اسلام امیرلیگی تشقی ایشلر وزیرلیگی، افغانستان نینگ حاضرگی حکومتی بیلن تعامل قیلیش و عیاللر حقی رعایت ایتیلیشی گه دایر بیرلشگن ملت‌لر تشکیلاتی خوفسیزلیک کینگشی نینگ قطع‌نامه‌سی گه قرشی عکس‌العمل کورسه‌تیب ایتیشیچه، عیاللر گه تیگیشلی موضوع‌لر افغانستان ایچکی مسئله‌لری نینگ بیر بولیمی دیر و باشقه مملکت‌لر گه هیچ قنده‌ی تاثیری یوق.
تشقی ایشلر وزیرلیگی سوزلاوچیسی اورین‌باسری ضیااحمد تکل نینگ ایتیشیچه: «خلق‌ارا قانون‌لر و ستندرد‌لر اساسیده، دنیا مملکت‌لری افغانستان ایچکی مسئله‌لری گه اره‌لشمه‌‌سین، بو افغانستان نینگ ایچکی و اجتماعی مسئله‌سی دیر و دنیا مملکت‌لری گه هیچ قنده‌ی تاثیری یوق.»
بیرلشگن ملت‌لر تشکیلاتی خوفسیزلیک کینگشی، بیر قطع‌نامه صادر قیلیش بیلن اسلام امیر‌لیگی‌دن جمعیت‌ده عیاللر تعلیمی و ایشی گه یره‌تیلگن چیکلاو‌لر بیکار قیلینیشی نی ایسته‌گن.
بیزلرنینگ فیسبوک صحیفه‌میزگه باش اورینگ!
مذکور قطع‌نامه‌ده، اسلام امیرلیگی بیلن تعامل قیلیش فایده‌سی گه علاوه، افغانستان ده‌گی موجود قیینچلیکلر حلی اوچون خلق‌ارا تشکیلات‌لر و مملکت‌لردن عیاللر حقلری رعایت ایتیلیشی اوچون کوچ‌لری‌دن فایده‌لنیب و اسلام امیرلیگی اوستیگه باسیم کیلتیریش‌لری تأکید ایتیلگن.
مذکور قطع‌نامه تصویب ایتیلیشیدن کیین، امریکا، بیرلشگن عرب امیرلیگی و روسیه نماینده‌لری اَیری شکلده، افغانستان ده عیاللر حقلری رعایت ایتیلیشی اوستیگه تأکید قیلگنلر.
بیراق ایش بیلرمان‌لر، بیرلشگن ملت‌لر تشکیلاتی خوفسیزلیک کینگشی قطع‌نامه‌سی و اوشبو قطع‌نامه برابریده اسلام امیرلیگی نینگ قرشی‌لیگینی، دنیا بیلن اسلام امیرلیگی نینگ قرشی ایکن‌لیگیدن دلالت بیریشینی ایته‌دیلر.
بو توغریده، سیاسی ایش بیلرمان طارق فرهادی نینگ سلام‌وطندار گه ایتیشیچه: «بیرلشگن ملت‌لر تشکیلاتی خوفسیزلیک کینگشی قطع‌نامه‌سی، اسلام امیرلیگی نینگ بیر تامان و دنیا باشقه تامان بولگنی‌نی کورسته‌دی. قریب ۹۰ مملکت و بیرلشگن ملت‌لر تشکیلاتی افغانستان نینگ حاضرگی وضعیتینی قاره‌له‌یدی.»
ایکی کون‌‌دن سونگ، بیرلشگن ملت‌لر تشکیلاتی نینگ باش کاتبی آنتونیو گوترش و تورلی مملکت‌لر نینگ مخصوص نماینده‌لری افغانستان وضعیتی گه دایر قطر نینگ دوحه شهری ده ییغیلیش یولگه قوییش بیلن افغانستان مسئله‌لری حقیده صحبت قیلینیشی گه قرار آلینگنی بیرحالده، بیرلشگن ملت‌لر تشکیلاتی نینگ خوفسیزلیک کینگش قطع‌نامه‌سی تصویب بولگن.
ثور نینگ ۱۱- و ۱۲- کونیده یولگه قویلیشی گه قرار آلینگن مذکور ییغیلیش ده، اسلام امیرلیگی بیلن مملکت‌لر نینگ تعامل قیلیش قاعده‌لری محاکمه قیلینیشی کوتیله‌دی.
ایتیلیشچه، اوشبو ییغیلیش ده اسلام امیرلیگی نماینده‌‌لریدن دعوت بولمه‌گن؛ بیراق اسلام امیرلیگی مذکور ییغیلیش ده حضور تاپمسلیگی حاضرگچه نهایی بولمه‌گنینی ایتگن.
بیزلرنینگ توییترده هم تعقیب قیلینگ!
عین‌حالده، اسلام امیرلیگی سوزلاوچیسی اورین‌باسرلریدن بلال کریمی نینگ سلام‌وطندار گه ایتیشیچه، اوشبو حکومت اسلام امیرلیگی بیلن رابطه‌لر یخشی‌لنیشی اوچون آلینه‌دیگن هر بیر قرارنی خوش قرشی له‌یدی.
جناب کریمی نینگ کوپه‌یتیریشیچه: «مملکت نینگ جاری وضعیتی اساسیده، بشری یاردم‌لر و شونینگدیک رسمی و دیپلماتیک رابطه‌لر و چیکلاو‌لر حلی خصوصیده اقدام‌لر و قرار‌لر آلینیشی کیره‌ک.»
افغانستان ده اسلام امیرلیگی نینگ قدرت گه ایریشگنیدن کیین، دنیا جماعه‌سی ییغین‌لر یولگه قوییش و بیر قطار اعلامیه‌لر صادر قیلیش بیلن، اسلام امیر‌لیگی‌دن انسان حقلری اینیقسه عیاللر حقینی رعایت قیلیش و افغانستان ده همه‌شمول حکومت شکل‌لنیش نی ایسته‌گن؛ بیراق اوشبو ایسته‌کلر حاضرگچه عمل گه آشیریلمه‌گن.
