چاریکار شهرینینگ ایرتهلب هواسی حاضرگچه ساووق؛ لیکن گل احمد دایم قویاش چیقیشیدن آلدین کیچیک و ینگیلیکده توزهتگن دکانیگه بارهدی. دکان پنجرهسینی آرام بیر شکلده تارتیب، کیچه تامان قانگن چنگلرنی شیشه یوزیدن سیرهدی.
گل احمد، اوشبو ساعت ساتووچیلیک دکانینی توزهتمسدن آلدین سیار شکلده ساعت ساتهر ایکن. او بوندن آلدین شانهلریگه آسیلگن تخته یوزیگه، قیمتی ارزانراق بولگن ساعتلرنی قوییب و اونگه دکان کبی بولگن اوشبو تخته بیلن هر کونی پروان مرکزی چاریکار شهری پیاده یوللریده یوریب و ساعتلرینینگ ساتیلیشی اوچون سعیوحرکت قیلهر ایکن.
یاز موسومینینگ جزیرمه قویاشی، قیش موسومینینگ ساووق شمالی، یامغیر و بوران، هیچ بیری اونگه مهم ایمس. یالغیز تشویشی اوییگه آلیب باریشی کیرهک بولگن بیر لقمه ناننی تاپیش ایدی. «قریب ۲۱-۲۲ ییلدن بیری ساعت تعمیرلهیمیز. ۱۰۰-۲۰۰ افغانی بیلن صفردن باشلهگن ایدیم. دکاننی آلگنیمدن ۷ آی بولهدی. اویده ۷ کیشی بار. دکانیده نیچه تورلی ساعتلریم بار.»
ایش حیاتی هیچ قچان گل احمد اوچون قولهی بولمهگن؛ اوسکونهلرینی پیاده یوللرگه یازیشی پیتده، بلدیه مامورلری اعتراضی بیلن روپهره بولیب و اوتیب قیتهدیگنلر هم اونی اذیت قیله ایکن. لیکن گل احمد دایم اولر یوزیگه تبسم بیلن قرهب و ایشیگه دوام بیرگن. «کوپ قیین کونلرنی اوتکزگنمین. بلدیه کیلهر ایدی و بیر جایدن باشقه بیر جایگه قاچیدیک. اوندهی کون هم بولگن که ایاغلریم ساووقدن قاتیب قالگن. بیللی بیر جاییمیز یوق ایدی و سرکلر یانیده اولتیرهر ایدیک.»
گل احمد دکان توزهتیش مقصد پیاده یوللرده ایشلش قیینچیلیکلرینی چیدهب و هر کونی تاپگن پولیدن بیر مقدارینی ییغهر ایکن که اونینگ آرزوسی، حقیقتگه اوزگریب و حاضر چاریکار بازاری ایچیده ساعت تعمیرلش کیچیک بیر دکانگه ایگه بولگن.
اونینگ دکانی شیشهسیده فرقلی قیمتلر بیلن تورلی ساعتلر تیریلیب قوییلگن. دکانی دیوارلری ساده یاغاچدن یسل تاقچهلر بیلن دیزاینلهنیب و ساعتلرنینگ تیکتاک سیسی دکان ایچینی تولدیرگن که بو سیس اونینگ اوچون یوتوق قوشیغی دیر. «بو دکانده تورلیخیل ساعتلر بار. ایسکی ساعتلرنی آلمهیمن. ساعتلرگه باتری، اسپرنگ و شیشه تشلهیمن.»
گلاحمد بیر کونی کتهراق دکان آچیب و باشقهلرگه هم ایش فرصتلرینی یرهتیشنی آرزو قیلهدی. «اهالیدن حوصلهلی بولیشلرینی ایستهیمن. تینگری اوزی روزی ییتیشتیرهدی. هر بیر قرانغولیک آرقهسیده یاختیلیک بار. کتهراق دکان توزهتیش و باشقه نیچه کیشیگه ایش زمینهسینی یرهتیش ایستهیمن.»
قویاش باتماقده، گل احمد قیته ساعتلر عقربهلرینی تنظیم قیلیب و دکان ایشیگینی باغلهیدی؛ اینگ سونگی قفلنی باغلهشی پیتده کیلهجککه امیدوارلیک سبب وقتگه قرشی کورهشده غالب چیققنینی بیان قیلهدی.
