پاکستان دن افغانستانلیک قاچقینلرنینگ چیقریلیش جریانی کوچهیشی بیلن بیرگه، افغانستانلیک قاچقینلردن قطارینینگ ایتیشلریچه، یرهتیلگن ینگی چیکلاولر، اولر اوچون حیات کیچیریشنی قیینلشتیرگن. اولر بو مملکتده پولیسنینگ یامان یاندهشووی، دستلبکی خذمتلر چیکلنگنی و اجتماعی باسیملردن شکایت قیلماقدهلر.
قاچقینلرگه کوره، طبی خذمتلردن محروم بولیش، پول یوباریش توغریسیده چیکلاولر، اوینینگ کرایه گه بیریلمسلیگی و ایش بیریلمسلیگی، سونگی هفتهلرده قاچقینلر برابریدهگی کوچهیگن چیکلاولردن دیر.
پنجاب ایالتی راولپندی شهریدهگی افغانستانلیک قاچقینلرن شفیقه هنردوستنینگ ایتیشیچه، بو ایالت رسمیلری پاکستان ده افغانستانلیک قاچقینلر حقیده پولیس گه گزارش بیرگن کیشیگه، نقدی مکافات بیریلیشینی معلوم قیلگن. «قاچقینلر وضعیتی جودهیم یامان دیر و هر کیم بیر قاچقین گه اوی کرایه گه بیرسه، جریمه بولهدی. پنجاب ایالتی هر کیم افغانستانلیک قاچقیننی پولیس گه تانیشتیرگنی صورتده، بو ایالت تامانیدن مکافات آلهدی دیب، اعلام قیلگن.»
بوندن آلدین، پاکستاننینگ پنجاب ایالتیده معلومات و نشرات وزیری عظما بخارینینگ اعلام قیلیشیچه، یالغیز اوتگن اوچ هفتهده، مذکور ایالتدن ۶ مینگدن آرتیق افغانستانلیک قاچقین چیقریلگن.
پاکستاننینگ بلوچستان ایالتیدهگی افغانستانلیک قاچقینلردن رمضانعلی کوشانپورگه کوره، بو مملکتدهگی قاچقینلر، حیاتنینگ دستلبکی خذمتلریدن فایدهلنه آلمهیدیلر.
اونینگ کوپهیتیریشیچه، قولگه آلینیشدن قورقووی سبب، پاکستان پولیسی نیچه مرته اولردن پول طلب قیلگن. «حتا بالهلریمیز قورقهدی. اولر یانیمیگه پول آلیب یوریشیمنی ایتهدیلر که بیر کونی بازارده پولیس قولگه آلگنیده پول بیرسهم. بیر کونی ایکی یاشر قیزیم، مینگ گه پول بیردی که، پولیس آرقهلی قولگه آلینگنیمده اونگه پولنی بیرسم که مینی قویبیرسه و عایلهم نی یکه قویمسهم.»
پاکستان ده افغانستانلیک قاچقینلردن باشقه بیری محمدداد محبی، بو مملکت حکومتیدن افغانستانلیک قاچقینلر بیلن درست یاندهشیلیشینی سورهگن. «نیچه کون آلدین دولت تامانیدن اعلام بولدی که افغانستانلیکلر حقیده معلومات بیریلگنیده، مکافات بیریلهدی دیب. بو بویوک بیر قیینچیلیک دیر و اهالینی خواطرلنتیرگن. بو قیینچیلیک یالغیز مینی خواطرلنتیرمهگن، بلکیم برچه قاچقیننی قیینچیلیک بیلن روپهره قیلگن. پاکستان دولتیدن قاچقینلر بیلن درست یاندهشیشلرینی ایستهیمیز.»
شوندهی بیرحالده، قاچقینلر وزیرلیگی مسئوللرینینگ ایتیشلریچه، پاکستان ده قاچقینلر قیینچیلیکلری حلی اوچون، بو مملکت رسمیلری بیلن صحبت قیلگنلر.
بو توغریده اوشبو وزیرلیک سوزلاوچیسی عبدالمطلب حقانینینگ ایتیشیچه: «نیچه وقتدن، بو موضوعنی مسئوللر بیلن شریک قیلگنمیز که بو یاندهشوولر خلقارا قانون-قاعده گه قرشی دیر، ایکی مملکت اهالیسی آرهسیده کوپراق نفرتگه سبب بولهدی و هیچ بیر ملت خیریگه ایمس. خلقارا تشکیلاتلردن بو توغریده توجه قیلیب، مهاجرت قانونینینگ بوزیلمسلیگینی ایستهیمیز. قاچقینلردن میزبانلیک قیلیش اوچون تیارگرلیگیمیز بار.»
ایتیش کیرهک که، بوندن آلدین هم خلقارا قاچقینلر تشکیلاتی، پاکستان پولیسی آرقهلی جاری میلادی ییل باشلنگنیدن حاضرگچه ۱۰۰ مینگدن آرتیق افغانستانلیک قاچقیننینگ قولگه آلینگنی و بو رقمنینگ اوتگن ییل گه قرهگنده سیزیلرلی درجهده کوپهیگنینی معلوم قیلگن.
