کابل شهری یشاوچیلریدن قطارینینگ ایتیشلریچه، سونگی کونلر کچالو و پمیدار کبی کوپ فایدهلنیلهدیگن سبزهواتلر قیمتی کوپهیب و بو وضعیت اولرنی قیینچیلیک بیلن روپهره قیلگن.
کابل شهری دارالامان یشاوچیسی فضلاللهنینگ ایتیشیچه، کچالو و پمیدار قیمتی کوپهیگنی سبب، اوشبو سبزهواتلرنینگ تامینلشده قیینچیلیک بیلن روپهره بولگن. فضلالله گه کوره: «کمبغل و قشاق کیشیلرنینگ امکانیتی یوق. اوتگن کون اویگه پمیدار آلیب بارماقچین بولدیم، جودهیم قیمت ایدی؛ تورت ته پمیدارنی ۳۰ افغانیگه ساتیب آلدیم.»
شونینگدیک کابل شهری خیرخانه یشاوچیسی حفیظهنینگ ایتیشیچه: «کچالو و پمیدار قیمتی جودهیم آشگن. بوندن آلدین کمبغل اهالی اوشبو کچالونی ساتیب آلیب و اییهر ایدی و حاضر اونی هم ساتیب آلالمهیدی.»
مذکور یشاوچیلر اسلام امیرلیگیدن، بازارلرده آزیق-آوقت اینیقسه بو کبی سبزهواتلر قیمتینینگ کنترول بولیشینی سورهگنلر.
باشقه بیر تاماندن، کابل دهگی دکاندارلردن قطارینینگ ایتیشلریچه، بازار گه عرضه کمهیگنی سبب، کوپ فایدهلنیلهدیگن سبزهواتلر قیمتی کوپهیگن. دکاندانلردن محمدتمیمنینگ ایتیشیچه: «سبزهوات ایران و پاکستان دن کیلهر ایدی؛ کوپ قیمت بولگن و هیچ تاپیلمهیدی. بیر کیلو پمیدار ۱۰۰ افغانیگه توشهدی؛ کچالو سیری ۱۵۰ ایدی که حاضر ۳۵۰ افغانیگه ییتیشگن.»
شونینگدیک قلعهی فتحالله منطقهسیدهگی دکاندارلردن حامدنینگ ایتیشیچه: «پمیدار، کچالو و لیمو جودهیم قیمت بولگن؛ چون مال کم دیر؛ بوندن آلدین کونده تورت-بیش تیلر محصول کیلهر ایدی، حاضر کونده بیر تیلر کیلهدی.»
کچالو و پمیدار، افغانستاننینگ کوپ فایدهلنیلهدیگن سبزهواتلریدن بولیب و بعضا اینیقسه رمضان آییده، اونینگ قیمتی آشهدی.
