کابل ده ایران ایلچیخانهسینینگ ایتیشیچه، بو مملکت انسانسیورلیک یاردملری یوکی نورستان مرکزی پارون شهریگه ییتیشگن.
مذکور ایلچیخانهنینگ بوگون ایرتهلب (۱-اسد، پنجشنبه)، اکس صحیفهسیده یازیشیچه، اون، یاغ و باشقه مادهلردن عبارت بو یوک، نورستان ده سوو تاشقینلردن جبرلنگن کیشیلرگه یاردم بیریلیش اوچون اجرهتیلگن.
شونینگدیک بوندن آلدین، هندوستان سوو تاشقینلردن جبرلنگنلرگه یاردم بیریلیش اوچون افغانستان گه انسانسیورلیک یاردملر یوکینی یوبارگن.
اوتگن کونی بیرلشگن ملتلر تشکیلاتینینگ انسانسیورلیک یاردملرنی هماهنگ قیلووچی ادارهسی افغانستان بولیمی (اوچا)، افغانستان شرقیدهگی سوو تاشقینلردن جبرلنگنلرنینگ باشپنه، آزیق-آوقت محصوللری و ساغلیقنی سقلش خذمتلریگه نیازلری بارلیگینی معلوم قیلگن ایدی.
اسلام امیرلیگی حادثهلرگه قرشی کورهش ادارهسینینگ معلوماتی اساسیده، نورستان ده یوز بیرگن سوو تاشقینلرده ۲۳ کیشی اولیب، ۸۰ کیشی یرهلنگن و شونینگدیک قریب ۱۰۰ کیشی لادرک بولگن.
