امبولانس سیسی، کابل ده «اندراگاندی» کسلخانهسینینگ فضاسینی تولدیرگن. بیر عایله بالهسینی دوالنیش اوچون اوشبو کسلخانه گه آلیب کیلگن و همشیرهلر بیلن شفاکارلر بالهنی امبولانسدن توشیریب، عاجل بولیمگه آلیب باریش اوچون سعیوحرکتدهلر. شفاخانه حویلیسیده، اوندن آرتیق کیشی تشویش و خواطر بیلن باریب-کیلماقده و بیر قطار کیشی ایسه حویلی یوزیگه بیر تکهنی تشلهب و اولتیرگنلر.
کسلخانه حویلیسیدهگی درختلردن بیرتهسینینگ سایهسی آستیده اولتیرگن ۷۲ یاشر اسدالله گه کوره، اویین چاغیده بیر ایاغی سینگن ۱۱ یاشر نبیرهسینی دوالنیش مقصد، قندوز ولایتیدن بو ییرگه آلیب کیلگن. «قندوز ده چیگره بیلمس کسلخانه گه آلیب باردیک، بو ییرده دوالنمهیدی دیدیلر. بیزلرنی باشقه بیر کسلخانه گه یوباردیلر. او ییرگه بارگنیمیزده اولر هم بیزلر بو بالهنی درمان قیله آلمهیمیز دیدیلر. کابل دهگی صحت طفل کسلخانهسیگه آلیب بارینگلر دیدیلر.»
اسدالله نبیرهسینینگ دوالنیشی اوچون یقینداشلریدن قرض آلیشگه مجبور بولگن. کابل گه کیلگنیدن کیین بیر کیچهنی کسلخانهنینگ آچیق فضاسیده اوتکزگن اسدالله، باغزی تولیب و ایتیشیچه: «کسلخانه، کسللیگی آز بولگن کیشیلر اوچون یخشی و کسللیگینینگ دوالنیشی قیینراق بولگن کسلرنی تیزلیکده چیقرمهدیلر. بو ییرده نیگه قشاق کیشیلر بیلن گذاره قیلمهیدیلر؟»
بیزلرنینگ فیسبوک صحیفهمیزگه باش اورینگ!
اونینگ کوپهیتیریشیچه، قرضدار بولگنی بیلن حاضر کابل ده هم نبیرهسی گه نیاز بولگن دارولرنی ساتیب آلیشی کیرهک. «قیینچیلیک بو که، هر نرسه کسلخانهده کیرهک بولسه، تشقریدن آلیب کیل دیب یازهدیلر. یالغیز بیر سیروم بار و باشقه هیچ بیر نرسه یوق. حتا بیر پلاستر هم یوق و نسخه گه یازهدیلر.»
شونینگدیک جیینینی مذکور کسلخانه گه کیلتیرگن غزنی یشاوچیسی بولمیش رحیماللهنینگ ایتیشیچه، طبی خذمتلرگه قول تاپه آلمسلیک سبب، کابل گه کیلگنلر. اونینگ ادعا قیلیشیچه، صحت طفل کسلخانهسیده شفاکارلرنینگ توجهسیزلیگی سبب، جیینینینگ توغمه یورهک کسللیگی ۱۰فایزدن ۷۰ فایزگه ییتیشگن. «آلتی کونلیک چقهلاقنی صحت طفل کسلخانهسیگه آلیب کیلگنمیز. وضعیتی خراب بولیب و یخشیلنمهگن. شنبه کونی بو ییرگه کیلگنیمیزده توغمه یورهک کسللیگی ۱۰ فایز ایدی و اوچ کون اوتگنیدن کیین، بوگون معاینه بولگنیده، حاضر ایسه توغمه یورهک کسللیگی ۱۰ فایز بولگن. مین شصتیمنی قویگنمین و بالهنی بو کسلخانهدن آلیب کیتهمن.»
اندراگاندی کسلخانهسی حویلیسیده، باشقه بیر قطار کیشی هم شو کبی موضوعلرنی بیان قیلهدیلر. بیش آیلیک بالهسی صحت طفل کسلخانهسیده بستری بولگن تخار یشاوچیسی فریداحمدنینگ ایتیشیچه، تخار ده دوالنیش امکانیتی یوقلیگی سبب، بالهسینی بو ییرگه کیلتیرگن. «شفاکارلر قندوز گه آلیب بار دیلری، قندوز گه آلیب بارگنیمیزده اولر جواب بیردی و کابل گه آلیب بار دیدیلر. حاضر ایسه بو ییرگه آلیب کیلگنمیز.»
فرید احمد ساغلیقنی سقلش وزیرلیگی مسئوللریدن کسل بالهلرنینگ دوالنیشی بولیمیده، برچه کسلخانهلرده ییترلی امکانیتلر تامینلنیشینی ایستهگن. «کسلخانه گه توجه بولیشینی ایستهیمیز. شفاکارلر توجهسیزلیک قیلمهسین. کسلگه بیر نرسه نیاز بولگنیده او ییرگه بارهمیز. ۱۲ یریمگچه او ییرگه قویمهیدیلر. بیللی ایمس که کسل وضعیتی قندهی. کسلگه بیران نرسه بولگنیده کیم جواب بیرهدی.»
بیزلرنینگ «ایکس» ترماغی ده هم تعقیب قیلینگ!
شوندهی بیرحالده، ساغیلقنی سقلش وزیرلیگی مسئوللرینینگ ایتیشلریچه، مذکور وزیرلیک افغانستان اهالیسیگه عادلانه و ستندرد طبی خذمتلر کورسهتیلیشی اوچون سعیوحرکت قیلماقده.
مذکور وزیرلیک سوزلاوچیسی شرافت زمان امرخیل، گزارشده بیان بولگن ادعالرنی رد قیلیب و ایتیشیچه، ایتیلگن موردلر تیکشیریلیشی اوچون نظارتی تیملرنینگ صحت طفل کسلخانهگه یوباریلیشی ممکن. «ساغلیقنی سقلش وزیرلیگی، افغانستان اهالیسیگه عادلانه و ستندرد طبی خذکنلر کورسهتیلیشی اوچون سعیوحرکت قیلماقده، بیراق بیر کسلخانه توغریسیده یشاوچیلر شکایتینی، تیگیشلی بولیملرگه شریک قیلگنمیز و امید که حل بولسه. دستلبکی معلومات اساسیده، یاد بولگن قیینچیلیکلر بو ییرده یوق، چونکه بسترده بولگن کسللر اوچون ییترلی دارومیز بار، تشخیص قیلووچی خذمتلر بار و خادملر هم او ییردده بار. بعضا توشینماوچیلیک بولهدی. اهالی شکایتیگه احترامیمیز بار و نظارت قیلووچی تیملریمیز کسلخانه گه یوباریلگن.»
تورلی ولایتلردن بولمیش یشاوچیلر، یشش محللری و کابل ده نیازلری بولگن طبی خذمتلر یوقلیگی و کملیگیدن شکایت قیلگنلری بیرحالده، یقینده ساغلیقنی سقلش وزیرلیگی سرپرستی، بو وزیرلیک اهالیگه کوپینچه طبی خذمت کورسهتیلیش مسئولیتینی زمهسیگه آلیشگه سعیوحرکت قیلهیاتگنینی ایتگن ایدی.
