مملکتنینگ اوزاق ولایتلریده عیاللردن کوپ قطاری اقتصادی چیکلاولر سبب، کوپینچه قیینچیلیکلر بیلن روپهرهلر، لیکن کنر ولایتی نرنگ تومنی یشاوچیسی بولمیش نادیه، سعیوحرکت قیلیش بیلن حتا اویدن هم ایشلب و درآمد قولگه کیلتیره آلیشنی کورستگن.
ییتی کیشیلیک بیر عایله اعضاسی بولمیش نادیهنینگ ایتیشیچه، اوچ ییل آلدین عایله اقتصادی وضعیتی قیینچیلیک بیلن روپهره بولگنی و تورموش اورتاغی درآمدینینگ اوی نیازلری اوچون ییترلی بولمهگنی بیر پیتده، ترشی تیارلشگه باشلهگن.
او، ایشی توغریسیده سلاموطندار گه شوندهی دیدی: «اقتصادی قیینچیلیکلر سبب، بو ایشگه باشلهدیم؛ تورموش اورتاغیمنینگ درآمدی ییترلی ایمس ایدی، انه شوو سبب اویده ایشلب و بالهلریمگه یخشیراق کیلهجک توزهتیشنی ایستهدیم.»
نادیه، حاضر سبزی، قلمپیر، لیمو و باشقه بیر قطار نرسه بیلن ترشی تیلهیدی. اونگه علاوه، قوریتیلگن نعنا، قوریتیلگن قلمپیر و باشقه بیر قطار نرسهسی قوریتیب و بازار گه چیقرهدی. اونگه کوره، کون اوتیشی بیلن اهالی ایشانچی آشیب و مشتریلری سانی کوپهیگن. «حاضر ایشیم یخشی دیر؛ بیراق اونینگ رواجلنیشی اوچون حمایت گه نیازیم بار.»
نادیهنینگ کوپهیتیریشیچه، آیلیک درآمدی سکیز دن ۱۲ مینگ افغانی بولیب، آزیق-آوقت، بالهلری تعلیمی خرهجتی و عایله نیازلرینی تامینلنیشیگه یاردم بیرهدی.
کنر سودا و صناعت ریاستینینگ صرفلهیدیگنلردن حمایت قیلیش و تجارتی ایشلر بوییچه عمومی مدیری تسبیحالله یادگه کوره، تیکووچیلیک، قالین توقووچیلیک، مورهدوزلیک و گلدوزلیک کبی بولیملرده عیاللرنینگ کیچیک کسب-کارلریدهگی موجود قیینچیلیکلر حل بولیب و شونینگدیک، اولرنی قوللب-قوتلشنینگ دوامی بار. بو توغریده جناب یادنینگ ایتیشیچه: «اوتگن ایکی ییلده قریب ۴۰ عیال مسلکی تعلیملر کورگن و بیر قطار کیشی ایسه کسب-کار رواجلنیش توغریسیده تعلیم کورگن. عیاللردن قطاریگه مالی یاردم و ماشین هم ترقهتیلگن.»
بو بیلن بیرگه، اقتصادی ایش بیلرمانلردن عبداللطیف سالارزینینگ ایتیشیچه، کیچیک کسب-کارلر، عیاللر اقتصادی مستقللیگیده مهم اورینگه ایگه دیر. «بو کبی کسب-کارلر نهفقط عایله اقتصادینی کوچلنتیرهدی، بلکیم باشقه ایشسیز عیاللرگه هم ایش زمینهسینی یرهتهدی و جمعیت اقتصادی رواجلنیشیگه هم ایجابی تاثیری بار.»
نادیهنینگ حکایهسی، عیاللرگه تعلیم، مناسب حمایت و بازارگه قول تاپیش زمینهسی یرهتیلگنی صورتده، اولر عایله اقتصادی یوکینی کمهیتیریب و خودکفالیک سری مستحکم آدیملرنینگ آلالیشلرینی کورستهدی.
