پاکستان تشقی ایشلر وزیرلیگی سوزلاوچیسی شفقت علی خان، اوتگن کونی خبری بیر ییغیلیش‌ده افغانستان توپراغی‌دن بو مملکت گه قرشی خوفسیزلیک تهدید‌لر بارلیگی خصوصیده خواطر بیلدیرگن. اونینگ ایتیشیچه، افغانستان ده «پاکستان طالبلر تحریکی اعضالری حضوری»، کابل و اسلام‌آباد مناسبت‌لرینی بوزه‌دیگن اونملی مسئله‌لردن بیری دیر.
پاکستان تشقی ایشلر وزیرلیگی سوزلاوچیسی‌نینگ کوپهیتیریشیچه، مملکتی افغانستان سرپرست حکومتی بیلن تعامل قیلیش‌‌گه دوام بیره‌دی؛ بیراق افغانستان توپراغی‌دن پاکستان خوفسیزلیک خواطرلری حل بولگونگه قدر، اوزون مدت‌لی ایکی تامانلمه همکارلیک‌لر شکل‌لنمسلیگی ممکن.
بیزلرنینگ «ایکس» ترماغی ده هم تعقیب قیلینگ!
اونینگ اورغولشیچه: «افغانستان پاکستان بیلن قوشنی دیر. علاقه‌لریمیز‌نی بوزه‌دیگن اونملی مسئله‌لردن بیری، افغانستان توپراغی‌ده پاکستان طالبلر تحریکی‌گه تیگیشلی ترورچیلر حضوری دیر. بو موضوع‌نی افغانستان‌نینگ موقت حکومتی گه بیان قیلدیک و شونینگدیک بو قیین‌چیلیک‌نینگ حل بولیشی‌گه تاکید‌له‌یمیز.»
شونده‌ی بیرحالده، سرپرست حکومت تشقی ایشلر وزیرلیگی سوزلاچیسی اورین‌باسری ضیااحمد تکل‌نینگ سلام‌وطندار گه ایتیشیچه، اسلام امیرلیگی قوشنی و منطقه مملکت‌لر منفعت‌لری برابریده افغانستان توپراغی‌دن فایده‌لنیش توغریسیده هیچ بیر کیشی یا-ده گروه گه رخصت بیرمه‌یدی.
اونینگ کوپهیتیریشیچه: «اسلام امیرلیگی نیچه مرته بو توغریده موقفی‌نی بیللی قیلگن؛ حاضر هم قوشنی یا-ده منطقه مملکت‌لری گه تهدید یره‌تیش برابریده افغانستان توپراغی‌دن فایده‌لنیش توغریسیده هیچ کیم گه رخصت بیرمه‌یدی.»
حربی ایش بیلرمانلردن قطاری‌نینگ ایتیشلریچه، اسلام‌آباد و کابل آره‌سیده اورته گه کیلگن اختلافلر‌نینگ اوچره‌شوو و دیپلماتیک یوللر آرقه‌لی حل بولیشی کیره‌ک. حربی ایش بیلرمانلردن اسد‌الله ندیم، افغانستان و پاکستان آره‌سیده‌گی اوزون قوشمه چیگره و فرهنگی و مذهبی علاقه‌لر گه اشاره قیلیش بیلن ایتیشیچه، ایکی مملکت تینچ‌لیک و ثبات اوچون ایکی تامانلمه همکارلیککه نیازی بار و پاکستان طالبلر تحریکی توغریسیده‌گی اختلافلر‌نینگ ییتکرمه‌لرده بیان بولیشی اورنیده، ایکی تامان فایده‌لری‌نینگ نظرگه آلینیشی بیلن حل بولیشی کیره‌ک.
اونینگ کوپهیتیریشیچه: «بو صحبت قیلیش و دیپلماتیک یولی‌دن حل بولیشی کیره‌ک؛ چونکه افغانستان و پاکستان بیر بیریگه نیازی بار. بیر قوشنی صفتیده افغانستان تامانیدن پاکستان اینگ اوزون چیگره گه ایگه دیر. انه شوو سبب پاکستان بیلن یخشی مناسبت اونملی دیر. اسلام امیرلیگی حکومتی بو قیین‌چیلیک‌نی صحبت قیلیش و قناعت بیریش بیلن حل قیلیشی کیره‌ک.»
بیزلرنینگ فیسبوک صحیفه‌میزگه باش اورینگ!
حربی و استخباراتی ایش بیلرمانلردن باشقه بیری صادق شینواری‌نینگ ایتیشیچه، پاکستان دایم افغانستان برابریده ایکی‌تور سیاستی بولیب و بو مملکت ایچکی ناتینچ‌لیکلری اوچون افغانستان‌نی عیب‌لمه‌سلیگی کیره‌ک. «پاکستان مملکتی، بو مملکت‌ده فعال بولگن ترورچیلیک مرکزلر آست‌قورمه‌لرینی یکونلنتیریشی کیره‌ک. پاکستان افغانستان گه قرشی ایکی‌خیل سیاست‌لرنی آلیب بارمسلیگی کیره‌ک که بو قیین‌چیلیک‌لر هم حل بولسین.»
شونده‌ی بیرحالده، پاکستان باش وزیری و تورکیه جمهور باشلیغی، ینگی‌لیکده قوشمه اوچره‌شوولریده افغانستان ده انسان‌سیورلیک یاردم‌لر دوامی، عیاللر و قیزلر حقوقی گه حرمت قیلینیش، ترورچیلیککه قرشی کوره‌ش و همه‌شمول حکومت شکل‌لنیشی‌نینگ کیره‌کلیگی گه تاکید قیلگنلر.
