۲۹-میزان، ۲۱-اکتوبر، تورکمنستان پایتختی عشقآباد شهریده «دولت محمد آزادی نامیدهگی تورکمن ملی جهان تیللری انیستیتوتیده»، اۉزبېک تیلی بیرهمی کونیگه بغیشلنگن طنطنهلی تدبیر اۉتکزیلدی.
اۉزبېکستان یېتکرمهلری گه کوره، بو مملکت ایلچیخانهسی بیلن همکارلیکده تشکیل اېتیلگن تدبیرده انیستیتوت استادلری، اوقیتووچیلری و طلبهلری، قزاقستان، قرغیزستان، تاجیکستان، آذربایجان و تورکیه ایلچیلری، کېنگ جماعتچیلیک و یېتکرمهلر وکیللری اشتراک اېتگن اېدیلر.
آچیلیش مراسمیده دولت محمد آزادی نامیدهگی تورکمن ملی جهان تیللری انیستیتوتی باشلیغی مقصد چاریاوف و اۉزبېکستان ایلچیسی روشنبیک عالماوف سۉز گه چیقیب، آنه تیلینینگ انسان کمالی، معنویتی و ملی اۉزلیکنی انگلشیدهگی بیقیاس اورنیگه، آنه تیلینی اسرهش و رواجلنتیریش ملتنینگ یوکسهلیشی بیلن عضوی باغلیقلیگیگه اعتبار قرهتدیلر.
اۉزبېک تیلینینگ کوپ عصرلیک تاریخی، اونینگ بای ادبی میراثی، زمانهوی اۉزبېک تیلی اېسه شو تاریخی ایلدیزلر اساسیده رواجلنیشیگه تأکیدلندی.
اۉزبېک-تورکمن تیللرینینگ یقینلیگی، اولرنینگ عمومی ایلدیزی و تاریخی رشتهلر حقیده ایتیب اوتیلدی. اۉزبېکستان و تورکمنستان دولت رهبرلرینینگ تشبثلری و سعی-حرکتلری طفیلی ایکی قرداش مملکت اورتهسیدهگی دوستانه مناسبتلر و یقین همکارلیک برچه ساحهلرده ایزچیل رواجلنیب بارهیاتگنی اورغولندی.
۲۹-میزان/۲۱-اکتوبر، اۉزبېک تیلینینگ ملی کونی افغانستان شامل دنیانینگ تورلی حدودلریده طنطنهلی تدبیرلر اۉتکزیلیب نشانلندی.
