پایتخت یشاوچیلریدن بیرقطاری، رمضان آییده کابل شهری بازارلریده نرخ-نوالر آشکنیدن نالیب، دکاندارلر اوشبو آینی بهانه قیلیب، آزیق-آوقت اینیقسه لبنیات و ترکارینی یوقاری نرخده ساتماقدهلیکلرینی اېتهدیلر.
کابل شهری تهیه مسکن یشاوچیسی رحیمالله گه کوره، نرخ-نوالر آشیشی اوچون عایله احتیاجلرینی تأمینلشده قیینچیلیک بیلن دوچ بولگن.
اونینگ کوپهیتیریشیچه: «نهایت قیمتچیلیک؛ رمضانده نرخ-نوا آشگن؛ ۴۰۰ افغانیم بار اېدی، بیر بوتل مربا، توز و یریم کیلو گوشت آلدیم و باشقه نرسه آلیش گه قوربیم یېتمهدی.»
کابل یشاوچیلریدن باشقه بیری لالاجان، حکومت آزیق-آوقت نرخینی کنترول قیلیشی کېرهک دیېدی. اونگه کوره: «رمضانده آزیق-آوقت نرخی پس توشیشی کېرهک؛ قیمتچیلیک اوچون کیچیک کچالو آلیش گه مجبور بولدیم؛ چونکه کتّهراغلری قیمت دیر.»
بیزلرنینگ فیسبوک صحیفهمیزگه باش اورینگ!
باشقه تاماندن، کابل شهری بازارلریدهگی دکاندارلردن بیرقطاری، تورخم بندری یاپیق قالیشی اوچون، سوداگرلردن بعضیلری احتکار قیلگن و بو مسئله نرخ-نوالر آشیشی گه سبب بولگنینی معلوم قیلهدیلر.
کابلدهگی دکاندارلردن محمدیوسف گه کوره، رمضان آییده یشاوچیلرنینگ آزیق-آوقت ساتیب آلیش گه طلبی کوپلیگی، قیمتلر اوستیگه تأثیر قویگن. مذکور دکاندارنینگ ایتیشیچه: «رمضانده طلب کوپ بولهدی و قیمتلر اۉزیدن-اۉزی یوقاری کېتهدی؛ شرکتلر هم قیمت قیلهدی؛ شرکتلر نرسهنی نیچه کون بازار گه کېلتیرمهیدی شونی اوچون قیمتلر آشهدی.»
کابل شهرنو دکاندارلریدن بیری محمدرفیعنینگ ایتیشیچه: «رمضاندن آلدین قیماق نرخی ۸۰ افغانی اېدی، حاضر ۸۵ دن ۹۰ افغانی گه آشگن؛ بیر کیلو لیمو ۷۰ افغانی اېدی، حاضر ۹۰ افغانی، بیر سیر کدو ۱۶۰ افغانی اېدی، حاضر ۲۴۰ افغانی گه آشگن؛ باشقه نرسهلر نرخیهم خودّی شوندهی اوزگرگن.»
بیزلرنینگ «ایکس» ترماغی ده هم تعقیب قیلینگ!
شو بیلن بیرگه، کابل بلدیه مسئوللری اوشبو شهر یشاوچیلریدن قیمت ساتهدیگن دکاندارلر بیلن دوچ بولگن حالده، بو اداره گه خبر بیریب و چاره کوریش اوچون اقدام قیلیشنی اېستهیدی.
برچهسی بیلن، کابل بلدیه سۉزلاوچیسی نعمتالله بارکزینینگ ایتیشیچه، بو نهاد پایتخت بازارلریده آزیق-آوقت نرخینی کنترول قیلهدی. «بیران دکاندار قیمت ساتسه، بو موضوعنی تېکشیریش اوچون بیر گروه تعیینلنگن؛ بوتون یشاوچیلردن و اونی یانیده سوداگرلردن رمضانده اهالینینگ قوربیگه قرهب همکارلیک قیلیشلرینی اېستهی من.»
ینگیلیکده، بیرلشگن ملتلر تشکیلاتینینگ انسان سیورلیک یاردملرینی هماهنگ قیلووچی اداره (اوچا)، رمضان یېتیب کېلیشی بیلن افغانستانده میلیونلرچه کیشی آزیق-آوقت خوفسیزلیگی بیلن روپهره بولیب و اولر بیر وقت آوقتلرینی قییردن تأمینلش گه حیران قالگنلرینی اېتگن.
