۲۰ ییلدن بیری افغانستان ده ایرککلرگه مخصوص توشینیلگن اورین، یعنی عایله سرپرستی اورنیگه اوتیب، حیاتنینگ یخشی و یامان کونلریده فرزندلرینینگ یگانه تینچی بولگن. نسترن -مستعار آت- بو مدتده گلدوزلیک و تیکووچیلیک آرقهلی دسترخوانی اوستیگه بیر لقمه نان آلیب باریب و بالهلری اوستیگه بیر باشپنه قورگن.
نسترن بو ییللر دوامیده نهفقط تورموش اورتاغینینگ یوقلیگی قیینچیلیگی، بلکیم اجتماعی نابرابرلیکلرنینگ آغیر یوکی و یقینداشلرینینگ اذیتلی قرهشلرنی چیدهیاتیشگه هم مجبور بولگن. «۲۰ ییلنی اوتکزیش کوپ قیین ایدی، حتا هیچ کیم گه مین بیوهمن دیه آلمس ایدیم، چونکه قورقیدیم. بالهلریمنینگ کته بولیشی اوچون کیچهوکوندوز گلدوزلیک قیلهر ایدیم. اوزیم کوپ ضعیف بولگنمین. حاضر تیکووچیلیک هم قیلهمن و بو یول آرقهلی عایله نیازلرینی تامینلهیمن.»
بیزلرنینگ فیسبوک صحیفهمیزگه باش اورینگ!
نسترننینگ ایتیشیچه، اوتگن ۲۰ ییلده عایله نیازلرینی تامینلش یوکیدن کوپراق، اجتماعده «بیوه» کلمهسینی ایشیتیش کبی سوزلر، اونینگ روحیگه کوپ تاثیر قویگن. «شونچه هم بیوه دیدیدلر و شونچه هم تحقیر قیلدیلر مینی که حتا آتیمنی دیوار گه یازدیلر. بیران ایرکک بیلن بیر کلمه هم گپلشسم، آرقهمدن گپ چیقردیلر. اویدن چیققنیمده هر کیم هر نرسه دیهر ایدی و قیرگه کیتهدی دیب تعقیب قیلهر ایدیلر.»
بیر عیال اوچون عایله سرپرستی بولیشنینگ قیینچیلیکلری بولگنی بیرحالده، نسترن بالهلریگه یخشیراق کیلهجک قوریش اوچون سعیوحرکت قیلهدی. او، حاضر کونینینگ کوپینچه ساعتینی، عایله نیازلرینی تامینلش اوچون تیکووچیلیک ماشینی آرقهسیده اولتیرهدی. شونینگدیک ایش یانیده قیزیگه هم بو مسلکنی اورگتهدی.
نسترن و فرزندلری دسترخوانیگه تیکووچیلیک آرقهلی کیلهدیگن نان هم، سونگی ییللرده اقتصادی بحراندن امان قالمهگن. سونگی ییللرده مشتریلری کمهیشی و خذمتلر بهاسی کمهیشی سبب، نسترننینگ درآمدی هم کمهیگن. «اوزگریشلر کیلگنیدن بیری تیکووچیلیک قیمتی هم کمهیگن و اهالی کمراق کییم کیلیترهدی. اهالینینگ نانی یوق، قندهی تکه ساتیب آلسین. قیینچیلیکلر سبب کوپینچه پیت آچ هم قالگنمین.»
بالهلری سرپرستلیگی و حیاتنی دوام بیریش اوچون ۲۰ ییل سعیوحرکت، نسترننینگ ساغلیگیگه هم تاثیر قویگن. «۲۰ ییلدن هیچ کیم سورهمهدی که ساتیب آلگنینگ پیاز و پمیدار پولینی قندهی تاپهسین دیب. یا-ده بالهلرینگ کییمنی قندهی قیلهسین دیب. تیکووچیلیک و گلدوزلیک قیلیش اوچون کوزیم ضعیف بولگن و تیزهلریم آغریدی، خلاصه کون اوتیشی بیلن کوچیم کمهیب بارهیپتی.»
بیزلرنینگ «ایکس» ترماغی ده هم تعقیب قیلینگ!
بالهلرینینگ کته بولیشی، نسترن اوچون حیات محنتینینگ بیر قسمینی کمهیتیرسهده، لیکن شخصی اویگه ایگه ایمسلیک، حاضرگچه بو عایلهنینگ راحتلیگی توغریسیده آغیر تاش کبی دیر. اونینگ ایتیشیچه، اوی ایگهسی ینگیلیکده اویدن چیقیشلرینی ایستهگن، بیراق کابل ده اوی کرایهسی کوپهیگنی سبب، حاضرگچه باشقه جای گه کوچ قیلیش اوچون اوی تاپه آلمهگن.
اونینگ حیاتی توغریسیدهگی حکایت یکونیگه ییتیشدیک، لیکن بو نسترن بیلن بالهلرینینگ قیینچیلیکلری یکونی ایمس، اولرنینگ قرشیسیده کوپینچه نانیق کونلر بار و دوامی ایتیش اوچون اونینگ بیلن روپهره بولیشگه مجبورلر.
