاجرت قیلگن افغانستان‌لیکلر نینگ ایتیشلریچه، بو مملکت‌ده آز درآمد برابریده آغیر ایشلش، ایران اهالی‌سی نینگ یامان یانده‌شووی و جبری شکلده چیقریلیش کبی قیین‌چیلیکلر بیلن روپه‌ره‌لر.
ناقانونی شکلده ایران گه بارگن علی رنج‌پور و عزیزالله نینگ ایتیشلریچه، جاری قویاش ییل‌ده مذکور مملکت‌ده افغانستان‌لیک قاچقینلر برابریده قیین‌چیلیکلر کوپه‌یگن.
علی رنج‌پور نینگ کوپه‌یتیریشیچه: «حاضر ایران ده قاچقینلر وضعیتی یخشی ایمس، چونکه هر کونی اولرنی ایش ییری، نان‌وایلیک‌دن قولگه آله‌دیلر که بیر کونی قرارگاه‌ده بولیب و کیین چیقره‌دیلر.»
شونینگدیک عزیزالله نینگ کوپه‌یتیریشیچه: «افغانستان‌لیکلر گه یخشی ایش بیرمه‌یدیلر. بولسه هم آز درآمد بیلن کارخانه‌لرده ایش بیره‌دیلر. اوزیم سوت شرکتی‌ده ایشله‌یمن و آی‌ده ۱۲ میلیون آله‌من. کوپ آغیر ایشله‌یمن؛ بیراق حقوقیم آز و پول نی هم آی باشی‌ده بیرمه‌یدیلر.»
شونده‌ی بیرحالده، افغانستان ده ایش‌سیزلیک و کمبغل‌لیک سبب، یشاوچیلردن کوپینچه‌سی بیر لقمه نان قولگه کیلتیریش اوچون، کوپینچه قیین‌چیلیک بیلن ینه هم ایران گه مهاجرت قیله‌دیلر.
ینگی‌لیکده ایران دن چیقریلگنلردن بیری عزیزالله اکبری نینگ ایتیشیچه: «ایران دن چیقریلدیم و بو ییر گه کیلدیم. ایش یوق. قنچه قیین‌چیلیکلر بیلن پاسپورت آلدیم. ایران ده اوشبو پاسپورت بیلن قولگه آلدیلر. بو ییرده ایش یوق و دولت هم بو توغریده توجه قیلمه‌یدی.»
بیزلرنینگ «ایکس» ترماغی ده هم تعقیب قیلینگ!
شونینگدیک ینگی‌لیکده ایران دن چیقریلگنلردن باشقه بیری احمد مرادی نینگ ایتیشیچه: «هیچ کیم شوق بیلن ایران گه کیتمه‌یدی. ایران پولی نینگ اونچه‌لیک ارزشی یوق. بیر آی کیچه و کوندوز ایشله‌یمیز، ۱۰ میلیون تومان یعنی ۱۲ مینگ افغانی بوله‌دی که ۵-۶ مینگ اوزیمیز گه قاله‌دی. ایش بولگنی صورت‌ده هیچ کیم هیچ ییر گه کیتمه‌یدی.»
ایران کوپینچه پیت‌دن بویان یشاوچیلر نینگ مهاجرت قیله‌دیگن اصلی مقصدلریدن بیری دیر که حاضر ایسه افغانستان یشاوچیلریدن اوچ میلیون‌دن آرتیغی اوشبو مملکت‌ده حیات کیچیریب و عایله خره‌جتی نی تامین‌لش اوچون سعی‌وحرکت قیله‌دی؛ لیکن جبری شکلده چیقریلیش و یامان یانده‌شوو مذکور مملکت‌ده حیات کیچریش نی اولر گه قیین قیلگن.
